17 һәм 15 яшьлек үсмерләр кыз баланы әҗәт өчен үтергән
Мәрхүмә кыз сыйныфташына 70 мең акча биреп торган.
Иркутск өлкәсенең Нижнеудинск шәһәрендә 17 яшьлек кыз бала югалган булган. Берникадәр вакыттан соң аның мәетен елга ярында куаклар арасында табып алганнар. Бу турыда НТВ каналы хәбәр итә.
11 сыйныфта укучы кыз бала 6 декабрьдә югала. Аны полиция хезмәткәрләре һәм волонтерлар эзли. 14 декабрьдә кыз мәетен Уда елгасы буенда табалар. Пычак белән яраланган кыз мәете куаклар арасында була.
Кызны үтерүдә шикләнеп 17 һәм 15 яшьлек ике үсмерне тоткарлыйлар. Сорау алганда, бу малайлар җинаятьне ничек кылганын сөйли.
Малайлар сүзләренчә, алар кызны әҗәт өчен үтергән. 17 яшьлек үсмер мәрхүмә кызның сыйныфташы була.
Берникадәр вакыт алданрак бу кыз сыйныфташына 70 мең акча биреп тора. Яшүсмер малай бу акчаны тотализаторда оттыра. Кыз исә әҗәтне кире кайтаруны сорый. Акчаны кайтармас өчен, малай кызны үтерергә карар кыла. Бу җинаятьне башкару өчен ул 15 яшьлек иптәшен дә ияртә. Кызны өенә чакыра, акчаны кайтарам дип әйтә. Кыз фатирга килеп кергәч, аның муенына пычак кадый.
Шуннан соң яшүсмерләр мәетне яшерә. Җирле матбугат чаралары хәбәренчә, мәетне шәһәр читенә алып чыкканда җинаятьчеләргә 17 яшьлек малайның әнисе ярдәм итә.
Ике үсмер, мәрхүмә кыз — барысы да мәктәптә яхшы яктан гына сыйфатлана. Кыз олимпиадаларда катнаша. Алар полициядә хисапта да тормый.
Тикшерүчеләр җинаять эше ачкан.