16 яшьлек кыз яна торган йорттан өч энесен алып чыккан

Башкортстанның Шаран районында 16 яшьлек кыз өч энесен янгыннан коткарган. Бу турыда «Башинформ» агентлыгы хәбәр итте.

Янгын 7 мартта көндезге беренче яртыда Супай авылында була. Үзәк урамда урнашкан йортта ут чыга. Урынга килгән коткаручылар өй түбәсе янганын күреп ала.

Янгын чыккан вакытта өйдә дүрт бала була. Бәхеткә, йортта янгын турында кисәтә торган җайланма урнаштырылган.  Балаларның олысы - 16 яшьлек кыз янгын турында хәбәрне ишетеп ала. Кыз йортның коридорында ачык ялкын булуын күрә. Яшүсмер югалып калмый, тиз арада энеләрен җыеп ала һәм тәрәзәдән урамга алып чыга.

Коткаручылар янгынны тиз арада сүндерә. Хәзер ут чыгу сәбәбен ачыклыйлар, диелгән әлеге хәбәрдә.