15 яшьлек малай әнисенең джибына исерек иптәшләрен төяп, шәһәр урамында машиналар бәрдереп йөргән — видео

Санкт-Петербург өлкәсендәге Выборг шәһәрендә 15 яшьлек Александр М. бераз салып алган һәм әнисенең Toyota Land Cruiser Prado машинасына утырып чыгып киткән. Ул иптәшләрен төяп, төнге шәһәр буйлап йөргән. ЮХИДИ инспекторлары бу машинаны туктатыр өчен корал кулланырга мәҗбүр булган. Бу турыда «Вести» каналы хәбәр итте.

15 яшьлек үсмернең машинада йөргәндәге «батырлыкларын» видео күзәтү камералары төшереп алган. Ул полиция машинасыннан качып барган, узышкан. Каршыга килүче җиңел машинаны бәрдергән. Шуннан соң ул кабат ДПС машинасына килеп кергән.

Вакыйга әле моның белән генә бетми: «оста» йөртүче Гагарин урамындагы тукталышны җимереп китә. Светорфорның кызыл төсенә берничә тапкыр уза.

Полиция хезмәткәрләре табель коралы кулланырга мәҗбүр була. Атканнан соң гына Land Cruiser юл кырыена барып туктый.

Машина руле артында 15 яшьлек Александр М., салонда тагын ике кыз, бер мәктәп укучысы утыра. Балалар барысы да исерек була. Бу малай әнисенең машинасын моңа кадәр алып чыгып киткәләгән. Аны әти-әнисе белән мәктәпкә утызлап тапкыр чакыртканнар инде. Бала исерек кичәләр оештырган, мәктәпкә йөрүдән баш тарткан, диелгән әлеге хәбәрдә.

Малайга, аның әти-әнисенә нинди җәза бирелгәне бу хәбәрдә әйтелми.