Казан янындагы Бима бистәсендә 142 килограммлы кабак үстергәннәр. Уңган хуҗабикә Елена Фирсова белдергәнчә, яшелчә көненә 5 килограммга кадәр арта. Мондый гигант яшелчә үстерү өчен 3 ай тырышырга туры килгән. Бу хакта «Татарстан24» сайтында хәбәр ителә.
Якынча исәпләүләр буенча, бүгенге көндә кабакның авырлыгы 150 килограммнан арткан булырга мөмкин. Аны химик ашламалар кертмичә үстергәннәр. Әлегә кабак үсүен дәвам итә һәм күршеләр игътибарын җәлеп итеп тора.
Еленаның гаиләсе кабак согын ярата икән, шуңа күрә галәмәт зур кабактан сок ясарга уйлыйлар. Аннан 140 литрга якын сок чыгарга тиеш, дип исәплиләр, диелгән хәбәрдә.
