Мәскәүдә 14 яшьлек кыз бала вируска каршы дарулардан агуланып, аздан гына үлми калган. Кыз аларны ОРВИ сезонында чирләмәс өчен эчкән, дип яза strana-live.ru сайты.
«SHOT»ка билгеле булганча, яшүсмерне «ашыгыч ярдәм» машинасында хастаханәгә алып киткәннәр һәм «вируска каршы препаратлар белән көчле агулану» диагнозы куйганнар. Укучы кызның ашказанын вакытында юдырганнар. Хәзер аның гомеренә куркыныч янамый. Кызның күпме дару эчкәне ачыклана.
Кызның әтисе даруларның кызының бүлмәсендә торганын сөйләгән. Ул аларны еш – авырый башлаганын сизгәч тә эчә торган булган, ә кайвакыт профилактика өчен дә эчкән. Әти-әнисе моның бернинди начарлыгын да күрмәгән. Полиция тикшерү уздыра.