13 пассажир утырган автобус юл читенә ауган: видеорегистратор кадрлары

Башкортстанда унөч пассажир утырган автобус юл һәлакәтенә очраган. Ул юл кырыена төшеп киткән һәм ян кырына ауган. Шушы аварияне тудырган «Нива» машинасын эзлиләр. Бу турыда «Башкортстан» телевидениесе хәбәр итте.

22 гыйнварда Стәрлетамак районындагы юлда авария була. Пассажирлар утырган автобус кюветка төшеп китә. Автобус салонында йөртүче һәм тагын унөч кеше була. Бәхеткә, беркем дә зыян күрми. 

Бу автобус Стәрлетамактан Чаллыга килә торган булган. 

«Нива Шевроле» машинасы куркыныч маневр ясау аркасында, автобус шушы авариягә очраган. Бу мизгелне шаһит булган кеше машинасындагы видеорегистратор камерасы  төшереп барган. «Нива» каршы як полосага чыккан һәм автобус йөртүчене трассадан чыгарга мәҗбүр иткән, диелгән әлеге хәбәрдә. 

«Юлдан килә торган «Нива» машинасы фураны узарга теләде. Ул каршы як полосага чыгып, автобуска кара-каршы китте. Автобус йөртүче, «Нива»ны бәрдермәс өчен, уңгарак чыкты һәм автобус кюветка төште. «Нива» авария урыныннан китеп барды», — дип язган шаһит Дмитрий Ш.

 Видео: vk.com / Стерлитамак Дтп