Иркутск өлкәсендә 34 яшьлек хатынның 12 яшьлек улын ашатмыйча үтерүдә шикләнәләр. Бу турыда өлкә буенча Тикшерү идарәсенә сылтама белән РЕН ТВ хәбәр итте.
Ябыгып беткән баланы хастаханәгә китергәндә, анда дистрофия һәм башка авыру билгеләре була. Аны реанимациягә салалар. Малай 5 августта үлә.
Тикшерү версиясе буенча, әни кеше баласын озак вакытлар дәваламый, аны ашатуны тәэмин итми. Хатынны тоткарлаганнар, хәзер ул сак астында.
34 яшьлек хатынга карата җинаять эше «Ярдәмгә мохтаҗ халәттәге баланы үтерү» һәм «Балигъ булмаган баланы тәрбияләү вазыйфаларын башкармау» маддәләре буенча ачылган, диелә хәбәрдә.