12 яшьлек малай энергетик эчкәннән соң инсульт хәлендә калган. Аның йөзе чалшайган һәм тәне оеган.
«SHOT» телеграм-каналы мәгълүматлары буенча, Свердловск өлкәсендә яшәүче малай 2 шешә энергетик эчкән. Шуннан соң ул берничә төн йоклый алмаган. Малайның башы бик авырта башлый, гәүдәсенең яртысы оеган. Баланы район хастаханәсенә алып барганнар. Табиблар аңа «инсульт алды халәте» диагнозы куйган.
Өлкәнең Сәламәтлек саклау министрлыгында сөйләүләренчә, табиблар баланың организмын чистарткан, хәле яхшыргач, аны өенә чыгарганнар.
Балаларның нерв системасы ныгып бетмәгән була, шуңа күрә энергетик эчемлекләрдән нинди тәэсир буласын белеп булмый, дип кисәтә табиблар.
Россиядә балигъ булмаган балаларга энергетиклар сатуны тыя торган закон да имзаладылар. Ул 2025 елның 1 мартыннан үз көченә керә.