Һиндстан табиблары бер хатынның эченнән кайчы алган. Ул гел эче авыртуга зарланган. Моның сәбәбе 12 ел узгач кына ачыкланган. Бу турыда РЕН ТВ яза.
12 ел элек бу хатынга сукыр эчәгенә операция ясаганнар. Шул чакта табиблар бу хатынның эчендә хирург кайчысын онытып калдырган.
Операция 2012 елда Ганток шәһәрендәге клиникада була. Шуннан соң хатынның эче авырта торган булып кала. Хатын табибларга берничә тапкыр мөрәҗәгать итә, ләкин аңа төрле дарулар гына бирәләр. Ә авырту басылмый. Рентген ясагач кына, табиблар авырту сәбәбен аңлап ала.
Тикшерү нәтиҗәләрен күргәч, хирурглар хатынга ашыгыч рәвештә операция ясап, эчтәге кайчыны алалар. Хәзер бу хатын терелә башлаган. Әлеге хәбәр биредә яшәүчеләрнең ачуын чыгарган. Халык гаеплеләрне җәзага тартуны таләп итә. Тикшерү бара, диелә хәбәрдә.