11 яшьлек малай мәктәпкә барышлый югалган
Бала бер ел чамасы яңа гаиләдә яшәгән.
Пермь өлкәсендәге Березники шәһәрендә 11 яшьлек бала югалган. 24 декабрьдә көндезге бердә Дима Л. исемле малай мәктәпкә чыгып киткән. Ләкин бала мәктәптә күренмәгән һәм шуннан бирле аның хәбәре дә юк. Бу турыда җирле басма язды.
Малай өйгә кайтмагач, аның опекуннары чаң сугарга тотынган. Алар полициягә гариза язган.
«Бала югалу турында гариза кичә килде. Аны эзләү эшләре бара», — дип аңлатканнар Пермь өлкәсе буенча Эчке эшләр министрлыгы матбугат хезмәтендә.
Мәктәптә укучы малайның абыйсы сүзләренчә, Дима моңа кадәр югалып йөрмәгән. Ул яңа гаиләдә бер ел чамасы яши.
«Без Дима белән төрле гаиләләрдә яшибез. Кичә ул мәктәпкә китте, тик әйләнеп кайтмады. Моңа кадәр андый хәл булганы юк иде. Аның өйдә кунмый калганы да юк. Яңа гаилә Димага ошый иде. Ул беркем белән дә талашмады», — дип сөйләгән Диманың туган Михаил.