Мисырда хирурглар 11 көнлек кызның эченнән игезәк-паразитны кисеп алган. Бу хакта Need To Know материалында хәбәр ителә, дип яза «Рен-ТВ».
«11 көнлек баланың эче үсә башлагач, аны хастаханәгә алып килгәннәр», – диелгән мәкаләдә.
Табиблар сабыйның бавыры янында кечкенә төер тапкан. Объектта деформацияләнгән кабыргаларга, умыртка сөякләренә һәм оча сөякләренә охшаган скелет кисәкләре булуы ачыкланган.
Баланың эчендәге объект кызның бер күкәйле игезәге булып чыккан. Ул сабыйның артериясе аша тукланган һәм үскән. Табиблар, кызның эчен кисеп җибәргәч, ике кулы, кендеге һәм эчәклеге булган майлы капчыкны хәтерләткән нәрсәгә тап булган.
Хирурглар объектны кисеп алган. Бүгенге көндә сабый сау-сәламәт, аны өйгә кайтарып җибәргәннәр.