Екатеринбургта 2026 елгы Халыкара яшьләр фестивалендә катнашучы чит ил вәкилләре Татарстан Республикасының Үзәк сайлау комиссиясендә булды һәм аның рәисе Андрей Кондратьев белән очрашты. Очрашу яшь лидерларны республиканың иҗтимагый, мәдәни, мәгариф һәм технологик тормышы белән таныштыра торган төбәк программасының бер өлеше булды.
Татарстан Үзәк сайлау комиссиясенә 11 дәүләт: Индонезия, Малайзия, Аргентина, Үзбәкстан, Ливан, Көньяк Африка Республикасы, Мексика, Мадагаскар, Пакыстан, Оман һәм Мисыр вәкилләре килде.
Катнашучыларга өч көнлек сайлау үзенчәлекләре, территориаль һәм участок сайлау комиссияләре эше, җәмәгать күзәтүе һәм сайлауларда волонтерлык эше турында сөйләделәр.
Татарстан Үзәк сайлау комиссиясенә сәфәр делегациянең республикадагы бай программасы дәвамы булды. Беренче ике көндә катнашучыларга республиканың яшьләр проектларын, Татарстан мәдәниятен һәм гореф-гадәтләрен тәкъдим иттеләр, кунаклар Казандагы сайлау участокларында һәм Иҗтимагый күзәтчелек үзәгендә булды, күзәтүчеләр һәм волонтерлар эше белән танышты.
«Соңгы көннәрдә бик күп сайлау участокларында булдык, процессның ничек эшләвен, кешеләрнең ничек тавыш бирүен карадык һәм бу бик яхшы тәҗрибә. Россиядә сайлау системасының ничек эшләвен белү минем өчен бик кызыклы булды. Бүген без Татарстан Үзәк сайлау комиссиясе рәисе белән очраштык, сайлау барышының ничек узуы тулырак һәм киләчәктә сайлау системасын үстерү турында планнарны белдек», – дип сөйләде Ливан вәкиле Берха Техзиб Хуссейн.
«Безнең өчен тавыш бирүнең бөтен этаплары ничек оештырылуны күрсәтү генә түгел, ә төрле илләрдән килгән яшьләрнең фикерен ишетү дә мөһим. Мондый очрашулар ачык диалог, тәҗрибә уртаклашу һәм яңа уртак инициативалар өчен җирлек булдыра. Татарстанның сайлау системасы һәм яшьләр проектлары белән танышу төбәк программасының файдалы өлеше булыр, дип ышанам», – диде Андрей Кондратьев.
Екатеринбургта 2026 елгы Халыкара яшьләр фестиваленең төбәк программасы төрле дәүләт вәкилләрен җанлы аралашу, уртак проект эше һәм Татарстанның төп иҗтимагый, мәдәни, мәгариф һәм технологик мәйданчыклары белән таныштыруны берләштерә.