10 айлык кыз бала, яшь шәфкать туташы гаебе аркасында, әнисе кулында җан биргән

Кубаньда 10 айлык кыз бала шәфкать туташы гаебе белән вафат булган. Бу хакта «Комсомольская правда» сайты яза.

Фаҗига 2022 елның февралендә Темрюкта була. Әни кеше 10 айлык кызы белән хастаханәгә килә, баланың тәнендә термик пешү була. Балага капельница куялар. Төнлә шәфкать туташы катетерны юдырырга килә, әмма, ялгыш, башка төрле эремә сала. Бала әнисенең кулларында берничә секунд эчендә вафат була.

«Темрюк район үзәк хастаханәсендә эшләүче 25 яшьлек шәфкать туташы һөнәри бурычларын тиешенчә башкармау, саксызлык аркасында кеше үтерүдә гаепләнә», – диелә Краснодар крае буенча Тикшерү комитеты хәбәрендә.

Тикшерүчеләр әйтүенчә, 13 февральгә каршы төндә шәфкать туташы үзенең һөнәри бурычларына ваемсыз караган һәм, катетерны юдырганда, кечкенә балага тиешенчә медицина ярдәме күрсәтмәгән.

«Шәфкать туташы инфузион эремә сала торган системаны 10 айлык баланың венасына куелган катетердан ала, шуннан соң катетерны юдыра. Тик, «Гепарин» препараты урынына, ялгышып, «Тиопентал натрия» эремәсе белән юдыра», – дигәннәр төбәк прокуратурасында.

Баланың хәле бер мизгел эчендә начарлана, реанимация бригадасы тиешле ярдәм күрсәтә, тик кызны коткарып кала алмыйлар.

25 яшьлек шәфкать туташының милкенә, исәп-хисап счетларына һәм машинасына арест салына. Ә эшне судка тапшырганнар, шәфкать туташын 3 елга кадәр ирегеннән мәхрүм итәргә мөмкиннәр.