1 сентябрь – укучылар өчен генә түгел, укытучылар өчен дә дулкынландыргыч бәйрәм. Ә бәйрәмгә гадәттә буш кул белән килмиләр. Укытучыларга нәрсә бүләк итеп була? Бу хакта «Газета.Ru» яза.
Укытучыларга бүләкләр турында аерым закон юк, ләкин гомуми кагыйдәләр бар. РФ Гражданлык кодексының 575 нче маддәсе мәгариф учреждениеләре хезмәткәрләренә кыйммәтле бүләкләр бирүне тыя. Лимит – 3 мең сум, аннан артыгы ярамый. Бу суммадан кыйммәтрәк бүләк ришвәт буларак бәяләнергә мөмкин.
Кайвакыт, укытучыларга чәчәкләр һәм канцелярия товарлары гына бүләк итәргә рөхсәт ителә, дигән сүзләрне ишетергә мөмкин. Бу алай түгел: мондый катгый чикләүләр педагоглар өчен түгел, ә түрәләр өчен гамәлдә. Ата-аналар теләсә нинди бүләк сайлый ала – иң мөһиме, бәясе рөхсәт ителгән суммадан артмаска тиеш.
Шул ук вакытта закон бүләкләр санын чикләми. Берничә әйбер бүләк итәргә була, ләкин аларның һәрберсе 3 мең сумнан артмаска тиеш. Кагыйдә бөтен сыйныфтан алынган бүләкләргә дә кагыла.
Укытучыларга бүләк вариантларына килгәндә, сыйфатлы һәм кызыклы канцелярия товарлары, чүлмәккә утыртылган чәчәкләр, өстәл лампасы, китап кибетенә сертификат бирергә була.
Кайвакыт иң кыйммәтле бүләк – әйбер түгел, ә эмоцияләр булырга мөмкин. Мәсәлән, һәр укучы укытучы турында матур сүзләр язып тутырылган тартма, сыйныфта күңелле мизгелләр төшерелгән фотолар белән плакат, укучылардан видеооткрытка бүләк итәргә мөмкин, диелә хәбәрдә.
