Татарстанда үзеннән күпкә олырак ир-атка кунакка килгән кыз хуҗаның машинасын чәлдергән

Чаллыдагы югары уку йортында укучы 20 яшьлек студент кыз 32 яшьлек ир-ат фатирына кунакка килгән. Хуҗа йокыга киткәч, аның иномаркасын урлаган. Бу турыда «Челнинские известия» сайты хәбәр итте.

20 яшьлек студент кызга карата «Транспорт чарасын хокуксыз куллану» маддәсе буенча җинаять эше ачылган.

Шимбә көнне бу кыз шәхси предприятиедә эшләүче бер ир-атның фатирына кунакка килә. Көндез бераз салып утыргач, ир йокыга китә. Студент кыз исә хуҗаның «Рено Флюенс» машинасының ачкычларын табып ала. Бу кыз подъезд төбендә торган иномарканы алып китә. Студент көпә-көндез чит кеше машинасында шәһәр буйлап җилдерә. Зур булмаган авариягә очрый. Җимерелгән машинаны кире урынына алып кайтып куя.

Машина хуҗасы берничә көн узгач кына бу вакыйга турында белеп ала. Ул машинасын урлау турында полициягә гариза яза. Полиция хезмәткәрләре студент кызны тоткарлый.

Икенче курста укучы студент кыз Чаллыга Башкортстаннан килгән һәм тулай торакта яши. Закон буенча, аңа кимендә 120 мең сум штраф яный. Шулай ук аны биш елга ирегеннән мәхрүм итүләре дә ихтимал.