9 яшьлек малай сукыр эчәгенә операциядән соң үлгән
Ульяновск өлкәсенең клиник хастаханәсендә бала үлүе уңаеннан тикшерү бара.
"Медицина в Ульяновске" төркемендә бу бала Барыш район хастаханәсенә 10 сентябрьдә үк китерелгән дип язалар. Малайның сукыр эчәген алалар, әмма аның хәле авырая, ул коса башлый, температурасы 39 градустан төшми. Баланы чәршәмбе көнне ашыгыч ярдәм машинасында өлкә хастаханәсенә китерәләр. Җомга төнендә аңа кабат операция ясала. Әмма аны коткарып кала алмыйлар. Өлкә сәламәтлек саклау министрлыгы фаразлавынча, үлем сәбәбе абдоминаль сепсис - ялкынсынган сукыр эчәгеннән канга инфекция эләгү.Хәзерге вакытта суд-медицина экспертизасы үткәрелә. Малайның үлемендә табибларның гаебе бармы-юкмы икәнлеге ачыклана. Аның нәтиҗәләре буенча Тикшерү комитеты җинаять эше ачу-ачмауны хәл итәчәк. Сәламәтлек саклау министры Сергей Панченко баланың якыннарына кайгы уртаклашу сүзләрен җиткергән.