Камил хәзрәт Сәмигуллин Казанда төзеләчәк Җәмигъ мәчете турында: "Мондый дәрәҗәдәге архитектура бинасы шәһәр үзәгендә урнашырга тиеш"

12 ноябрь 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Фото: Салават Камалетдинов, Расих Фәсхетдинов
Казанда Җәмигъ мәчетен салыначак. Бу хакта Казан Кремле рәсми вәкиле Лилия Галимова хәбәр итте. Аның әлегә төгәл урыны билгеле түгел. Татарстан мөфтие Камил хәзрәт Сәмигуллин "Татар-информ"га интервьюсында Җәмигъ мәчете хакында күзаллауларын җиткерде. Мәчет нинди булырга тиеш, мөфти аны шәһәрнең кайсы урынында күрә?

- Камил хәзрәт, Казанда Җәмигъ мәчете ни дәрәҗәдә кирәк? Казанда мәчет җитмәү проблемасы ни дәрәҗәдә актуаль?

- Казанда Җәмигъ мәчете төзелеше мәсьәләсе күптән үзен сиздерә. Безнең исәпләвебез буенча, җомга, Корбан һәм Ураза бәйрәмнәре көннәрендә укыла торган намазларда башкалабыз мәчетләрендә 33 мең мөселман катнаша. Казанда шуларның өчтән бер өлешен булса да сыйдырлык мәчет әлегә юк. Аларның уртача сыйдырышлыгы 300 кешене тәшкил итә. Иң зурысы – “Кол Шәриф”. Башкаланың йөзек кашы, Татарстанда ислам үсешенең символы, аннан башка республиканы күз алдына китерерлек түгел. Әмма урнашкан урыны уңайсыз. Әйе, шәһәр үзәгендә, әмма Кремль, музей-тыюлык эчендә. 

Галиев һәм Мәрҗани мәчетләре дә үзәктә, ләкин аларның сыйдырышлыгы бик чикле. Ел саен Татарстан Президенты Рөстәм Нургали улы Миңнеханов бәйрәмнәр сөенечен өммәттәшләребез белән бүлешә һәм кардәшләребез белән бергә гыйбадәт кыла. Мөселманнар да үз чиратында нәкъ ул килгән мәчеткә эләгергә тырыша, ләкин барлык теләүчеләрне сыйдырып булмый. Нәтиҗәдә халык урамда гает намазын укырга мәҗбүр була.

- Җәмигъ мәчете нинди булырга тиеш дип уйлыйсыз? Ул ничә урынга исәпләнгән булса, яхшы булачак?

- Җәмигъ мәчете ким дигәндә ун мең кешене сыйдыра алса, яхшы булыр иде. Билгеле, мәһабәт, таң калдырырлык архитектуралы булуы мөһим – анда бит гает вәгазьләре һәм намазлары укылачак, бәйрәм рухы сизелергә тиеш! Бинасын гаетләр арасында башка дини, гыйльми, фәнни, мәдәни чаралар өчен дә файдалану мөмкинлеген дә күздә тотарга кирәк, минемчә.

- Зур мәчетләр төзелеше вакытында фонд төзелә, Җәмигъ мәчетнең төзелеше дә шул схема буенча булыр дип саныйсызмы?

- Миңа калса, бу изге эштә катнашырга теләүчеләр өчен бөтен мөмкинлекләрне дә оештырырга кирәк: кемдер акчаны китереп бирүне кулай күрә, кемгәдер интернет аша күчерү уңайлы... Ә кемдер, бәлки, үз хезмәтен кертәсе килә торгандыр. Ничек кенә булмасын, Пәйгамбәребез Мөхәммәд салләллаһу галәйһи вә сәлләм бер хәдистә болай ди: “Кем Аллаһы ризалыгы өчен мәчет төзесә яки төзелештә катнашса, Аллаһы Тәгалә бу кешегә ахирәттә бер сарай бүләк итәр”. Әлбәттә, чараларны тәртипле рәвештә туплау өчен бер фонд булдыру кирәк, дип саныйм.

- Казанның кайбер районнарында мәчетләр бөтенләй юк. Җәмигъ мәчете шәһәрнең кайсы җирендә булырга тиеш дип саныйсыз?

- Мәчет төзелеше җәмгыятьтә низагъ китереп чыгарырга тиеш түгел, мәчет салу – куаныч китерергә тиеш, ул бит Аллаһ йорты. Шуңа күрә барыбызны да канәгатьләндерерлек ниндидер бер уртаклык табарга кирәк. Миңа калса, мондый дәрәҗәдәге архитектура бинасы шәһәр үзәгендә урнашырга тиеш.

- Илнең кайбер өлкәләрендә мәчет салу халыкта каршылык тудыра. Мәчет салу радикаль агымнарга каршы көрәштә нинди роль уйный?

- Мәчеткә кеше намаз укырга гына килми бит. Мөселманнар монда гыйлем өйрәнергә, башкалар белән аралашу өчен дә килә. Республика мәчетләренең күбесендә төрле чаралар уздырыла: балалар өчен дисеңме, өлкәннәр өченме. Хәтта татар телен өйрәтү дә мәчетләрдә башкарыла! Мәктәп укучыларының ялларын оештыру, ифтарлар, очрашулар, яшьләр өчен бәхәс клублары, имамнар җыелышлары, мәҗлесләр, тәрбияви чаралар – болар барысы да мәчетләрдә уздырыла. Халыкны әхлакый тәрбияләү, мәҗбүриләмичә үз ихтыярлары белән динебезгә тарту буенча эшчәнлекне алып баруда мәчетләргә йөкләнгән. 

Ягъни, мәчет ул намаз уку урыны гына түгел, ул кешегә әхлак тәрбиясе бирү үзәге дә. Шулай булгач, радикаль агымнарга каршы көрәштә мәчетләр иң мөһим рольләрнең берсен уйный.


  Без Инстаграмда

Фикерләр








Дин

“Гөнаһлар кичерелә, догалар кабул була“. Рәгаиб кичәсенең әһәмияте нәрсәдә?

Раҗәб аеның ике күркәм кичәсе бар: Рәгаиб һәм Мигъраҗ кичәләре. Рәгаиб кичәсе Раҗәб аеның пәнҗешәмбедән беренче җомгасына каршы киче. Быел ул 7 март киченә туры килә. Бу Мөхәммәт (с.г.в.)нең әтисе Габдуллаһ хәзрәт белән әнисе Әминәнең никахлары булган көн. Рәгаиб - Аллаһ гафу вә рәхмәтен колларына күбрәк иттереп биргән, догалар кабул ителә торган кичә. 

Җәмгыять

“Аллаһ моңарчы саклады, монысында да сакласын иде". Әмир авылы халкы мәчет түбәсеннән кар төшергәндә егылып имгәнгән имам исәнлегенә догада

Бәла аяк астында, диләр. Чирмешән районы Әмир авылы имамы намазга киткән җиреннән уңышсыз егылып төшеп, хастаханәгә эләгә. Башкаларга кар төшә күрмәсен дип, мәчеткә керү юлында ясалган козерыктан кар төшерәм дип менгән җиреннән баскычтан аягы таеп китә. Үз туган көнендә – 1 февральдә шундый бәхетсезлеккә тарый. Бүген 1941 елгы Люцир хаҗи Зыятдинов Әлмәт хастаханәсендә табиблар кулында.

Дин

Хәрәм ризыклар исемлеге арта: гематоген, сыр, мармелад, авылдан килгән кайбер итләр...

Хәләл һәм хәрәм арасындагы кылдай нечкә ара ничек бүленә? Кибеттән ризык алганда нәрсәләрне белеп торырга кирәк? Хәрәм ризыкның зыяны нидә? Бу хакта “Болгар радиосы”нда Фаил Гыймадовның “Хак дин” тапшыруында ТР Диния Нәзарәтенең “Хәләл” комитеты җитәкчесе Ирек хәзрәт Җиһаншин сөйләде. Тапшыру дәвамында яңгыраган фикерләрнең иң мөһимнәрен “сөзеп”, “Интертат” укучыларына тәкъдим итәбез.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла