Алдану: Башкортстаннан 100гә якын хаҗи Мәккәгә оча алмаган

13 август 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Миләүшә ЛАТЫЙПОВА
"Хаҗ-фонд" туристлар оешмасыннан алданган хаҗиләр Согуд Гарәбстанына бара алмау сәбәпле, акчаларын кире кайтарыр өчен суд юлына басарга җыена.
Башкортстаннан 98 хаҗи 4 нче августта Мәккәгә очып китә алмады. Яр Чаллыда теркәлгән "Хаҗ-фонд" оешмасы мөселманнарның изге җиренә барыр өчен туристларга квота таба алмаган. Күрше республикада яшәүче хаҗиләр путевкаларны ярты ел элек Уфада ачылган офиста сатып алган булган. Юлламаның хакы - 95 меңнән алып 190 меңгә кадәр. Татарстан республикасының туризм буенча комитеты элегрәк хәбәр итүенчә, АҖО "Хаҗ-фонд" компаниясе Согуд Гарәбстанына җибәрүче туристик операторлар исемлегеннән алынган һәм бу елны Мәккәгә хаҗ кылуны оештыру буенча аккредитациядән мәхрүм ителгән. 
 
Башкортстаннан 40ка якын кеше, изге җиргә оча алмау сәбәпле, шикаять язган. Аларның күбесе оешманы судка бирергә җыена.

"Җитәкчелек, миңа җавап бирәсе урынга, тавыш күтәреп, мыскыллы сүзләр әйтте"

Юлламаны сатып алучыларның берсе - Лилия, путевканы әнисенә март аенда 150 меңгә сатып алган булган. Мәккәгә баруның кичектерелүен һәм акчаларның да кире кайтарылмаячагын белгәч, Лилия Уфада урнашкан офиска бара. Ләкин җавап аласы урынга, судка барыр өчен янә бер сәбәпкә юлыга. 

 
 
- "Хаҗ-фонд" оешмасының Уфадагы офисында булган җитәкчелек миңа җавап бирәсе урынга, тавыш күтәреп, мыскыллы сүзләр әйтте. Үзем белән диктофон алган идем. Бу ямьсез сузләрне яздырып алдым. Судта язманы тыңлатачакмын, - дип сөйләде Лилия.
 
Әлеге вакытта Лилия судка ике гариза язарга җыена. Берсе - үзен мыскыл иткән өчен, икенчесе - алдаганнары өчен. Лилия әнисен Хаҗга җибәрү теләгеннән кире кайтмавын әйтте, ул икенче елга планлаштыра. Лилия хәзер туристик компанияләрне җентекләп тикшереп сайлаячагын искәртә.

Башкортстанның икенче хаҗие Азат Мәккәгә хәләл җефете һәм әнисе белән үзенең туен уздырганнан соң барырга ниятләгән булган. Ярты ел элек 580 мең сумга 3 юллама сатып алган. Азат әлеге турфирмага танышлары киңәше буенча мөрәҗәгать итүен әйтте.

- "Хаҗ-фондка" ярты ел элек түләп куеп, бүгенгә кадәр Согуд Гарәбстанында бер урын да бронировать ителмәгәнен белгәч, шаккаттым. Мине бугенге көнгә кадәр акчаны кире кайтарачакбыз дип ышандырырга тырышалар. Әмма мин катгый рәвештә суд юлына басарга ниятлим, - дип белдерде Азат. 

"Хаҗ-фонд" аккредитация үтмәгән

Алданган хаҗиләрнең тагын бер вәкиле Булат Мостафин әйтүенчә , моңа кадәр "Хаҗ-фонд" компаниясе Русия Мөселманнарының үзәк Диния нәзарәте белән эшләгән. Турфирмага нәкъ нәзарәттән квоталар бүлеп бирелгән. Ләкин бу елның башында Тәлгать Таҗетдин җитәкчелегендәге оешма "Хаҗ-фонд" фирмасы белән төзелгән килешүне тарката һәм үзенең "Болгар-тур" дип исемләнгән компаниясен ача. 
 
Бу елның февраль аенда Русиянең ҮДМН сайтында "2017-нче елның хаҗы начар тәмамлануы сәбәпле, "Хаҗ-фонд" туроператоры аккредитация үтмәде", дигән мәгълүмат бирелде. Үзәк дини мөселманнар нәзарәтеннән алынган мәгълүмат буенча, килешүне таркатканнан соң "Хаҗ-фонд"компаниясе Уфада офис ача һәм нәзарәт эмблемасы белән визиткалар тарата.

"Хаҗ-фонд"ка каршы берәр нәрсә эшләргә җыенасызмы?", дигән сорауга Русия Мөселманнарының үзәк Диния нәзарәтендә җавап бирмәделәр. 
 
Булат Мостафин алданган Башкортстан хаҗиләренең берничәсе акчаны кире кайтара алган, дип белдерде.
 
"Мәккәгә китүчеләрнең күпчелеге - олы яшьтәге кешеләр. Шундый четерекле хәл туган очракта, алар ничек һәм нәрсә эшләргә икәнен белеп бетермиләр яки суд юлында йөрүдән куркалар", - ди Булат Мостафин. Хаҗиләрнең бер өлеше исә полиция бүлегенә гариза язган, әмма ләкин Башкортстан эчке эшләр министрылыгы идарәсендә "Татар-информ" хәбәрчесенә бу хәл турында белмәүләрен әйттеләр. Югыйсә Башкортстан хаҗиләренең Мәккәгә оча алмаулары узган атнада ук билгеле булды. Башкортстан прокуратурасында бу проблема белән таныш булулары ачыкланды, тулы мәгълүмат алу өчен Башкортстанның ЭЭМИМ яки Роспотребнадзор идарәләренә мөрәҗәгать итергә киңәш иттеләр.  

Алданган хаҗиләргә 3 юл тәкъдим ителә

 "Татар-информ" хәбәрчесе "Хаҗ-фонд" компаниясе вәкиле Альбина Исмәгыйлева белән сөйләште. Ул хаҗиләргә 3 юл тәкъдим ителәчәген әйтте.
 
- Башка туроператор белән Гомрәгә бару.
 
- Ел дәвамында акчаны кире кайтару.
 
- Киләсе елда Хаҗга бару.
 
Альбина Исмәгыйлева башка сорауларга җавап бирүдән баш тартты . Аның әйтүенчә, калган мәгълүматны җитәкчелек бирергә тиеш. 
 
Өстәп шуны әйтергә була: былтыр 2017 нче елда охшаш хәл булды - "Урал-сервис" компаниясе аркасында хаҗиләр Мәккәгә бара алмады. Әлеге вакытта "Урал-сервис"ка җинаять эше ачылган. Аны Җинять кодексының 59 нчы  "Караклык" маддәсе буенча алып баралар. 
 
"Татар-информ" хәбәр итүенчә, хаҗиләр проблемасы кабатлану сәбәпле, киләсе елда Русиядә Хаҗга баруны оештырчы туроператорлар өчен махсус сертификация булдыру ниятләнә. Русиянең "Хаҗ миссиясе" оешмасы бу алым хаҗиләрне ялганнан яклау чарасы булып торыр дип исәпли. Сертификатта махсус билгеләмәләр, саннар һәм квоталар хакында мәгълүмат булачак.


Фикерләр








Дин

Мөселманнар көзге уңыштан өлеш чыгара: сары чирен йоктырган 8 балалы әни, картлар йорты һәм ДЦПга дучар балалар

Мул уңышның бәрәкәте – гошер сәдакасында. Йөрәкләре мәрхәмәт белән тулы кешеләр бакчаларыннан җыеп алган уңыштан гарип-горабаларга, күп балалы һәм аз керемле гаиләләргә, картлар йортларына, мәдрәсәләргә шул уңайдан өлеш чыгара. “Татар-информ” мәгълүмат агентлыгы хәбәрчесе дә, “Зәкят” хәйрия фондының гошер сәдакасын тарату чарасында катнашып, рухи яктан баеп кайтты.

Дин

Мөслим башлыгы Рамил Муллин - хаҗда: "Аллаһ рәхмәте белән шушы сәфәрләрне үттек"

Бүген, ягъни 31 августта, Мәскәү вакыты белән 14.10 сәгатьтә "Казан" Халыкара аэропортына 247 кешедән торган беренче хаҗилар төркеме кайта. Аларны Татарстан мөфтие Камил хәзрәт Сәмигуллин каршы алачак. Татарстаннан изге сәфәргә 1800 кеше барды. Алар арасында Мөслим районы башлыгы Рамил Муллин һәм аның тормыш иптәше дә бар иде.

Дин

Рөстәм хәзрәт Хәйруллин: “Гакыйка корбаны итен балта белән чабып турарга ярамый"

Соңгы елларда динебездә тагын бер матур күренеш барлыкка килде. Гаиләдә кыз бала туса – бер,  ир бала туса – ике сарык чала башладылар. Бу – гакыйка корбаны дип атала. Ул бала сау-сәламәт үссен дигән ният белән чалына. Гакыйка корбаны нәрсәне аңлата, аны кем чалырга тиеш, корбан итен ничек бүләргә, аны бала туып ничәнче көндә чалдырырга кирәк? Бу һәм башка сорауларга Казанның “Гаилә” мәчете имам-хатыйбы Рөстәм хәзрәт Хәйруллин җавап бирде.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла