Тракторчы-блогер Василий Иванов: «Авыл кешесе эшләп торса, шәһәр халкы ач калмый»

4 март 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Илгиз ШӘКҮРОВ
Фото: Раушан Хәйруллин, Алиса Иванованың шәхси архивыннан
Шундый заманда яшибез: үзең турында дөньяга җиткерү яки танылу өчен хәзер мөмкинлекләр күп. Мәсәлән, шул ук Интернет. Аның кызык ягы бар: ул танылам дигән максат куймаган кешеләрдән дә йолдыз ясый ала. Кукмара районы Иске Чура авылында яшәүче Василий Иванов шундыйлардан.

Василий Ивановны тарихта беренче тракторчы-блогер дияргә була. Василий − керәшен егете. Интернетта узган елның җәендә таныла башлый. Ул авыл тормышын яктырткан видеолар төшереп, үзенең Инстаграм аккаунтына урнаштыра. Хәзер тракторчы-блогерның 14 мең язылучысы бар.

«Интернетны сүндереп куям»

− Инстаграмны хатын көйләп биргән иде. Башта фото-видеоларны ул урнаштырды. Аннары үзем өйрәндем. Шулай да Инстаграмның бөтен нечкәлекләрен әле һаман белеп бетермим. Ничектер үзеннән-үзе килеп чыкты бу. Видеолар куйган саен кешеләр язылды, лайклар артты. Блогер булам дигән максат юк иде, - ди Василий, бу шөгыленең ничек башлануын сорагач.

Үзе блогер булганчы блогерларны ишетеп кенә белгән. Хәзер «коллега»ларны карап барырга тырышам, ди. Василий Интернет өчен көнгә ике сәгать вакытын гына сарыф итә: иртән мал карап кергәч чәй эчкәндә, төшке аш вакытында һәм кич эштән кайткач.

Тракторчы-блогерның язылучылары арасында эше юк, шуңа гел интернетта утыра дип уйлаучылар бар икән.

− Гадәттә интернетны сүндереп куям. Чөнки бик күп хатлар язалар. Көненә 100дән дә ким булмый. Көн буе аларга җавап биреп утырсаң, бер эш эшли алмыйсың. Шулай да бер хатны да җавапсыз калдырмаска тырышам.

− Нәрсәләр язалар соң?

− Иң еш бирелгән сорау: «Ничек блогер булырга?» Ләкин мин үзем белмәгән әйберне кешегә өйрәтә алмыйм инде. Шулай ук техника турында бик күп сораулар килә. Бу әйберне ничек төзәтергә, монысын ничек эшләргә дигән...

Якыннары, хезмәттәшләре, авылдашлары блогерның бу шөгыленә хөрмәт белән карый. Үзең белән бергә безне дә танытасың диләр икән. Василийның язылучылары арасында танылган кешеләр дә бар. Мәсәлән, җырчылар Ришат Төхвәтуллин һәм Илназ Гарипов. Кайвакыт Ришат Төхвәтуллин белән бергә Василий Инстаграмда туры эфирга да чыга.

«Авыл кешесе эшләп торса, шәһәр халкы ач калмый»

Василий үз авылында 9 еллык мәктәпне тәмамлый. Аннан соң Янил училищесында (хәзерге Кукмара аграр көллияте - авт.) укый. Армиягә барып кайта һәм менә 20 ел техникада эшли. Беларусь тракторыннан башлап К-700 кадәр эшләп чыккан. Йөртеп һәм ремонтлап карамаган техникасы калмаган аның.

− Авыл кешесе эшләп торса, шәһәр халкы ач калмый, - ди блогер. Василий хәзерге көндә Вахит авылы хуҗалыгында механизатор булып эшли. Бүген анда тулы көчкә язгы чәчүгә әзерләнәләр.

Василий Иванов исемле блогерны Татарстанның Премьер министры урынбасары, авыл хуҗалыгы һәм азык-төлек министры Марат Әхмәтов та белә. Күптән түгел Марат Әхмәтов Василийга рәхмәт хаты һәм министр сәгате тапшырган. Премьер министр урынбасары тракторчы-блогерның авыл тормышын, хуҗалык эшчәнлеген матур яктан күрсәтүен ошаткан.

− Бу егетнең тормышка, авыл җиренә, хезмәтенә гашыйк булуы күренеп тора. Хәтта тракторның тормозын карау турында да матур итеп видео төшергән. Башка берәү булса майга катып беткән кара киемдә, ата-анасын һәм җиде буынын искә төшерә-төшерә карар иде ул тормозны. Ә Василий аны бер матур гамәл итеп күрсәткән, - дип сөйли Марат Әхмәтов блогерның Инстаграмында урнаштырылган видеода.

− Министр сәгате хәзер кулдан төшми дә. Мондый сәгать бөтен кешегә дә эләкми әле, - ди Василий.

«Урлап алып кайтты»

Тракторчы-блогер Инстаграмда шәхси тормышын күрсәтми:

− Аны нәрсәгә бөтен дөньяга күрсәтергә инде? Гаилә янында мин үзем дә аз торам. Җәй көннәрендә бөтенләй дә кайтып кергән юк. Күбрәк трактор янында булгач тракторны төшерәм инде, - ди ул.

Хатыны Алиса белән ике бала үстерәләр. Улларына - 10, кызларына 6 яшь. Гадәттә интервьюдан баш тарта торган булса да, Алиса Иванова безнең белән сөйләште:

− Василий яхшы гаилә башлыгы, балаларга әйбәт әти. Һәр гаиләдәге кебек төрле вакытлар була инде. Эшләсә күңелен биреп эшли. Техника арасында йөргәндә ашарга да оныта, - диде ул.

Алиса үзе Кукмара кызы. Шулай ук Вахит авылы хуҗалыгында эшли. 10 ел элек Василий аны урлап алып кайткан.

P.S. Киләчәккә планнарын сорагач, Василий хуҗалыкта эшләвен дәвам итәчәген әйтте.

− Бөтен җирдә дә акча өчен эшлиләр бит. Эшемне яратам, акчаны вакытында бирәләр. Эшлисе килгән кешегә бөтен җирдә эш табыла. Авылда да менә дигән итеп яшәп була, - ди тракторчы-блогер.

Әлбәттә Василий Инстаграмнан да югалмаячак. Авыл тормышын ничек бар шулай күрсәтүен дәвам итәчәк. Соңгы арада реклама бирергә теләүчеләр арткан. Әлегә блогерлыкның шул ягын өйрәнәчәкмен, ди Василий.

Посмотреть эту публикацию в Instagram

#сено #снег

Публикация от василий (@vasilijivanov7864)


  Без Инстаграмда

Фикерләр








Авыл

Фишман паркы, ике катлы йортлар һәм ачык капкалар: Кукмараның Вахите - татарның иң бай авылларының берсе

«Там гора, тут гора, уртасында Кукмара» дигән сүзне һаман кабатлап йөрим әле. Кайсы якка карама - тау тау. Үземне Урал тауларына сәяхәт итеп кайткан кешедәй хис итәм. Аннары тагын Кукмара киез итеге, Кукмара шәле, Кукмара табасы дигән нәрсә дә бар бит әле. Данлыклы Вахит авылы, данлыклы Вахит колхозы турында да ишеткән бар иде. Йөз кат тыңлаганчы, бер тапкыр күрүең яхшы диләр бит. Кукмараның гына түгел, Татарстанның да бренды була алырлык Вахит җирлегендә күргәннәремне язып китәргә булдым.

Авыл

Илдус Хатыйпов: Авыл хуҗалыгындагы бөтен проблемалар да хисап булмаганнан

Мал табибы Илдус Хатыйпов “Татар-информ”га интервьюсында бүгенге авыл хуҗалыгына анализ бирде, сөтне ничек арттырырга, ничек итеп ашатырга, авылга кадрларны ничек кайтарырга кирәклеге турында сөйләде.

Авыл

Дамир Фәттахов авыл яшьләренең тәнкыйтен кабул итте: "Әйе, җиренә җиткереп эшләмибез..."

Авыл яшьләренә ни кирәк? Торак, тәҗрибәле фермерлардан остазлык, авылда өч балалы, пособиегә өмет итә алучы әниләрнең яшен 29 дан 35 кә кадәр арттыру, эш башлаучы фермерларга ярдәм, модульле кош абзарлары... Бүген алар шушыларны сорый. Авыл хуҗалыгы һәм азык-төлек министры яшьләр белән эшләү үрнәген күрсәтте, Яшьләр эшләре министры кимчелекләрен танырга мәҗбүр булды.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла