Тарталеткада экзотик кабымлык
Әлмәттә яшәүче Рәдифә Ногмановадан табынга куярга матур һәм тәмле кабымлык рецептын тәкъдим итәбез.
Паста өчен: 2 авокадо, ярты лимон согы, тәменчә тоз. Авокадоны блендерда вакларга һәм башка ингредиентларны салып болгатырга.
Бу массага аз тозлы сөләйман балыгы (лосось) турап салырга мөмкин. Ипигә ягып ашарга да бик тәмле булачак.
Тарталеткага шулай ук мидияләр салырга кирәк булачак. Аларны әзер килеш кибеттән сатып алырга мөмкин. Ә туңдырылган мидияләрне үзегез пешерсәгез арзанга чыгачак.
Хәзер кабымлыкны формалаштырабыз. Тарталеткага авокадо пастасы салырга, өстенә 3 мидия, 1 яшел, 1 кара зәйтүн җимеше куярга.
Мондый кабымлык өстәлне бизәячәк һәм экзотик ризыклар яратучылар күңеленә хуш киләчәк.