Сайлап алынган кызлар рингта "тукмаша": "Без теләсә ничек сугышып йөрмибез"

28 Января 2018

Укылган: 1082 тапкыр

Автор: Фәрит САЛИХОВ
Фото: Салават Камалетдинов
Әлки районында 2012 елдан бирле бокс түгәрәге эшләп килә. Биш ел эчендә Татарстан чемпионы булып танылучылары да, республика җыелма командасына кергән яшь спортчылары да бар. Әлки районының кызлары да рингта уңышлы чыгыш ясый.

Авыр спорт төре

Боксның авыр спорт төре булуын, бигрәк тә кызлар өчен кыенлыклар тудырачагын тренерлары, үзе 2 нче спорт разряды алганчыга кадәр ярышларда катнашкан Ленар Ситдыйков та яшерми. Шуңа да карамастан, Базарлы Матакның «Алинә» спорт комплексында уза торган боксчылар түгәрәгенә кызларның да йөрүенә каршы килә алмаган.


– Җәйге каникулдан соң күнегүләргә кабат җыелгач, олырак сыйныфтагы егетләр бокс белән кызларның да кызыксынулары хакында җиткерде. Шуннан кызлар белән сөйләштек, – дип сөйли Ленар Ситдыйков кызларның бокска тартылуларын искә алып. – Боксның авыр спорт төре булуын аңлатырга тырыштым, имгәнү ихтималы турында да сөйләдем. Хәтта әти-әниләре каршы булса да, кызлар боксны сайлады.

Әти-әниләр димәктән, Ленар Ситдыйков сүзләренчә, аларны кызларының бокс перчаткасы кию теләгенә күндерү җиңел булмаган. "Бердәмлеккә килмәгән вакытлар да булды, хәзер инде аңлап кабул итүләренә рәхмәт кенә әйтәм", - ди тренер.


– Шулай да боксның хатын-кыз спорты булмавын яшермим. Бокс сайлап алынган кызлар өчен генә. Монда һәр кыз килә алмый. Килеп тә үз урынын таба алмаучылар күп булды. Чөнки үзеңне танытырлык дәрәҗәдә әзерләнү өчен шактый еллар уза. Олимпия спорт төре булганлыктан, максатлар куюы да кыен, – ди Ленар.

...Ә үз кызын бокска бирү-бирмәве турында сүз чыккач, тренер кистереп кенә җавап бирмәде. Күңеле ятса гына, диде остаз.

«Стресс шушында чыга»

Бөтен уңайлы шартлар булган «Алинә» комплексында бокс белән шөгыльләнүчеләрнең иң кечкенәләренә 11 яшь, өлкәнрәкләре – югары сыйныф укучылары. Биш ел эчендә республикакүләм ярышта җиңүче булган яшьләр дә бар. Уңышка ирешүчеләрнең күпчелеге – кызлар. Оля Гнеденкова, Ләйсән Насибуллина һәм Динә Билалова – Татарстан чемпионнары. Алар 11 нче сыйныфта белем ала.


– Бокс кызлар өчен матур спорт төре түгел, дип саныйлардыр бәлки. Читтән карап торучылар, кызларга килешми, дип тә әйтергә мөмкин. Ләкин бу алай түгел. Бокс, мәсәлән, миңа бик нык булыша, – ди боксчы кызларның Динә исемлесе. – Бокс мотивация бирә, тормышның авыр вакытында булыша. Аеруча стрессны чыгару өчен шәп шөгыль бу! Бераз кәеф булмаган вакытта спортзалга киләсең, кулга перчатка киеп, «груша» каршына басасың... Хис-кичерешләрне йөгәнләү өчен нинди яхшы мөмкинлек.


Кызлар өчесе дә 2015 елның декабрендә Татарстан беренчелегендә уңышка ирешкән. Ә рингка беренче адымнарын ясаган вакытта мондый уңышларга ирешү турында хыялланырлык кына булган әле.


– Беренче вакытта бик авыр иде – күнегүләр вакытында бер-беребезгә суга да алмадык. Менә шул курку чиген узып, дус кызларны рингта партнер буларак кабул итә башлагач, уңышлар да килә башлады, – ди кызларның икенчесе Ләйсән Насибуллина.

“Диета кирәкми – аксымлы ризык ашыйбыз”

Бокс түгәрәгендә тупланган осталыкны кызларга бер тапкыр да рингтан тыш җирлектә күрсәтергә туры килмәгән. Шулай да боксчы булулары егетләрне берникадәр сагайта икән. Качып ук бетмәсәләр дә, хөрмәт артты, ди кызлар.

– Сакланып карый егетләр. Аннары, аралаша башлагач, боксның асылын аңлыйлар да, безгә карата хөрмәтләре дә арта, – ди чемпион кызларның өченчесе Оля Гнеденкова. – Без бит теләсә ничек сугышып йөрмибез, ә үз-үзебезне якларга сәләтле булып кына тәрбияләнәбез, осталыкны исә ярышларда гына күрсәтәбез.


Бокс кызларның тормышына үз таләпләрен керткән: бүген алар спорт режимы белән яши, кайбер яшьтәшләре кебек диета турында уйланмый – аксымга бай, файдалы ризыклар белән туклану җаен эзли. Иң мөһиме: спортзалга аяк басуларына тамчы да үкенми алар. Бокс дөньясы белән танышу теләге көннән-көн ныграк арта гына, диләр.


Фикерләр








Спорт

Кул көрәше буенча Россиядә беренче урын алган татар спортчысы: Үземне батыр егет дип саныйм

Екатеринбургта кул көрәше буенча ил беренчелегендәге ярышларда Башкортстанның Балтач районы яшь спортчы Радим Галиуллин 45 килограммга кадәр авырлык категориясендә беренче урын алды. “Татар-информ” хәбәрчесе татар спортчысы һәм аның остазы белән әңгәмә корды.

Спорт

“Итекле хоккей янына итәкле хоккей да булса, начар булмас”

Саба районының Мәртен авылында итекле хоккей ярышлары узды. Ярышлар Саба егете, 26 яшендә юл фаҗигасында һәлак булган Фидәрис Ганиевнең якты истәлегенә багышлана.  Авылча, җылы итек, бүрек, киң бияләй киеп, шайба урынына кечкенә туп белән Мәртенгә кайтып хоккей уйнауның инициаторы исән чагында Фидәрис үзе булган. Кызганыч, ул безнең арада бик аз гомер генә яшәп калды. Ләкин аннан калган татулык рухы өзелми монда.

Спорт

«Туган көн»гә кемнәр бара: Олимпиадага чакыру алган 7 татар спортчысы

Халыкара Олимпия комитетына 500 спортчыдан торган исемлек тәкъдим ителсә дә, Россиянең 169 спортчысына гына катнашу рөхсәт ителде. Нейтраль әләм астында чыгыш ясаячак Россия спортчылары арасында 7 татар да бар.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Персонал данные

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла