Алабугада янгында ике бала һәлак булганнан соң җинаять эше кузгатылды
Бүген, 15 мартта, төнлә Алабуга шәһәренең Истәлек урамында урнашкан 2 катлы шәхси йортта чыккан янгын нәтиҗәсендә 12 яшьлек үсмер кыз һәм 3 яшьлек малай һәлак булган. Әлеге очрак буенча җинаять эше кузгатылган.
Йортта 4 балалы гаилә яшәгән була. Янгын чыккан төнне әни кеше бер баласы белән өйдә булмый. Бу төнне өйдә гаилә башлыгы 3 бала белән берүзе каршылый.
Янгын сүндерүчеләр килеп җиткәнче, 29 яшьлек ир-ат, 8 яшьлек улын ияртеп, йорттан мөстәкыйль рәвештә чыга. Аларны тән тиресе пешү җәрәхәтләре белән хастаханәгә алып китәләр.
Янган конструкцияләрне тикшергәндә, 12 яшьлек үсмер кыз һәм 3 яшьлек малайның мәетләре табыла.
Фото: © ТР буенча Россия тикшерү комитеты
2 катлы йорт, ихатада торган 10нчы модельле «Лада» һәм «Suzuki Grand Vitara» машиналары тулысынча янып бетә.
Килеп чыккан хәлнең барлык шартларын билгеләүгә юнәлдерелгән тикшерү эшләре алып барыла. Янгын сәбәбен Дәүләт янгын күзәтчелеге хезмәткәрләре ачыклый.