“Итекле хоккей янына итәкле хоккей да булса, начар булмас”

11 февраль 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Зәмирә СӘМИГУЛЛИНА
Саба районының Мәртен авылында итекле хоккей ярышлары узды. Ярышлар Саба егете, 26 яшендә юл фаҗигасында һәлак булган Фидәрис Ганиевнең якты истәлегенә багышлана.  Авылча, җылы итек, бүрек, киң бияләй киеп, шайба урынына кечкенә туп белән Мәртенгә кайтып хоккей уйнауның инициаторы исән чагында Фидәрис үзе булган. Кызганыч, ул безнең арада бик аз гомер генә яшәп калды. Ләкин аннан калган татулык рухы өзелми монда.

Фидәриснең әнисе Гүзәлия апа шушы Мәртен авылында туып-үскән, әтисе – Мулланур абый күрше Туктар авылы егете. Ике кечкенә генә авыл халкы элек-электән бердәм булып гомер итә. Мәртен, Туктар авылларыннан гына түгел, район үзәге – Сабадан да бик күп халык килгән иде. Уенчылар да шактый җыелды.


Итекле хоккей Саба районында өч ел уйнала. Аны районда беренче булып уйный башлаган кеше - 1989 елгы Фидәрис. Ул Байлар Сабасындагы автомобиль запчастьләре кибетендә сатучы булып эшләде. Спорт һәм музыка белән җенләнгән Фидәрис "авылдагы беренче егет" дип аталырга лаек иде.
Итекле хоккейны уйнар өчен махсус мәйданчык кирәкми. Кардан чистартылган урын, мәсәлән урамның бер өлеше дә җитә. Тимераяк урынына - киез итек, шайба урынына - туп.

Фидәриснең якты истәлегенә...

Фидәриснең әнисе Гүзәлия апа уеннар башланыр алдыннан улын искә алды.

–23 август көне иде, көндезге сәгать уникедән соң юл һәлакәте булган дигән хәбәр килеп иреште. Тугыз көн комада булды, 1 сентябрь көнне җирләдек. Үзе исән булса, ул да шушында дуслары арасында булыр иде дибез, бик сагынабыз, аны уйламаган бер көн дә юк. Әле ярый киленебез Диләрә белән оныгыбыз Нәфисәбез бар, – ди ул.

 

Итекле хоккей турнирында барлык уенчылар да ихластан, күңел биреп уйнады. Көне дә бик матур, җылы булды. Ул көннең һава торышын уенчылар мәрхүм Фидәриснең үзе кебек изге булды, дип бәяләде.

Фидәриснең бертуган сеңлесе Рузилә Ганиева, турнир булырга ун көн алдан абыйсының төшенә кереп, хоккей таягын эзләтүен дә сөйли.

– Абыем безнең арабызда булмаса да, ул гел безнең күңелдә. Бер минутка да хәтеребездән чыкмый, чыкмас та. Үзе дә безне сагына, гел төшебезгә керә, – ди ул.

Итекле хоккей - Вакказов һөҗүм итә, Илфар Кәримов... хисләнеп китеп, гол кертә

Дуслар һәм туганнар хәйриячелекнең дә матур үрнәген күрсәтә, бөтен финанс чыгымнарын үз өсләренә алалар. Бу юлы да бик күп бүләкләр әзерләгәннәр. Тәмле шулпа әзерләүче аш-су осталары да үзләреннән, диджей, алып баручы да үзләре. Туңып китсәң, самавырдан кайнар чәй, өстәл тулы тәм-том көтә.

Әлеге турнирның төп максаты - Фидәрисне искә алу, аның исемен киләчәк буыннарга тапшыру, хәзер бик азларда гына калып бара торган туганлык җепләрен өзмәү. Яшьләрне дә шул рухта тәрбияләү, аларны сәламәт яшәү рәвешенә өндәү.

Көндезге унда башланган ярышлар, кичке сәгать дүрткә кадәр дәвам итте. Ярышта ун команда катнашты. Командалар да үзенчәлекле бит әле! Һәр нәсел – бер команда биредә. Фидәриснең әти-әнисе һәм туганнары ярышта җиңүчеләр һәм призлы урыннарга чыгучыларның барысына да истәлек медальләре, бүләкләр, күчмә кубок әзерләгән. Бүләкләрне алуга, оештыруга Фидәриснең дусларының да ярдәме тигән.


– Улыбызны искә алып килгән һәммәгезгә дә рәхмәт. Киләсе елларда да көтеп калабыз. Кызлардан да хоккей командасы булдырырга кирәк. Итекле хоккей янына, итәкле хоккей булса да начар булмас, – ди Фидәриснең әтисе Мулланур абый.

Ярышларның комментаторы - танылган шоумен, тамада Фәнил Вакказов. Фәнилнең сүзгә оста, җор телле икәнен белсәк тә, ул үзен тагын бер кат шаян комментатор, дип бәяләде. Комментатор булып кына түзеп тора алмады, Вакказовлар командасында уйнап, шайба-туп артыннан йөгерергә дә өлгерде. 


Капкада торган “Болгар” радиосы алып баручысы Илфар Кәримов капкачы икәнен онытып җибәрде булса кирәк. Радиода эшлим дип уйлап, җырлар “сайлады” булса кирәк, хисләнебрәк китте. Каршы як команда Вакказовлар бер-бер артлы керткән өч голдан соң гына, ауный-тәгәри капканы туптан саклый башлады.


Хәй, братан! 

Ярышларда Саба районының яшь җитәкчеләреннән торган команда - "Хәй, братан!" беренче урын алды. Аларга дартс һәм күчмә кубок бүләк иттеләр. Кубок итекле хоккей хуҗасында булырга тиеш дигән карар чыгарып, аны Фидәриснең әтисенә бирделәр. 

Җанатарлар да бик тырышты. Иң кызыгы шул - аларның берсе пластик шешә эченә тимер акчалар тутырып килгән иде. Аны селкеткәч, тавышы авылның икенче ягына кадәр ишетелеп тора иде.

Бу көнне һәркемнең күңеле ял итте, аралашты, әйтерсең лә Фидәрис үзе кайтып кунак җыеп бәйрәм үткәрде. Һәркем бер-берсенә игътибарлы, дус иде монда.

Ганиевлар биш бала тәрбияләп үстерде. Аларның һәрберсе җәмәгать тормышында да актив, тәрбияле. Байлар Сабасының иң мөхтәрәм, гади, эчкерсез, соклангыч гаиләсе ул Ганиевлар.



Фикерләр








Спорт

"Йөзү иң популяр спорт төре булыр дип ышанам"

Татарстанда 8 бассейн кулланылуга тапшырылачак. Шулай итеп, республиканың барлык районнарында яшәүчеләрнең дә су спорты төрләре белән шөгыльләнергә мөмкинлеге булачак. Татарстан спорт министрының беренче урынбасары Хәлил Шәйхетдинов "Татар-информ"га биргән интервьюсында йөзүнең халыкның сәламәтлеген саклаудагы әһәмияте, бассейннардагы ташламалар һәм суда батучыларның санын ничек киметергә мөмкин булачагы хакында сөйләде.

Спорт

Цивилизацияле сугыш: туп тибү - илләрнең һәм ирләрнең үзен күрсәтү урыны

Футбол – ул сугыш. Сугышның цивилизацияле, канкойгыч булмаган, дөрес формасы. Бер-берсен уздыру, үзенең көчле булуын исбатларга тырышу ирләрнең канына салынган. Ә футбол шушы мөмкинлекне бирә. Ирләр һәм илләр бер-берсеннән көчлерәк икәнен цивилизацияле рухта исбатлый ала.

Спорт

"Мин бит чемпион! Нишләп бакчада эшлим әле!" Актаныш егете, Россия чемпионы исеме алгач, печәнгә чыгарга киреләнгән

Күптән түгел Чиләбедә узган җиңел атлетика буенча Россия беренчелегендә  Актаныш егете Искәндәр Һадиев биш чакрымга йөгерүдә беренчелекне яулады. "Татар-информ" авыл егетенең бу мәртәбәле нәтиҗәгә ничек ирешүен һәм бу дәрәҗәнең нинди нәтиҗәләргә китерүен белеште.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла