2018 елгы дөнья чемпионаты: көндәшләр билгеле. Казанга кемнәр килә?

1 декабрь 2017

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Фәрит САЛИХОВ
Фото: Илнар Төхбәтов фотосы.
Мәскәүдә 2018 елда Россия шәһәрләрендә узачак футбол буенча дөнья чемпионатының жирәбәсе уздырылды. Чемпионатта катнашачак 32 команда төркем этабындагы көндәшләрен белде. Россия футбол җыелмасы чагыштырмача җиңел төркемгә эләкте, ә Казанда төркем этабындагы уеннарда ук дөнья чемпионнарын күреп булачак.

32 команда – 8 төркем

2018 елгы дөнья чемпионатында, хуҗалардан тыш, Бразилия, Иран, Япония, Мексика, Бельгия, Көньяк Корея, Согуд Гарәбстаны, Германия, Англия, Испания, Нигерия, Коста-Рика, Польша, Мисыр, Исландия, Сербия, Португалия, Франция, Уругвай, Аргентина, Колумбия, Панама, Сенегал, Марокко, Тунис, Швейцария, Хорватия, Швеция, Дания, Австралия һәм Перу җыелма командалары көч сынашачак.



Шулай итеп, киләсе җәйдә Россиягә, Италиядән кала, дөнья чемпионы булып танылган барлык ил җыелмалары да килә. Алар – Бразилия, Германия, Аргентина, Уругвай, Франция, Англия һәм Испания. Ә Италияне сайлап алу матчында Швеция җыелмасы “бәреп төшерде” – ике уен нәтиҗәсе буенча оттырды (0:1 һәм 0:0). Бу Италиянең 1958 елдан соң беренче тапкыр дөнья чемпионатының финал өлешендә катнашмавы. Сүз уңаеннан, әлеге хәлдән соң Италия капкачысы, 39 яшьлек Джанлуиджи Буффон ил җыелмасы өчен башка уйнамаячагын белдерде. Ул ил командасы өчен 1997 елдан бирле 174 матчта уенга чыкты.



Бүгенге жирәбәдә 32 команданы 8 төркемгә бүлеп чыктылар:

А төркеме: Россия, Согуд Гарәбстаны, Мисыр, Уругвай
В төркеме: Португалия, Испания, Марокко, Иран
С төркеме: Франция, Австралия, Перу, Дания
D төркеме: Аргентина, Исландия, Хорватия, Нигерия
Е төркеме: Бразилия, Швейцария, Коста-Рика, Сербия
F төркеме: Германия, Мексика, Швеция, Көньяк Корея
G төркеме: Бельгия, Панама, Тунис, Англия
H төркеме: Польша, Сенегал, Колумбия, Япония.

Россия кайда уйный?

Россия тарихындагы беренче дөнья чемпионаты 2018 елда 14 июньнән – 15 июльгә кадәр илнең 11 шәһәрендә уза. Чемпионатны кабул итеп алачак шәһәрләр – Мәскәү, Санкт-Петербург, Ростов-Дон, Сочи, Екатеринбург, Саранск, Калининград, Түбән Новгород, Казан, Волгоград һәм Самара.



Хуҗалар буларак, Россия футбол җыелмасының “А” төркемендә чыгыш ясаячагы алдан ук билгеле иде инде. Аның көндәшләре – Согуд Гарәбстаны, Мисыр һәм Уругвай командалары – чагыштырмача җиңел төркем. Хәтта баш тренер Станислав Черчесов безнең төркемгә Согуд Гарәбстаны эләккәч, елмаеп та куйды. "Алар безнең белән иптәшләрчә очрашу уздырырга теләгән иде, ә без баш тарттык. Шуңа елмайдым, – диде остаз азактан. – Согуд Гарәбстаны, Мисыр һәм Уругвай командалары турында аз беләбез. Мисырда – Мөхәммәт Салах, Уругвайда Луис Суарес кебек уенчылар барын гына беләм. Ә төркем этабында Испания җыелмасы белән эләгүне теләмәгән идем. Алар бик көчле".



Шулай итеп, 14 июньдә ачылыш матчында Россия футболчылары Мәскәүнең “Лужники” стадионында Согуд Гарәбстаны җыелма командасы белән очраша. Икенче тур көндәше – Мисыр җыелмасына каршы уен 19 июньдә Санкт-Петербургта, төркемдәге соңгы уен 25 июньдә Уругвай командасына каршы Самарада уза.



Төркем этабын уңышлы узган очракта, Станислав Черчесов шәкертләрен плей-оффның беренче раундында В төркемендәге командалардан – Португалия, Испания, Марокко яисә Иран җыелмаларының берсе көтәчәк.

Казанга кемнәр килә?

Татарстан башкаласының “Казан Арена” стадионы дөнья чемпионатының 6 матчын кабул итеп ала. Казанга төркем этабындагы уеннарга кайсы командалар килүе мәгълүм булды. Алар арасында дөнья чемпионы булып танылган 3 команда – Франция, Испания һәм Германия дә бар.



16 июнь. 13.00. Франция – Австралия.
20 июнь. 21.00. Иран – Испания.
24 июнь. 21.00. Польша – Колумбия.
27 июнь. 17.00. Көньяк Корея – Германия.
30 июнь. 17.00. 1/8 финал матчы (С1-D2).
6 июль. 21.00. 1/4 финал матчы.

Яхшы булачак

Россиядә 2018 елгы дөнья чемпионатын зур түземсезлек белән көтәләр һәм бу вакыйганы югары дәрәҗәдә үткәрү өчен барлык көчләрен куячаклар. Бу хакта Россия дәүләт башлыгы Владимир Путин 2018 елгы дөнья чемпионаты финал турниры жирәбәсе тантанасында белдерде.



Россия Президенты сүзләренчә, чемпионатта әйдәп баручы уенчылар бөтен осталыкларын эшкә җигеп, чын зур футбол күрсәтергә тиеш. Футбол буенча 2018 елгы дөнья чемпионаты матчларына үз командалары өчен җанатарга килүчеләр онытылмаслык хис-кичерешләр белән калырга тиеш, дип белдерә РФ Президенты.

Күңел инде бүгеннән үк җәйне көтә...

Фикерләр








Спорт

Хәлил Шәйхетдинов Зәйдәге чемпионат турында: "Сугышулар булып тора, моны гадәттән тыш хәл дип әйтеп булмый"

4-7 октябрь көнне Зәйдә билбау көрәше буенча Россия беренчелеге өчен чемпионатта карачәй һәм калмык көрәшчеләре арасында сугыш чыкты. “Татар-информ” мәгълүмат агентлыгы хәбәрчесе конфликтның сәбәпләрен белү максатыннан ызгышның шаһитләре һәм көрәш буенча белгечләр белән сөйләште. Көрәшчеләр арасында мондый сугышларның гадәти хәл булуын, хәтта кайбер бәйгеләрдә тәртипне ОМОН саклаганын ачыкладык.

Спорт

Баланы ничә яшьтән спорт мәктәбенә бирергә ярый? Көрәшне ничек танытырга? Көрәштә төп призны жирәбәдә ачыклау дөресме? Азат Нурмөхәммәтов белән "Туры элемтә"

Баланы спорт мәктәбенә ничә яшьтән бирергә ярый, спорт төрен сайлаганда нәрсәне исәпкә алырга кирәк һәм көрәшне ничек дөньяга танытып була? “Татар-информ” агентлыгы уздырган “Туры элемтә”дә бу сорауларга "Ак Барс" балалар һәм яшүсмерләр спорт көрәш мәктәбе директоры, Көрәш һәм билбау көрәше буенча Россиянең спорт остасы Азат Нурмөхәммәтов җавап бирде.

Спорт

Көрәштә машинаны ничек бүлешергә? Экспертлар тәкъдим иткән 4 вариант

Чабаксарда узган федераль сабан туенда көрәштә төп приз - автомобильне жирәбә белән уйнатуга, бу лотереяга Татарстан спортчыларын кертмәүгә бәйле гауга тәмам куерды. Социаль челтәрләрдә фикер алышучылар арасында хәзерге көрәш ярышлары системасын үзгәртергә кирәк диючеләр бар. Ярыш нинди системага корылырга тиеш - "Татар-информ" журналисты фикерләрне белеште. 

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла