“Югалтуларсыз яшәгез!..” Римма Никитина дус кызларының үлемендә үзен гаепли
Җырчы үзенең Инстаграм челтәрендә бер ел элек юл фаҗигасендә вафат булган дус кызларын искә алган.
“Йокы керми күземә, әллә нәрсә шунда күңелдә. Кайтмаганыгызны да аңлыйм, ә күңел нидер көтә, һаман ышанмый... Бүген бер ел булды, кызларым... 16.04.2018. Вакыт дигәннәре су кебек ага. Йөрәктәге яра гына төзәлми. Күпме генә үземне алдап юатсам да, үз-үземне гаепләп яшим...
Бәлки, минем ул көнне Чүпрәледә концертым булмаган булса, шулай ашкынмаган да булыр идегез, кызларым... Ул коточкыч авария дә булмаган булыр иде....Сабыйлар да әнисез калмаган булыр иде... Бер ел инде шушы уйлар җанны телгәли, үзәгемне өзә... Язмыштыр инде курәсең, шулай язгандыр”, - дип язган ул.
Римма мәрхүм кызларның якыннарына да мөрәҗәгать иткән.
“Зур рәхмәтләремне җиткерәсем килә. Рафик абый һәм Гөлфисә апа, Илгиз абый белән Сания апага. Мине аңлап, үз кызыгыз кебек каршы алып, озатып калганыгызга. Шыгырдан бер ел эчендә икенче туган авылыма әйләнде дә куйды... Кем уйлаган бит, шулай ашкынып, сагынып кайтырмын мин монда, дип....
Эльза кызым, Адель улым, Замирә кызым, Расул улым - минем күз нурларым... Сезгә карап яшиселәр килә. Берничә көн генә дә сөйләшмәсәк, күңелгә нәрсәдер җитмәгән кебек.... Якын миңа шундый, якын сез. Исән генә булыгыз сабыйларым...Йөрәктәгене яздым, бушаныйм дип... Бәлки, кемдер аңлар мине, ә кемдер юк. Шуны гына телим барчагызга - югалтуларсыз яшәгез”, - дигән җырчы.