Салават Фәтхетдинов көн саен Әлфия Авзаловага чәчәкләр куя
Салават Фәтхетдинов көн саен Әлфия Авзаловага чәчәкләр куя
Салават Фәтхетдинов концертларыннан соң көн саен Әлфия Авзалова яшәгән йортка куелган истәлек тактасы янына чәчәкләр куя. "Бүген дә көн үтте", - дип язган ул чираттагы постында.
"Рәхмәт, Салават, рәхмәт! Әлфия апаның рухын гөлләргә төргәнең өчен! Чәчәкләр ул - тамашачының мәхәббәте. Афәрин! Шушы мәхәббәтне моң алдында уртак иткәненә! Бу чәчәкләр аша син тамашачының алкышларын да, хөрмәтен дә, яратуың да Әлфия апа белән бүлешәсең", - дип яза Динә Латыйпова.
"Бик зур рәхмәт. Салават абый, Әлфия апа - легендар җырчы", - дип язган Рәнис Габбазов.
Әмма Салават Фәтхетдинов чәчәкләр куйган саен аның бу гамәлен тәнкыйтьләүчеләр дә бик күп.
"Аны урам себерүчеләр чистарта инде. Тиз шиңә бит".
"Әлфия апага чәчәк кирәк түгел, дога кирәк".
"Сез концерттан соң чәчәкләрне куйган ишегалдында урам себерүче акылдын язадыр, концертларыгыз тизрәк бетсен дип телидер".
"Концерттан җыелган чәчәкләр генә куялар шул, көн саен үз акчаларына шуның кадәр чәчәк сатып алып куймыйлар".
"Үз акчасына алып куйса, яхшылык булыр иде. Концерттан җыелган чәчәктән өлеш чыгару гына бу".
"Бүген дә көн үтте... Шундый хис, Салават абый, көннәрең бик авыр итә синең".
"Исерекләр ул чәчәкләрне алып саталардыр инде".
"Нинди изгелекләр эшләсәң дә, кешегә ярап булмый", - дип яклаганнар Салаватны.