Ришат Төхвәтуллин "Милләтләр кроссында" катнашкан
Танылган татар эстрадасы йолдызы Азнакай стадионын бик ошаткан.
15 сентябрьдә Азнакай шәһәренең «Юбилейный» стадионында «Милләтләр кроссы-2018» бөтенроссия акциясе узды. Бу хакта районның "Маяк" газетасы яза.
Анда мәктәп укучылары, район җитәкчеләре, предприятие-оешмалар коллективлары үз дистанцияләрендә кросс бирделәр.
Шулай ук биредә ГТО нормаларын да тапшырырга мөмкин иде.
Йөгерүчеләр арасында татар эстрадасының танылган җырчысы Ришат Төхвәтуллин да бар иде.
- Кайсы гына шәһәргә гастрольгә барсам да, стадионга чыгам. Концерт алдыннан йөгереп, физик күнегүләр ясап алам. Бу тәнгә җиңеллек, кәеф күтәренкелеге бирә. Гомумән, спорт – ул сәламәтлек. Мин Азнакайга һәрчак яратып киләм. Стадионы да бик матур, уңайлы, юлым төшкәндә һәрчак рәхәтләнеп шөгыльләнәм, - диде ул.
