Азат Фазлыев: "Табиблар яхшы хәбәрләр җиткерде!"
Азат Фазлыев: "Табиблар яхшы хәбәрләр җиткерде!"
Җырчы Азат Фазлыевның әнисе яман авырудан интегә. Табиблар аңа кичекмәстән сөяк миен күчереп утыртырга кирәк дигән карарга килгән, әмма мондый операция бик кыйммәтле - аны Төркиядә ясату өчен тиз арада 10 миллион сум акча кирәк. Бу уңайдан Фазлыевлар халыкка мөрәҗәгать итеп, әниләренә акча җыярга мәҗбүр булды. Бүген бар татар дөньясы Зөлфирә ханымның савыгуын көтә.
Бүген Азат Фазлыев, ниһаять, инстаграмында сөенечле хәбәр җиткерде: "Хәерле көннәр, дуслар! Сезнең белән сөенечле хәбәрем белән уртаклашасым килә әле. Әни Истанбул шәһәренә барып җитте, табиблар яхшы хәбәрләр әйтте - әнинең хәле без уйлаганга караганда әйбәт икән, анализлар уртача. Хәзерге вакытта операциягә әзерләнү курслары үтә. Барысы да сезнең ярдәмегез белән. Бүгенге көндә 1 579 821 сум акча җыелды! Шушы хәбәрләрдән соң күңелләр күтәрелеп китте, эшлибез, җырлыйбыз, чыгышлар ясыйбыз! Әни хәйрия концертларын яхшы үтүен теләде һәм барыгызга да зур рәхмәтләр, тирән ихтирамын белдерә", - дип язган Азат.