Айзилә Батырханова "Яшьләр тукталышы"ннан кая китә?
"Яшьләр тукталышы" тапшыруы алып баручысы Айзилә Батырханова инстаграмда "Минем дә дүрт еллык тукталышым азагына якынлашты. "Яшьләр тукталышы" миңа бик күп танышулар бүләк итте. Рәхмәт сезгә", - дип, саубуллашу сүзләре язып куйган.
- Айзилә, инстаграмда саубуллашу сүзләре язып куйгансың, әллә телевидениедан бөтенләй китәсеңме?
- Юк, телевидениедән китмим. Тик “Яшьләр тукталышы” проектыннан китәргә булдым.
- Нигә китәсең? Туйдырдымы әллә?
- Юк, туйдырмады. “Яшьләр тукталышы” – ул яшьләр һәм яшүсмерләр өчен дип эшләнелгән проект иде. Анда без яшүсмерләр өчен кызыклы булган вакыйгаларны яктырттык. Шуны да әйтергә кирәк: кеше бер урында гына тапталып торырга тиеш түгел, үсәргә кирәк. Менә мин дә үземнең тормышымда шундый этап икәнен сиздем һәм яңа адым ясарга булдым.
- “Яшьләр тукталышы”ннан кая күчәргә булдың?
- Әлегә бу сер булып калсын. Чөнки алдан кычкырган күкенең башы тишелә, ди. Моны инде яңа сезоннан күреп булачак.
- Хәзер партнерың Иван үзе генә алып барачакмыни тапшыруны? Сезне бергә күрергә өйрәнгән тамашачы борчылыр инде.
- Юк, Ваня шулай ук тиздән бу проекттан китәчәк. Ул инде бераз вакытны сузарга булды, ул августта китәчәк.
- Димәк, тапшыруның составы бөтенләй алмашыначак?
- Әйе, безнең “Ваня-Айзилә” тандемы шулай итеп бетәчәк.
- Телевидениегә ничек килеп кердең? Бүтән өлкә белән кызыксынмадыңмы?
- Телевидениегә мин моннан дүрт ел элек, 2015 елда килеп кердем. “Дулкыннар” бәйгесе аша мине күреп алдылар һәм чакырдылар. Минем белгечлегем дә филология. Шуңа күрә йә журналистика, йә телевидение, йә бүтән төрле тел белән бәйле җиргә урнашасым көн кебек ачык иде. Икенче курсны бетергән вакытым иде ул минем. Читтән торып уку бүлегенә күчмәдем, көндезге бүлектә укыдым. Шулай укып-эшләп йөрдем. Тормышымда “Яшьләр тукталышы” булу белән мин бик бәхетле, чөнки ул мине бик күп нәрсәгә өйрәтте. Гомумән, телевидениега юл ачты. “Яшьләр тукталышы” – тормышымдагы иң якты мизгелләрнең берсе иде.