Айгөл Бариеваның ире "бомбила" булып йөргән
Татарстанның атказанган артисты Айгөл Бариева авыр еллары, акчага кытлык кичерүләре турында язган.
Айгөл Бариева балаларының балачагыннан архив видеосы куйган. Кадрларда - кечкенә Камил белән Айлинәнең су сипкеч бүлешүе. Икесе дә, елашып, бер-берсеннән лейканы тарткалашалар.
"Бер-бер артлы таптым мин балаларымны... Кызыма, Айлинәмә 1,8ай булганда Камилем да туды. Аллага шөкер! Кызымлы да,улымлы да булдым.
Әйе, җиңел булмады... Булышырга әби, бабайлар юк. Барсын да иптәшем белән үзебез күтәрдек. Себердән соң Казанга кайтып төшкәч, бер эшсез, бер тиен акчасыз, мөстәкыйль тормыш кора башладык. Ирем төннәрен, әтисеннән калган Москвич машинасына утырып, бомбить итәргә чыгып китә иде. Ә көндез эшкә. Мин ике кечкенә бала белән кала идем. Менә шулай елашып та, көлешеп тә үстеләр инде. Аллага шөкер, туганнарым булды. Җәй саен Сабага Исмегөл апаларыма кайтара идем. Алланың рәхмәте яусын аларга. Аллага шөкер, әкренләп, әкренләп шулай тормыш кордык. Инде хәзер менә үсеп тә җиттеләр. Бөтен авырлыклар да онытылды. Иң мөһиме исән-сау, акыллы, бәхетле, тәүфикълы булсыннар! Әле дә ярый мондый язмалар калды. Сагынып, сагынып искә алырга..." - дип язган Айгөл.