Актанышта сыерчыклар өчен манаралы оя ясаган Нәсим Заһертдинов: Исламда кошларга оя ясау бик яхшы гамәл

21 Апреля 2018

Укылган: 1043 тапкыр

Автор: Зилә МӨБӘРӘКШИНА
Социаль челтәрләрдә манаралы сыерчык оясы фотосы таралды. "Татар-информ" хәбәрчесе ояның авторын эзләп тапты. Ул - Актаныш муниципаль районы Башкарма комитеты җитәкчесе ярдәмчесе Нәсим Заһертдинов.

- Нәсим абый, манаралы сыерчык оясын үзегез уйлап чыгардыгызмы?

- Минем шуңа охшаш сыерчык оясын Ижау каласына баргач күргәнем булды, әмма ул манаралы түгел иде. Безнең ишек алдында гына мәчет күренеп тора. Үзем уйлап чыгардым да, сыерчык оясын ясап карарга булдым. 

Сыерчык оясының манарасын туганнан туган абыем кырдырып бирде. Манаралы сыерчык оясын ясаганга инде дүртенче ел булды.

- Сыерчыклар манаралы ояга киләме соң?

- Һәр елны да сыерчыклар ояның көньягында һәм көнчыгыш ягында оялый. Ел да икәү киләләр иде. Фотодагы ояга сыерчыклар иртә дә кич тә төрле яклап кереп йөри. Хәзерге вакытта күренмиләр әле.

- Сыерчык оясын моңа кадәр дә ясаганыгыз булдымы?

- Сыерчык ояларын кечкенә чакта ук, мәктәптә укыган елларда ясый идем. Манаралы сыерчык оясы әле беренчесе генә. Күршеләр кабул итмәс, өйнең кайсы ягына куярга икән дип уйладым да, берне генә ясарга булдым. Сыерчык оясын бер генә урында тимер багана белән күтәреп куйдым, дүрт яктан тишек тиштем.

- Манаралы сыерчык оясын диннән көлү дип санамыйсызмы?

- Минем мәчеткә йөргәнемә дүрт ел була, Аллага шөкер. Ояны ясаганда әле йөрми идем, бу турыда уйлаганым да булмады. Алай да, манаралы ояны ясагач, бу турыда, мәчеттә җомга намазы вакытында хәзрәттән сорадым. “Гамәлләрем дөресме? Ел да сыерчыклар оя кора, балаларым куана, килгәч, оныклар карап тора”, - дим. Хәзрәт киресенчә шатланды гына: “Бик яхшы гамәл, дөрес эшләгәнсең! Син бит мәчеттән, диннән көлмисең. Ояга карап, кешедә тагын бер кат соклану уяначак. Ояның ракурсын да яхшы сайлагансың. Кешеләр көлсә дә, син аларга игътибар бирмә. Исламда кошларга оя ясау бик яхшы гамәл”, – дип аңлатты. Хәзрәт шулай дигәч, күңелләр тулып китте.

- Алга таба да манаралы сыерчык ояларын ясарга телисезме?

- Нәкъ менә манаралы оялар ясармын дип әйтә алмыйм. Әмма оныкларыма “оригиналь” сыерчык ояларын ясарга исәп бар.

Фикерләр








Социаль челтәр йолдызлары

Салават Фәтхетдинов: "Болар эшләрен эшләп кайтып киткәч, бездә яхшы футболчылар - “кара татарлар” туачак"

“Футболны гомер дә караганым да юк, карыйсым да, күрәсем дә килми. Яратмаган әйберне ничек яратам дип әйтеп булсын”, - дип белдерде Россиянең атказанган, Татарстанның халык артисты Салават Фәтхетдинов “Интертат” хәбәрчесенә.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Персонал данные

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла