Язгы ташу-2018: “Сарай тулы су, баздагы бәрәңгеләр йөзеп йөри, юл юк, күрше урамга чыгып булмый”

10 апрель 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Чулпан ШАКИРОВА
Фото: Люция Нигъмәтуллина, Рәшидә Шаһиева, Әнисә Салаватуллина
Татарстанга җылы көннәр белән бергә, язгы ташу чоры килде.

Куйбышев сусаклагычында суның нормадан артуы сәбәпле, белгечләр март ахырында ук язгы ташуга әзер булырга кисәтте. Көннәр кинәт җылытса, язгы ташу кинәт төшәчәк дип тә чаң суктылар. Узган якшәмбедән һава температурасы күтәрелә башлап, бүген инде шактый җылытты. Шуңа күрә 10 апрель - 2018 елда ташу төшкән көн булып тарихка кереп калыр, мөгаен.

“Татар-информ” хәбәрчесе быелгы ташуның беренче "корбаннары" белән аралашты.


Спас: “Кичкә гаражларга керер инде”

Спас районының Тукай авылы уртасындагы күл ташып, авылны икегә бүлгән. Халык аптырашта, ферма эшчеләре төшкә кадәр ат белән киткән булса, төштән соң инде җәяүләп кайтырга мәҗбүр. Тезгә кадәр үк булмаса да, шактый озын резин итеккә су чак керми, дип хәбәр иттеләр.


– Ташу кичә күлгә төште. Хәзер су урам ташып, урам буйлап җәелде. Юл бер якка да юк. Ягъни күлнең аргы ягындагылар бу якка, без ул якка чыга алмыйбыз. Шактый куәтле ага. Инде кичкә гаражларга да керер дип куркабыз. Күлебезнең ярлары бик ямьсез иде. Ул авыл уртасында шулай торды. Халык әйтә торгач, ярын тигезләделәр. Быел ташу агып тулды, – диде Тукай авылыннан Люция Нигъмәтуллина.


Люция ханым ташу белән бәйле йолаларны да искә төшерде. Ире белән ул гадәтне үтәргә дә өлгергән инде.

– Агымсуда битләрне-кулларны юарга кирәк. Ташуда шулай чайканалар. Бөтен кайгы-хәсрәтне, авыруны су агызып китсен дип. Әле ул өч мәртәбә кирәк, – диде.


Люция ханым сүзләренчә, Тукай авылын ел саен язгы ташу баса. Быел да авылдашларының бәрәңге бакчасы тулы су диде ул.

Тукай гына түгел, аның күрше авылы Ярдәмгә дә килеп җиткән язгы ташу. Монысы Рәшидә Шаһиева фотосы.



Апас: “Сарай тулы су, тавыклар кайдадыр – белгән юк”

Апас районы, шәһәр тибындагы Апас бистәсенең Мирный урамы да яз тоткынлыгында. Монда исә әрсез ташу сарайларга, хәтта бәрәңге базына ук үтеп кергән.



– Ярый әле әни үзе өйдә юк, мәһшәр монда, – диде Әнисә Салаватуллина. – Ташу ел саен керә безгә. Әмма быел кермәс кебек иде. Арттагы күрше машинасын кертер өчен юл ясаган. Шуның аркасында су үз юлы белән китмичә, кешеләрнең бөтен бакчасы буйлап аккан. Әнинең өе урамның аскырак өлешендә урнашкан. Калган йортлар өстәрәк. Башка елларда да су төшә иде. Төшкә кадәр энем барып килгән, барысы да әйбәт, су үз юлыннан ага иде ди. Көндезге берләр тирәсендә барса, мәһшәр! Менәәле үзем дә шуннан кайттым. Сарай су астында. Базда бәрәңгеләр йөзеп йөри. Тавыклар кайдадыр – аларны күрмәдек тә әле. Әнинең көздән утырткан викторияләре, бакчага салган тиресләре барысы да агып киткән. Әле ярый үзе күрми, иртәгә төнгә генә кайта. Аңа кадәр ничек тә рәткә китерергә иде дип торабыз.




Үләмәдә боз киткән

Буа 

Буа районында Зөя елгасы аша салынган күперне су баскан.

Буа районында Зөя елгасы аша салынган күперне су баскан

Буа районында Зөя елгасы аша салынган күперне өлешчә су баскан. Кильдураз һәм Бәбки авыллары арасындагы күпер эрегән кар сулары агып китсен өчен тәбәнәк итеп төзелгән. Якын-тирәдәге торак пунктларга су басу куркынычы янамый.

Бәбки авылына Каенлык авылы аша үтә торган әйләнгеч юл бар. Әлеге авылда яшәүчеләр, су күтәрелү аркасында, төп юлдан йөри алмасалар, шуннан файдалана ала.

Буа районының Кыят авылы янындагы күпер дә вакытлыча ябылган.

Буа районының Кыят авылы янында су басу аркасында күперне япканнар

Күпер аша транспорт хәрәкәте ябылуга бәйле рәвештә, Тәтеш районының Тоншерма авылы аша әйләнгеч юл оештырылган. Авыл территориясендә Кыят авылыннан ирекле янгын отряды хезмәткәрләре кизү тора.

Фикерләр








Җәмгыять

"Иремнең вафатына 40 көн узгач, Алмаз да безнең өйгә кереп үлде". Арчада 35 яшьлек ир өстенә кондызлар ега башлаган агач төшкән

Быел көз гадәттәгедән коры һәм матур килде. Алтынга тиң мондый көннәрне диванда ятып үткәрергә теләми кеше. Арча районы Түбән Курса авылының тынгысыз ирләре дә 12 ноябрь - дүшәмбе көнне өмә ясап, авыл янындагы буаны җибәрергә җыела. Әмма игелекле эшләре фаҗига белән тәмамланыр дип кем уйлаган! Кондызлар ега башлаган агачны кискәндә, 35 яшьлек Алмаз Зәйнетдинов харап була.

Җәмгыять

“Язучы ике мең тиражлы китап белән генә ерак китә алмый”. Татарстанда аудиокитаплар чыга башлаячак

Заман шулкадәр тизлек белән алга бара ки, хәзер күпләрнең кулына китап тотып утырырга вакыты да, мөмкинлеге дә юк. Берәүләр социаль челтәрләр, гаджетлар тоткынлыгыннан ычкына алмаса,  икенчеләр китап укыр өчен вакыт җиткерә алмый.

Җәмгыять

Шәфәгать Салиховның төпчек кызы Миләүшә: “Әти белән соңгы сөйләшүне онытырга мөмкин түгел"

Танылган баянчы Шәфәгать Салиховның вафатыннан соң, 31 октябрь көнне, миңа композитор, җырчы Гөлназ Закированың иҗат кичәсендә булырга туры килде. Шунда сәхнә артында йөргәндә, Шәфәгать абыйның төпчек кызы Миләүшәне күреп алдым.  Интервью бирүен сорадым. Кем турында сорячагымны сизендеме - килеп эшдәшүем булды, Миләүшә елап җибәрде...

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла