Яңа парклар, скверлар, бульварлар: Татарстанда барлыкка киләчәк ял зоналары

5 август 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Григорий КНЯЗЕВ
Фото: Григорий Князев
Киләсе елның җәеннән республиканың 34 торак пунктында парклар, скверлар, пляжлар тәртипкә китереләчәк.

Әлмәт: «Сәламәтлек территориясе»

Киләсе елда Әлмәткә әлеге максатларга Татарстан бюджетыннан 100 миллион сум акча бүлеп биреләчәк. Шәһәрдә балалар һәм район үзәк хастаханәләре урнашкан Зифа Балакина урамындагы паркны төзекләндерәчәкләр. Тәкъдим ителгән концепция буенча, парк «Сәламәтлек территориясе» буларак оештырылачак. Бу шулай ук хастаханәләр янындагы зоналарны тәртипкә китерү кирәклеге белән дә аңлатыла. Иң беренчеләрдән булып, паркта яңа юллар барлыкка киләчәк, ул монда килүчеләр йөргән сукмаклар буйлап салыначак. Соңыннан территорияне функциональ зоналарга бүлү күздә тотыла. Өч төп зона – фонтан, балалар мәйданчыгы һәм воркаут (спорт мәйданчыгы) булачак. Шулай ук парк тыныч ял урыны буларак та файдаланылачак, шуңа күрә анда велосипедта йөрү өчен уңайлыклар каралмаган.

Моннан тыш, Зифа Балакина урамы ягыннан Бигәш елгасы яр буен төзекләндерү һәм парк территориясен яшелләндерү күздә тотыла.


Әлмәттәге паркның реконструкция проекты

Алабуга: «Иске Мәйдан» өчен - 41 миллион

Алабугада «Иске мәйдан»ны төзекләндерү эшләренең икенче этабы башлана. Әлеге максатларга бюджеттан 41 миллион сум акча бүленәчәк.
Паркта тагын берничә юлны ремонтлаячаклар, аларга брусчатка һәм экобрусчатка җәяргә ниятлиләр. Шулай ук парк территориясендә урам кинотеатры калкып чыгачак, ә юлларга яңа яктырткычлар куелачак.

Арча: Казансу елгасы буе һәм Зур урам өчен - 25 миллион

Арчада төзекләндерү программасына берьюлы ике объект кертелгән: Казансу елгасы буе һәм Зур урам. Бу максатка 25 миллион сум акча бүлеп биреләчәк.

Казансу елгасы буенда төзекләндереләчәк паркта берничә мөһим яңа объект (сезонлы кафе һәм стационар бәдрәф) сафка бастырылачак. Паркның көнбатыш ягында кышкы шугалак, прокатка тимераяк һәм пляж җиһазлары бирү пункты ачу планлаштырыла. Моннан тыш, Казансу елгасының көньяк-көнчыгышында җәяүлеләр күперен төзекләндерү, үзәктә күзәтү мәйданчыгын җиһазландыру һәм торак кварталлардан паркка керү өчен баскычлар урнаштыру күздә тотыла.


Арчадагы Зур урам янында урнашкан Совет мәйданы манзарасы

Зур урамны реконструкцияләү җәяүлеләр өчен өстәмә юл, велосипед юллары һәм урам янындагы Совет мәйданын тулысынча төзекләндерү эшләрен үз эченә ала. Мәйданда зур чаралар уздыру өчен амфитеатр, урамдагы һәйкәлләр өчен мемориаль зона һәм яңа фонтан барлыкка килергә тиеш. Моннан тыш, урамның яктыртылышын үзгәртү һәм машина йөри торган урыннарда тавышны изоляцияләү өчен агачлар утыртырга ниятлиләр.

Югары Ослан: яр буе зонасы

Югары Осланда төзекләндерү программасына Идел елгасы буендагы пляж белән причал арасындагы парковка территориясе керәчәк. Биредә амфитеатр төзеләчәк. Территорияне яшелләндерүгә дә зур игътибар биреләчәк. Яр буен төзекләндерү өчен 8 миллион сум сарыф итү күздә тотыла.


Югары Осланда булачак паркның проекты

Менделеевск һәм Минзәлә: паркларны яңартуга – 14 миллион

Менделеевскида - Халыклар дуслыгы паркы, ә Минзәләдә – Муса Җәлил исемендәге парк төзекләндереләчәк. Аларның һәркайсына 14 миллион сум сарыф итү күздә тотыла. Менделеевск паркында яңа велосипед юллары, балалар мәйданчыгы, ана һәм бала бүлмәсе, станционар бәдрәф барлыкка киләчәк. Минзәләдәге паркта исә җәйге кафе, кино күрсәтү һәм ачык һавада лекцияләр уздыру өчен амфитеатр, җәяүлеләр өчен фонтан төзеләчәк.


Минзәлә паркы, реконструкция проекты


Менделеевск паркының реконструкция проекты

Пляжларны төзекләндерү: Зәй һәм Кама Тамагы

Мәйданнар, парклар һәм скверлардан тыш, төзекләндерү программасы республикадагы кайбер пляжларны да үз эченә ала. Кама Тамагында 7 миллион сумга Карамалы елгасы буен тәртипкә китерәчәкләр. Зәй-2 микрорайонындагы пляжны төзекләндерү өчен 27 миллион сум бүлеп биреләчәк.

Кама Тамагы пляжын балалар һәм спорт мәйданчыклары, урындыклар, душ һәм киенү-чишенү кабиналары белән җиһазландырачаклар. Зәйдә комлык территориясендә стационар яктырткычлар урнаштырылачак.

Уңайлы мохит - уңайлы тормыш

Шунысын да искәртик: 2015 ел Татарстанда Парклар һәм скверлар елы дип игълан ителгән иде. Аның кысаларында республикадагы бик күп паркларның территориясе төзекләндерелеп, җәмәгать урыннарына әверелде. 2015-2018 елларда республикада күп кенә яңа парклар һәм скверлар ачылды.

2015 елда Казанда ачылган парклар һәм скверлар:

Тинчурин исемендәге парк,
Аксенов скверы,
Ямашев проспектындагы «Континент» паркы,
«Чишмәле» скверы,
Киров бакчасы.

 2015 елда Түбән Камада - Тукай паркы, Мөслимдә – Пушкин скверы, Әлмәттә «Шәмсенур» паркы ачылды.

2016 елда Казанда ачылган парклар:
«Крылья Советов» паркы,
Урицкий паркы,
«Горки-Әмәт» урманы.

2017 елда Чаллыда – Тукай исемендәге яр буе, Яшел Үзәндә – «Авангард» паркы, Арчада «Казансу» буасы яр буе ачылды.

2017 елда Лаешта реконструкциядән соң «Кама диңгезе» комлыгы файдалануга тапшырылды.

2018 елда Казанның Декабристлар урамында «Фестиваль» бульвары һәм Түбән Кабан күленең төзекләндерелгән яр буе ачылды.

Фикерләр








Җәмгыять

Икътисад министрлыгы "Стратегия - 2030"га килгән тәкъдимнәр турында: Кама Аланындагы космодром, Казандагы диңгез һәм башкалар

2030 елга кадәр Татарстанның социаль-икътисади үсеше стратегиясенә халыктан кергән тәкъдимнәр арасында тормышчаннары да, гадәти булмаган фантастик хыяллар да очрый. Татарстанлылар крематорий, космодром төзергә кирәклеген әйтә. Баренц диңгезеннән торбаүткәргеч җибәреп, Казан астында диңгез ясарга яки Татарстан кинемотографиясен Голливуд дәрәҗәсендә үстерергә теләүчеләр дә бар.

Җәмгыять

“Фани дөньядан китәчәген сизепме, музейларга еш йөри иде”. Казанда күренекле татар рәссамы Искәндәр Рәфыйковны соңгы юлга озаттылар

Бүген, 2 октябрьдә Казанда Татарстанның халык рәссамы, атказанган профессор, тормышын фәнгә һәм сәнгатькә багышлаган Искәндәр Рәфыйковны соңгы юлга озаттылар. Мәрхүмне озату мәрәсиме башкаланың “Казан нуры” мәчетендә узды. Күренекле рәссам белән хушлашырга килүче туганнары, хезмәттәшләре, укучылары белән “Татар-информ” хәбәрчесе аралашты.

Җәмгыять

Фирдүс Тямаев белән Илсөя Бәдретдинова Айваз Садыровка каршы: татарча хаталы язу наданлык түгел!

Алып баручы Айваз Садыйров Инстаграмда татарча дөрес язмаучы җырчыларны гаепләп чыкты. "Тарихчы Искәндәр Гыйләҗев, 80нче еллар белән чагыштырганда, хәзер наданнар күп, дигән иде. Килешмичә булмый шикелле”, дип язган ул. Моңа җавап итеп, җырчы Фирдус Тямаев Айваз Садыровны яшьләрне “надан”га чыгарып калдыруда гаепләде. Кемнәрнең Инстаграмы татарча, кемнәрнеке хаталы татарча? Социаль челтәрләрдә татарча хаталы язуның нәтиҗәсе нинди булырга мөмкин? "Татар-информ" хәбәрчесе шуны ачыклады.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла