Трамвайчы кыз: “Җырлавымны тыңлап, пассажирлар тукталышларын да узып китә”

10 август 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Чулпан ШАКИРОВА
«Бер трамвайчы япь-яшь кыз бала, сак булыгыз, вагон кузгала” дип җырлый иде заманында Асаф Вәлиев. Бүген исә сезне үзенчәлекле трамвайчы кыз белән таныштырырга телим. Казан урамнары буйлап, 4нче номерлы трамвайны иярләп, күкрәге тулы моңны рәхәтләнеп, бөтен салонга ишетерлек итеп җырлаучыны күрсәгез, белегез, бу – Илзидә Хафизова булыр.

Эшли башлавына бер генә ел үтсә дә, аның инде үз пассажирлары-үз тыңлаучылары барлыкка килгән. “Бу кадәр матур тавышы белән нигә трамвай йөртүче булып эшли соң ул?” диярсез. Хәзер барысын да сөйлим.

Илзидә Спас районының Ямбахты авылыннан. Мәктәпне тәмамлагач ул, һөнәр алу максаты белән күрше Әлки районына юл тота. Анда повар-кондитер белгечлеген үзләштерә.

“Укыган вакытта җырга сәләтемне күреп, мине мәдәният йортына ярты ставкага эшкә алдылар. Шулай итеп көндезләрен укып, кичләрен эшләп, студент елларымны файдалы итеп үткәрдем. Укуны тәмамлагач тормыш юллары мине Казанга алып килде. Алты кибеттә эшләдем. Кияүгә чыктым, бала таптым”, - ди Илзидә.

“Җаны теләгән елан ите ашаган” дип юкка гына әйтми безнең халык. Илзидәнең әнисенең зур бер хыялы тормышка ашмый калган: ул гомер буе машина йөртергә хыялланган. Әмма күңел түрендәге шушы теләген ул кызына күчерә алган.

“Әни каяндыр белдерү күреп калган ахры. Көннәрдән бер көнне ул миңа: “Декрет ялында утырганда трамвай йөртүчеләр курсларына язылып карамыйсыңмы?” диде. Мин бер урында гына таптанырга яратмыйм. Бардым, язылдым, укыдым. Чыннан да миңа трамвай йөртү ошап китте. Декрет ялы беткәннән соң, туп-туры депога килдем”, - дип хатирәләре белән уртаклашты Илзидә Хафизова.

Илзидә эшен теләп, яратып һәм бик төгәл башкара. Шулай булмыйни, яратмаган эшеңдә рәхәтләнеп җырлап түгел, елап йөрер иде!

“Җырсыз тора алмыйм мин, эштә дә җырлыйм, өйдә дә, чакырган җирләргә да барам, - ди үзе. – Машинист стажым бер ел булса, җыр “стажым” өч яшьтән бирле. Алабуга культура-агарту училищесына кереп, белем алу теләгем дә бар иде. “Бигрәк ерак, кайтсаң китә алмассың, китсәң кайтырга читен”, дип әниләр җибәрмәде.

Алма агачыннан ерак төшми, билгеле. Илзидәнең әтисе баянда уйный, әнисе җырлый икән.

“Алар инде үзләре өчен генә җырчы-баянчы. Элегрәк авылда яшәгәндә күрше авылларга концертлар белән йөриләр иде. Хәзер Казанда яшиләр. Хәер, күңелләре теләсә, утыралар да икәүләшеп концерт куялар”, - ди Илзидә.

Илзидә Хафизова хезмәттәшләре арасында да "җырчы-машинист" исеме белән дан казанган.

“Пассажирларның төрлесе бар. “Рәхмәт, балам, күңелләрне айкадың” диючеләре дә, шыпырт кына тыңлап баручылар да бар. “Сине тыңлап, тукталышны узып киткәнмен” дип көлүчеләр дә булгалый.

Трамвайчы кыз сменасында җырлап кына йөрсә дә, эшнең үз авырлыклары бар билгеле.

- Иртәнге өчтә торырга кирәк. Кичке 11сез өйгә кайтылмый. “Трамвайның руле дә юк, пульты да юк” дисәләр дә, эшем бик җаваплы. Һәм мин аны яратып башкарам, - ди трамвайчы Илзидә Хафизова. 


  Без Инстаграмда

Фикерләр








Җәмгыять

Саба остасы үз куллары белән "Хаммер" җыйган

Байлар Сабасында яшәүче Рәфыйк Һадиев иске хәрби техникадан заманча машина җыйган. Һәм аңа Саба исемен биргән. SABA исемен матурлап ябыштырып та куйган, әллә каян күренеп тора. 

Җәмгыять

“Миндә ВИЧ”: сер итеп саклана торган чир белән авыручылар ничек яши?

Рәсми мәгълүматлар буенча, бүген Татарстанда уңай ВИЧ-инфекцияле 13 514 кеше яши. Быел гына да 600 яңа авыру очрагы ачыкланган. ВИЧ диагнозы белән яшәү һәм күпләрнең синнән йөз чөерүе турында “Татар-информ” репортажында укыгыз. Геройларның исемнәре үзгәртелде.

Җәмгыять

Илдар Гыйльметдинов: "Бөтенроссия татар яшьләре оешмасы кирәк"

Россия Дәүләт Думасының милләтләр эшләре буенча комитеты башлыгы, татарларның Федераль милли-мәдәни автономиясе Советы рәисе Илдар Гыйльметдинов “Татар-информ”га интервьюсындататар яшьләре көннәре, яшьләр оешмасында булучыларга яшь чикләве кирәкме, мәктәпләрдә туган телне ничек укытырга кирәк дигән сорауларга фикерләре белән уртаклашты.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла