Шикәр диабеты аркасында куылган 3 яшьлек кыз балалар бакчасына кире кайтырмы?

11 февраль 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Елена САЛЯХОВА, sntat.ru
Фото: Александр Эшкинин
Өч яшьлек Вика Заворохинаның шикәр диабеты белән авыруы ачыклангач аны балалар бакчасыннан куалар. Бакча җитәкчелеге үз өстенә җаваплылык алудан курыккан. Ә баланың әти-әнисе әлеге диагноз кызны бакчадан куу өчен сәбәп була алмый дип ышандыра. Конфликтны чишү өчен Виканың әти-әнисе, балалар оешмасы мөдире, район башкарма комитеты һәм мәгариф бүлеге вәкилләре прокурор бүлмәсенә җыелды. Шунда ук “Татар-информ” агентлыгы да булды. 

Узган елның февралендә бераз авырганнан соң Сергей Заворохин кызын кабат бакчага алып килә. Ләкин тәрбияче баланы кабул итми һәм аны бакчадан чыгарулары турында хәбәр итә.

Гаҗәпләнгән һәм ачуы чыккан әти кеше бакча мөдиренә мөрәҗәгать итә. Җитәкче шикәр диабетлы баланы кабул итә алмавын аңлата. Көненә берничә тапкыр – ашар алдыннан һәм ашаганнан соң кызның канындагы шикәр күләмен үлчәргә, инсулин дозасы исәпләргә, туклануын күзәтеп торырга кирәк. Мөдир сүзләренчә, мондый диагнозлы баланы карау өчен шәфкать туташының тәҗрибәсе җитәрлек түгел.

“Без балалар бакчасына чиратка басканда авыру турында белми идек әле. Яшь ярым булганда безгә шикәр диабеты диагнозы куйдылар. Барлык документларны, белешмәләрне һәм медицина киңәшләрен җыйдык. Башта бернинди дә проблема булмады. Мөдир безнең бакчага йөрүебез белән килеште. Күрәсең, соңыннан бакча табибы җаваплылыктан куркып, мөдирне күндергәндер”, - дип сөйләде Виканың әтисе.

Баланы бакчадан чыгарырга җыенулары турында әти-әнине беркем дә кисәтмәгән. Сергей судка мөрәҗәгать итә. Һәм эшне караганнан соң мөдирнең карарын кире кагалар. Ләкин Татарстан Югары суды балалар бакчасы карары яклы булып чыга. Кызның әти-әнисенә бакчада кыска вакытка килү режимын тәкъдим итәләр. Нәтиҗәдә, бала өйдә утыра.

Баланың әти-әнисе ярдәм сорап матбугат чараларына мөрәҗәгать итте. Алар кызлары балалар бакчасында үсә, сәләтләрен ача алыр иде дип ышана.

Кечкенә Виканың тарихы турында журналистлар сөйләгәч тә, Татарстанның күзәтчелек органы башлыгы Илдус Нәфыйков Югары Ослан районы прокурорына әлеге мәгълүматны тикшерергә йөкләмә бирде.

“Балалар бакчасы администрациясенең гамәлләренә хокукый бәя биреләчәк. Нигез булган очракта прокурор реакциясе чаралары күреләчәк”, - дип сөйләде Татарстан прокурорының өлкән ярдәмчесе Руслан Галиев.

Соңрак Татарстанның Бала хокуклары буенча вәкаләтле вәкиле Гүзәл Удачинаның үз тикшерүен башлаганы билгеле булды. Ул табиб күрсәтмәләре булмаганда шикәр диабеты баланы бакчадан чыгару өчен сәбәп була алмый диде. Аның сүзләренчә, һәр балалар оешмасының да бурычы - баланы ашату һәм йоклату гына түгел, ә аңа барлык шартларны да булдыру. Хәтта баланың берәр төрле авыруы булса да.

“Сәламәтлеге белән проблемалар булу-булмавына карамастан, һәр бала да мәктәпкәчә белем алырга хокуклы. Законда каралганча, һәр бала мәктәпкәчә белем белән тәэмин ителергә тиеш. Балалар бакчасында урын булмау гына баш тарту өчен нигез була ала”, - диде Гүзәл Удачина.

Югары Ослан районы прокуроры бүлмәсенә Заворохиннар, балалар бакчасы мөдире һәм район башкарма комитеты җитәкчесе җыелды. Олылар әлеге проблеманы хәл итү өчен киңәшмәләр өстеле янына утырды.

Әти-әни бала тулы көнгә бакчага йөрергә һәм балалар белән аралашырга тиеш дип саный.

“Бала яшьтәшләре белән аралашырга, тукланырга, саф һавада йөрергә, йокларга тиеш. Ни өчен без аны ярты көнгә генә йөртергә тиеш. Һәм ни өчен анда әнисе булырга тиеш? Бу дөрес түгел, бала мөстәкыйльлеккә өйрәнергә һәм яшьтәшләре белән аралашырга тиеш”. – диде Сергей Заворохин.

Югары Ослан районы башкарма комитеты җитәкчесе Ленар Хәкимҗанов фикеренчә, иң башта кызның куркынычсызлыгын кайгыртырга кирәк. Теләсә кайсы мизгелдә балага медицина ярдәме күрсәтерлек шартлар белән тәэмин итәргә кирәк. Ә Ленар Хәкимҗанов сүзләренчә, бакчадагы гади шәфкать туташының табиб-эндокринолог квалификациясе юк.

“Дөресен әйткәндә, бу хәл күпмедер дәрәҗәдә уйлап чыгарылган. Әти-әни балалар бакчасына урнаштырганда диагноз турында әйтми. Бу үзенчәлек кыз бакчага йөри башлагач кына ачыклана. Бүгенге көндә бакча баланы кабул итә алмый. Әти-әнисе баланы тулы көнгә йөртүләрен таләп итте. Без бу адымга бара алмыйбыз, кызның гомере өчен куркабыз”, - дип аңлатты Ленар Хәкимҗанов.

Әлеге конфликттагы бар кешенең дә фикерен тыңлап чыккач, прокурор Василий Егоров кызның әнисенә бакчага эшкә урнашырга тәкъдим итте. Ханым ризалык белдерде. Бакча җитәкчелеге дә каршы килмәде.

Әти кеше бу тәкъдимгә каршы килмәде, тик бакча җитәкчелеге вәгъдәсендә тормаска мөмкин, дип борчуын белдерде.

“Ишеттегезме, алар миңа урам себерүче булып эшкә ураншырга тәкъдим иттек дип прокурорга әйтте? Бу ялган! Мондый хәл булмады. Алар миңа тәрәзә төбендә яки эскәмиядә утырып торырга тәкъдим итте”, - диде Сергей Заворохин.

Ничек кенә булмасын, прокурор тәкъдим иткән вариант барысын да канәгатьләндерде. Хәзер аны барысы да риза булырлык итеп тормышка ашырасы калды.

Югары Ослан районында булган хәлдән соң, Татарстанның Мәгариф һәм фән министрлыгы белән Сәламәтлек саклау министрлыгы инсулинга мохтаҗ балаларга ярдәм итү өчен белем бирү оешмаларындагы табибларга кыскача курслар оештырачагы билгеле булды.

“Курслар ТР Сәламәтлек саклау министрлыгының штаттан тыш баш эндокринологы, КГМА эндокринология кафедрасы мөдире Ваһапова Гөлнара Рифатовна җитәкчелегендә узачак”, - дип хәбәр иттеләр Мәгариф министрлыгының матбугат хезмәтендә 


  Без Инстаграмда

Фикерләр








Җәмгыять

"Татарча лайфхак": Журналист Рәйсә Борһаниева тиз арада үз кулың белән чәчәк бәйләмен ясарга өйрәтә

Чәчәк бәйләмен ясауны күпләребез чәчәк кибетендә эшләүчеләргә тапшыра. Чөнки күпләр чәчәк бәйләмен ясауны һәркем булдыра алмый дип саный. Журналист һәм PR-менеджер Рәйсә Борһаниева “Татар-информ” хәбәрчесенә ярты сәгать эчендә үз куллары белән чәчәк композициясен ясап күрсәтте һәм әлеге фикернең ялгыш икәнен исбатлады.

Җәмгыять

"Әни кулында курчак идем"

Ана күңеле балада, бала күңеле далада дип әйтергә ярата халык. Дөрестән дә шулаймы соң әти-әни һәм бала арасындагы мөнәсәбәтләр? Әти-әни гел дөресен әйтә, балага бары яхшылык кына тели, дибез. Барлык әти-әни эшләгән эш, яисә киңәш дөресме соң?  

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла