Сәламәтләндерү лагереннан – хастаханәгә: Кырымга ял итәргә киткән Татарстан балалары агуланган

19 июль 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Динара ПРОКОПЬЕВА, sntat.ru
Фото: «Татар-информ» архивы
Кырымның «Лучистый» лагеренда ял итүче иллегә якын бала һәм биш вожатый ризык белән агуланып хастаханәгә эләкте. «Татар-информ» агентлыгы хәбәрчесе әлеге гадәттән тыш хәл турында соңгы мәгълүматларны туплады.

Агуланган балаларның беренче төркеме медицина пунктына 15 июльдә үк мөрәҗәгать иткән

Кырымдагы «Лучистый» балалар сәламәтләндерү лагеренда өченче профиль сменасы уза. Анда Татарстаннан 200гә якын бала һәм 20гә якын педагог катнаша. Смена 8 июльдә башланган, 15 июльдә кичке аштан соң лагерь медпунктына тәүге мөрәҗәгать килгән. 16 июльдә төнге өчләр тирәсендә балалар һәм педагогларда агулану симптомнары (косу һәм диарея) күзәтелә башлаган.

Посмотреть эту публикацию в Instagram

Публикация от Sonya Vorontsova(@s.vorontsova)

Евпатория шәһәр хастаханәсенә 56 кешене (51 бала һәм биш вожатый) китергәннәр. Пациентлар хастаханәнең йогышлы авырулар бүлегендә дәвалана, хәлләре уртача. Аларга тиешле бөтен ярдәм күрсәтелә, тормышларына бернинди дә куркыныч янамый, дип хәбәр итте Кырым Республикасы Сәламәтлек саклау министрлыгының баш штаттан тыш балалар инфекционисты Людмила Прокудина.

Вәзгыять Татарстан Президенты һәм республика сәламәтлек саклау министрының шәхси контролендә

Татарстан Президенты Рөстәм Миңнеханов балаларның хәле турында аңа оператив төстә хәбәр итеп торырга йөкләмә бирде. «Лучистый» лагерендагы вәзгыятьне шулай ук Татарстан сәламәтлек саклау министры Марат Садыйков та шәхси контроленә алды.

«Министрлык Кырым Республикасындагы коллегалар белән тыгыз бәйләнештә тора. Алар Татарстан табибларына лагерьдан китерелгән балаларның хәле турында оператив рәвештә мәгълүмат бирә», - дип хәбәр иттеләр ТР Сәламәтлек саклау министрлыгының матбугат хезмәтеннән.

Роспотребнадзорның ТР буенча идарәсе вәкилләре Кырымдагы коллегалары белән элемтәгә керде. Татарстан белгечләре тиешле бөтен ярдәмне күрсәтергә әзер, дип искәртте Казан Кремленең рәсми вәкиле Лилия Галимова.

Аның сүзләренчә, Кырым хакимияте вәкилләре дә медицина хезмәте күрсәтү буенча эшнең ничек алып барылуы турында татарстанлыларга оператив рәвештә мәгълүмат бирә.

Татарстанның балалар омбудсмены Кырымда агуланган балалар янында булган

16 июльдә Татарстанда Бала хокуклары буенча вәкаләтле вәкил Гүзәл Удачина Евпатория хастаханәсенә балаларның хәлен белергә килде. «Татарстан Республикасында Бала хокуклары буенча вәкаләтле вәкил Гүзәл Удачина хастаханәдә балалар белән очрашты, табиблар белән аралашты», - диде Лилия Галимова.

Тикшерү комитеты «Лучистый» лагерендагы әлеге очрактан соң тикшерү үткәрә

Тикшерү комитеты Кырым лагеренда Татарстаннан килгән балалар агуланганнан соң тикшерү эшен башлады, дип хәбәр иттеләр РФ Тикшерү комитетының Кырым Республикасы буенча идарәсе матбугат хезмәтеннән.

«Евпатория бүлеге хезмәткәрләре тарафыннан балигъ булмаган балалар агуланып хастаханәгә китерелгәннән соң тикшерү үткәрелә. Әлеге хәлне ачыклауга юнәлдерелгән чаралар күрелә», - дип белдерделәр Тикшерү комитетында.

Агулануның сәбәбе - норовирус

Роспотребнадзорның Кырым Республикасы һәм Севастополь буенча Төбәкара идарәсе хезмәткәрләре Татарстан балалары һәм педагогларының агулану сәбәбен билгеләде. Хастаханәгә беренчеләрдән булып мөрәҗәгать итүчеләрне тикшерү нәтиҗәләре күрсәткәнчә, агулануның сәбәбе – норовирус. Ведомствода искәртүләренчә, инфекциянең чыганагы әлегә ачыкланмаган.

«Инфекция чыганагын һәм аны тапшыру факторларын билгеләү максатыннан лаборатор тикшеренүләр комплексын үткәрү дәвам итә. Дезинфекция чаралары комплексы гамәлгә ашырыла», - дип ачыклык керттеләр матбугат хезмәтендә.


Эксперт: Организм норовирусны ротовируска караганда җиңелрәк кичерә

Вирус-эчәк инфекциясе дип йөртелә торган ротовирус кебек үк, норовирус та вируслы диарея өзлегүенең сәбәбе булып тора, диде ТР Сәламәтлек саклау министрлыгының йогышлы авырулар буенча баш штаттан тыш белгече Халит Хәйретдинов.

«Норовирус ротовирус инфекциясеннән аерылып тора. Ротовирус вакытында авыр формаларның да үсеш алуы мөмкин. Организм норовирусны ротовируска караганда җиңелрәк кичерә, - диде табиб.

Эчәк гөмбәсе буларак билгеле норовирус белән күбесенчә коллективлардагы балалар авырый.

«Норовирус кискен гастроинтерит рәвешендә уза, ягъни кешенең температурасы күтәрелә, әледән-әле костыра, әмма ахыры һәрвакытта да яхшы тәмамлана. Бер-ике көннән соң симптомнар бик тиз юкка чыга. Өзлегүләр булмый диярлек», - дип искәртте Халит Хәйретдинов.

Аның әйтүенчә, әгәр балаларга әлеге авыруның җиңел формасы белән чирләүче кешеләр хезмәт күрсәткән булса, алар авыруны сабыйларга йоктыра ала. Әмма бу вариантларның берсе генә.

«Симптоматик рәвештә дәваларга кирәк. Бүгенге көндә бу вируска каршы дарулар юк. Косык һәм сыек тәрәт белән сыеклык бик күп югалу сәбәпле, организм сыеклык белән тулыландырыла. Әгәр авыр форма икән, ул вакытта инфузион терапия үткәрелә һәм төрле сорбентлар кулланыла», - диде белгеч.

ТР Яшьләр эшләре министрлыгы: Балалар салат белән агуланган

Кырымның «Лучистый» лагеренда ял итүче балалар салат белән агуланган булырга мөмкин. ТР Яшьләр эшләре министрлыгының рәсми сайтында шул хакта хәбәр ителә.

«Хәзерге вакытта Роспотребнадзор хезмәткәрләре лагерьда азык-төлек пробасын алды, шулай ук ял итүчеләрнең нәрсә белән агулануын ачыклау максатыннан тиешле анализлар үткәрде. Бүгенге көндә балалар лагерьда ротовирус инфекциясе йоктырган дигән фараз икенче планга күчкән, ял итүчеләрнең салат белән агулануы төп сәбәп буларак карала», - диелә министрлык сайтында.


  Без Инстаграмда

Фикерләр








Җәмгыять

"Баламны матурлык конкурсында катнаштыру өчен тугыз мең сум акча сорадылар"

Җиткән кызларны гына түгел, сабый кызларны да матурлык конкурсларында катнашырга чакырган игъланнар күргәнегез бардыр. Әлбәттә, һәр ата-ананың кызын иң матуры итеп күрәсе килә, шуңа андый конкурслар ымсындыра да. Тик аны-моны уйламый гына ризалык бирмәгез. 

Җәмгыять

Республика көне: TAT CULT FEST, бизәлгән Ниагара шарлавыгы, гармунчылар маршы һәм космостан чәкчәк

Бүген Татарстан халкы Республика һәм Казан шәһәре көнен бәйрәм итә. 1990 елның 30 августында суверенлык турында декларация кабул ителүгә 29 ел. "Татар-информ" бүген узган чараларга күзәтү ясады.

Җәмгыять

“Күбәләк кебек очып йөри иде”: Буа районында биш яшьлек бала коега төшеп һәлак булган

28 август киче Буа районы Ырыңгы (Рунга) авылында яшәүче Скворцовлар гаиләсенә зур кайгы китерә. Төпчек кызлары, биш яшьлек Елена ике метр тирәнлектәге коега егылып төшеп, аянычлы һәлак була. Моңарчы гел су алган коедан баласын тартып чыгарасын гаилә башлыгы Олег Скворцов күз алдына да китермәгәндер, мөгаен.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла