Мамадышта яшәүче Артур: “Ел саен буем кими, хәзер 1 метр да 3 сантиметрга калдым”

8 ноябрь 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Зәмирә СӘМИГУЛЛИНА
Фото: Артур Афанасьев
Мамадыш районында бик тә үзенчәлекле кеше яши. Керәшен егете Артур Афанасьевка 29 яшь. Буе ун ел элек метр да 15 сантиметр булган. “Ел саен кыскарам, менә быел метр да 3 сантиметрга гына калдым”, – ди ул. Аның авырлыгы хәзер 32 килограмм. Әмма төшеп калган егет түгел Артур - ут яндырып яши.

Буем кечкенә дип һич кенә дә күңелсезләнеп утырырга вакыты юк Артурның. Җырларга, спектакльләр уйнарга, КВНнарда чыгыш ясарга ярата. 

– Авылда үскәч микән, күбрәк авыл турында җырларга да, тыңларга да яратам. Мәдәни чараларга чакырып кына торалар, якын итеп, үз итеп сөйләшәләр, якты йөзләре, якын итүләре өчен рәхмәт, – ди. 

Өч ел элек Казанда шәхси күчмә циркта да эшләп алган. 

– Пычак, лезвие, пыялалар ярдәмендә фокуслар күрсәтә идем. Әмма өч кенә ай эшләдем дә, түләү булмагач, аннан киттем, – ди Артур. – Спортны бик яратам. Авыр атлетика төре белән шөгыльләнәм. Яткан хәлдә 70-75 килограммлы штанганы күтәрә алам. Гер спортын да үз итәм. 16 килограммлы герне 15-20 тапкыр күтәрәм. Чаңгыда йөрергә, футбол уйнарга яратам, шашка-шахмат уйныйм. Татарстан буйлап ярышларга чыгабыз. Миңа кешеләр арасында булу рәхәтлек бирә, аралашам, яңа дуслар табам, бик күңелле яшим, – ди егет.

Артур моңарчы үз фатирында яшәгән. Әмма хәзер интернатка күченгән.

–  Фатирда бар уңайлыклар да бар иде. Тик көн саен ризык әзерләү дә кыенрак. Туганнарга да комачаулык тудырасым килмәде. Уйладым да Шәдче авылындагы картлар һәм инвалидлар интернатына килдем. Монда бик яхшы каршы алдылар. Берүземә бер бүлмә, телевизор, суыткыч үземә аерым. Авырып китсәм дә табиблар янымда гына, барысы да ярдәм итәргә генә тора, тормышымнан канәгать. 

Күңелсезләнергә һич вакыты юк егетнең. “Табигатьне бик яратам, көндезләрен табигатьтә йөрим, балык тотам. Кичләрен Шәдче авылы мәдәният йортына репетициягә барам”, – ди. Репетициягә йөрүләр заяга узмаган. Бу елның сентябрендә “Казан ярминкәсе”нең “Актив озын гомер” күргәзмәсендә узган бәйгедә катнашып, “Вокал” буенча беренчелеккә чыккан.

Мамадышта “Забота” халыкка социаль хезмәт күрсәтү комплекслы үзәге белгечләре, инвалидлар җәмгыяте белән берлектә “Чүлмәк ясау кәсебе” проекты эшләп килә икән. Артур шунда балчыктан чүлмәкләр, вазалар ясарга йөри. “Бик кызыклы шөгыль, белмәгәнебезне өйрәтәләр”, – дип сөенә. 

Артур Афанасьев Мамадыш районының Ташлыяр авылы егете. Гаиләдә өч бала – апасы, энекәше һәм Артур үсәләр. Язмыш сөеп кенә яшәмәгән аларны: егерме өч ел элек әтиләре Василий дәдәй, алты ел элек әниләре Венера ханым вафат булган. Артур башлангыч сыйныфны мәктәпкә йөреп укыган, бишенче сыйныфтан өйгә килеп укытканнар. “Бигрәк тә физкультура, тормыш иминлеге нигезләрен фәнен яратып укый идем. Башкалардан артта калырга тырышмадым”, – ди егет.

Артур район башлыгы Анатолий Иванов белән

– Әти-әниемне бик сагынам. Әти үлгәндә миңа алты яшь кенә иде. Кечкенә булсам да хәтерлим. Бик оста гармунда, баянда уйный иде әти. Балаларны бик яратты, мине бигрәк тә яратты. Әнием дә бик игелекле иде. Фермада сыерлар сауды. Илле яше дә тулмады, үлеп китте 

–Авылдан килгәч тә Мамадышның үзендә яшәүчеләргә ияләнүе бераз кыенрак булды. Урамда бармак төртеп узучылар, бигрәк тә балалар көлеп карый иде. Әмма мин күңелемне төшермәдем, хикмәт буйда түгел бит, иң мөһиме күңелең яхшы, йөзең ачык булсын. Сәхнә киемнәремне заказ белән тектерәләр. Көндәлеккә кия торганнарын да Казаннан заказ биреп тектертәм. 32-36 размерлы аяк киеме киям. 

Шат күңелле, һәркемгә ачык күңелле Артурның дуслары да бик күп. Сәламәт булып та күңел төшенкелегенә, ялкаулыкка бирелгән, эчкечелеккә башын салган бик күпләргә үрнәк бу кыска буйлы егетнең активлыгы.






  Без Инстаграмда

Фикерләр








Җәмгыять

“Алты бала әтисе Изге Җомга көнне иң изгеләрдән булып китеп тә барды”. Мөслим имам-мөхтәсибе фаҗигале рәвештә вафат

Исән чакта, аяклар йөреп, күзләр күреп торганда беркөнлек дөньяның кадерен белеп, булганына Аллаһка шөкер әйтеп, куанып яшәргә кирәк дип юкка гына әйтмиләр шул. Күңеле чәчәк атып, балаларының бәхетен күреп яшәгән кешенең якты бәхет кояшы кара пәрдә белән каплана. Бәхетле дөнья, кояшлы тормыш бер мизгел эчендә челпәрәмә килә. Бүген иртәнге сәгать 7-8 тирәсендә Мөслим имам-мөхтәсибе Габделкәрим хәзрәт Моратов, алты баласын калдырып, фаҗигале рәвештә һәлак булды. Мәскәү–Уфа трассасының 966нчы километрында “Лада Гранта” автомобиле юл читенә төшеп каплана...

Җәмгыять

Шикәр диабеты аркасында куылган 3 яшьлек кыз балалар бакчасына кире кайтырмы?

Өч яшьлек Вика Заворохинаның шикәр диабеты белән авыруы ачыклангач аны балалар бакчасыннан куалар. Бакча җитәкчелеге үз өстенә җаваплылык алудан курыккан. Ә баланың әти-әнисе әлеге диагноз кызны бакчадан куу өчен сәбәп була алмый дип ышандыра. Конфликтны чишү өчен Виканың әти-әнисе, балалар оешмасы мөдире, район башкарма комитеты һәм мәгариф бүлеге вәкилләре прокурор бүлмәсенә җыелды. Шунда ук “Татар-информ” агентлыгы да булды. 

Җәмгыять

“Күңел тулы үкенеч, өченче баласы туганын күрә алмаячак”

Юллар... Кайларга гына илтмиләр юллар адәм баласын. Соңгы вакытта бер–бер артлы булган юл һәлакәтләре, аларда кешеләрнең авыр тән җәрәхәтләре алулары хакында еш ишетәбез. Коточкыч аварияләрнең нәтиҗәсе аянычлы: вафат булучыларның гомерләрен инде кире кайтарып булмый. Марий Элдагы юл һәлакәтендә "Бөреле" акционерлык җәмгыятенең элекке генераль директоры Алмаз Миңнекәев һәлак булуы турында кайгылы хәбәр күпләрне тетрәндерде. Эш сәфәренә чыгып китә ул, әмма шул китүдән кире әйләнеп кайтмый - юл хәрәкәте кагыйдәләрен тупас бозган йөртүче аркасында һәлак була.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла