Казан Дөнья Чемпионатына әзерләнә: шәхси транспорттан баш тартып, җәмәгать транспортына һәм махсус таксиларга күчү киңәш ителә

6 май 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Надежда ГОРДЕЕВА, sntat.ru
2018 елгы Дөнья Чемпионаты вакытында Казандагы стадионнарга ничек барырга һәм шәхси транспортны кайда калдырырга? Уеннар беткәч, халыкны өенә кайтаручылар булачакмы?
Бу хакта Татарстанның транспорт һәм юл хуҗалыгы министрлыгының Транспорт идарәсе җитәкчесе Алексей Сидоров һәм Казан шәһәре башкарма комитетының Транспорт комитеты җитәкчесе урынбасары Марат Хисаметдинов сөйләде.

Аэропорттан һәм тимер юл вокзалларыннан “Казан-Арена” га кадәр автобуслар йөриячәк

  • Татарстанга очкычлар белән килүче кунаклар “Казан” халыкара аэропортына төшә. Аэропортның футбол буенча дөнья чемпионатына әзерлек дәрәҗәсе бик югары. Сәгатенә 1,8 мең кеше уздырырлык куәткә ия булган терминал инде төзелгән. “Пропуск пунктын төзекләндерү эшләре инде төгәлләнде. 16 паспорт контроле өстәле урнаштырылды”, - дип сөйләде спикер.

Чемпионат матчлары узган көннәрдә һәр сәгать саен аэропорттан Казанның 1нче тимер юл вокзалына кадәр тукталышсыз электричка йөриячәк. “Бу вакытта билетлары һәм җанатар паспортлары булган кешеләр өчен анда йөрү бушка булачак. Электричка алты вагонлы булачак, 1,2 мең пассажир сыйдырачак”, - дип билгеләп үтте Алексей Сидоров.

Матчлар уздыру вакытында аэропорттан “Казан-Арена”га һәм “Спорт Сараена” кадәр автобуслар оештырылачак. Элеккечә аэропорттан № 197 автобус йөриячәк.

  • Җанатарларның килүен шулай ук Казанның 1 тимер юл вокзалында көтәләр, анда аларны волонтерлар каршы алачак. Үзәк вокзал аркылы өстәмә 60 китүче һәм 48 килүче поезд хәрәкәте оештыруны планлаштыралар. “Бүгенге көнгә Казан юнәлешенә 80 гә якын урын броньләнгән”, - дип белдерде Транспорт һәм юл хуҗалыгы министрлыгы вәкиле.

Казан-2 вокзалыннан дүрт өстәмә поезд узачак. “Саранскидан һәм Екатеринбургтан транзит белән”, - дип аңлатты Сидоров.


Казан-1 һәм Казан-2 тимер юл вокзалларыннан Кремль һәм Кәҗә бистәсе метро станцияләре аша, Ямашев проспекты буенча Адоратский урамы тукталышына кадәр 48 шаттл хәрәкәте оештырылачак. Монда йөрү бушка булачак. “Әлеге автобусларга чемпионат символикасы ясалачак. Ул, матчка билет булу-булмауга карамастан, барлык пассажирлар өчен дә бушлай булачак”, - дип сөйләде Казан шәһәре башкарма комитетының Транспорт комитеты җитәкчесе урынбасары Марат Хисаметдинов

Җәмәгать транспорты хәрәкәте чикләнәчәк

Футбол матчы узган көннәрдә транспорт хәрәкәтен чикләү планлаштырыла. Җәмәгать транспорты хәрәкәте схемасы да үзгәрәчәк. 

  • Ямашев проспекты буйлап транспорт өчен борылма юллар булдырылды, Адоратский һәм Арбузов урамнары яклап пассажирларны утырту һәм төшерү зоналары билгеләнде.

Хәрәкәт чикләнгән очракта, автобуслар, троллейбуслар һәм трамвайлар соңгы тукталышларыннан Ветеринар академия һәм Ямашев проспекты буенча Адоратский урамы тукталышларына кадәр барачак.

“Казан-Арена” стадионы аша узучы транзит пассажирлар әлеге тукталышларда төшеп, киләсе тукталышка кадәр җәяү барып, үз маршруты буенча хәрәкәт итүче җәмәгать транспортына утырырга тиеш була. Арбузов урамы ягына барганда, пассажирларны төшерү Адоратский урамы ягыннан, ә утырту – Ветеринар академия янында була. Әмирхан проспекты ягына барганда – киресенчә”, - дип аңлатты Марат Хисаметдинов.


  • Миллениум күпере, Ленин дамбасы, Ершов һәм Себер тракты урамнары буйлап узучы маршрутларга утырып, күчеп утыруларсыз гына да кирәкле урынга барып җитәргә була.
  • №6 трамвай маршруты хәрәкәт чикләү вакытында ябылып торачак. Троллейбус маршрутлары схемасы шулай ук үзгәрәчәк. №2 маршрут Сәламәтлек комбинатыннан Адоратский урамына кадәр барачак. “Совет районына кадәр барырга кирәк булган пассажирлар, “соңгы мильне” узганнан соң №7 троллейбуска күчеп утырып хәрәкәтләрен дәвам итә алалар”, - дип сөйләде Транспорт комитеты җитәкчесе урынбасары.
  • №2 маршрутның Ветеринар академия тукталышыннан Совет районы юнәлеше буенча хәрәкәте ябылачак. Шулай ук, №13 маршрут кыскара, аерым алганда, Ленинград урамыннан Адоратский урамына кадәр барачак. Ветеринар академиядән Халитов урамына хәтле хәрәкәт ябылачак.
  • Моннан тыш, №2 һәм №13 троллейбуслар хәрәкәте футбол матчы беткәннән соң ябылачак.

Матчлар тәмамланганнан соң, җәмәгать транспорты эше өч сәгатькә озынайтыла

Матчлар беткәннән соң, тамашачыларны тарату өчен 400 гә якын автобус, өч секцияле 20 трамвай һәм 10 троллейбус эшләячәк. 130 автобус һәм 19 трамвай Ямашев проспектында һәм өстәмә 10 троллейбус Адоратский урамында урнаштырылачак.

“Казан” гаилә үзәге янындагы җанатарлар мәйданында эш төгәлләнгәч, җәмәгать транспорты белән тамашачыларны кайтару Энергетика университеты һәм Кәҗә бистәсе метро станциясе тукталышларыннан оештырылачак. Әлеге тукталышлардан уза торган маршрутларның эш вакыты 14 июньнән 15 июльгә кадәр 24 сәгатькә хәтле озынайтыла”, - дип билгеләп үтте Марат Хисаметдинов.

Җәмәгать транспортының эш вакыты матчлар беткәннән соң, өч сәгатькә озынайтыла. 20 һәм 24 июньдә, 6 июльдә, уеннар 21:00 сәгатьтә башланганда, “Казан-Арена” стадионы һәм метрополитен тирәсендә, җәмәгать транспорты алдагы тәүлекнең 02:00 сәгатенә кадәр эшләячәк.

FAN ID  һәм матчка алынган билет белән транспортта бушка йөреп булачак

Матч узган көннәрдә транспортта бушка йөрү хокукына уеннарга һәм FAN ID га керү билеты күрсәткән пассажирлар ия булачак.

“Шулай ук волонтерлар һәм аккредитацияләнгән бейджиклар буенча FIFA группасы клиентлары бушлай йөри алачак. Әлеге документларның берсе генә дә булмаса, бушлай йөрү рөхсәт ителми”, - дип аңлатты Марат Хисаметдинов.


Алексей Сидоров белдергәнчә, волонтерлар өчен бушка йөрүнең вакытын кыскарту яңалык булган. Конфедерацияләр Кубогы вакытында алар беренче уен башланганчы бер ай һәм соңгы уен тәмамланганнан соң тагын бер ай бушлай йөрделәр. Ләкин быел волонтерлар беренче уенга кадәр бер ай һәм соңгы уеннан соң ун көн бушка йөри алачак.

Шәхси транспортта йөрүдән баш тартырга туры киләчәк

Матчлар узган көннәрдә казанлыларга шәхси транспортларында йөрүдән тыелып торырга кушалар. “”Чикләү вакытында стадионнарга якын урамнарга трафик үсәчәк һәм бөкеләрнең кире кайтуын да исәпкә алырга кирәк”, - дип билгеләп үтте Хисаметдинов.

“Чикләүләр, махсус пропусклар белән җиһазландырылган транспорттан тыш, барлык транспорт чараларына да кагыла. Шулай ук, спорт ярышлары маршрутына пассажирлар һәм йөк ташучы транспорт чараларына, экстрен һәм оператив хезмәтләргә, велосипедларга чикләүләр булмаячак”, - дип өстәде ул.


Шәһәрнең кайсы өлешләрендә һәм кайсы вакытта чикләүләр гамәлдә булачагын казанлылар Башкарма комитет карарыннан укып белә алачак. 

“Соңгы миль” гә килгәндә, Конфедерацияләр Кубогыннан аермалы буларак, ул тагын Чистай һәм Сибгат Хәким урамнарын да үз эченә алачак. “Бу клиентлар группасы узу белән бәйле. “Казан-Арена” стадионы һәм “Чаша” арасында җанатарлар өчен ирекле йөрүне тәэмин итү өчен кирәк, шуңа күрә чикләү зонасы киңәйде”, - дип аңлатты Казан Башкарма комитетының Транспорт комитеты җитәкчесе урынбасары.

Чикләү зонасында, аккредитацияләнгән транспорттан тыш, башка бернинди дә транспорт чарасы булырга тиеш түгел. “Сәүдә үзәкләрендәге, метро станцияләрендәге парковкалардан кулланырга киңәш итәбез. Билетлар белән җәмәгать транспортында йөрүнең бушлай икәнен исәпкә алсак, хәтта күчеп утырулар белән дә стадионга бернинди проблемасыз барып җитәргә була”, - дип белдерде Марат Хисаметдинов.

Шәһәрдә барлыгы 11 мең 430 машинага исәпләнгән сигез парковка эшләячәк. Нигездә болар зур сәүдә-күңел ачу үзәкләрендәге машина кую урыннары.

Шәһәрдә аккредитация узган таксилар йөриячәк

1 июньгә кадәр Казанда ирекле рәвештә таксиларны аккредитацияләүне узыдырырга планлаштыралар, дип сөйләде Сидоров. Алар турында мәгълүмат рәсми мәгълүмати ресурсларда басылачак. Шулай ук кунакханә хезмәткәрләре һәм волонтерлар да аккредитация узган такси хезмәтләреннән кулланырга киңәш итәчәкләр.

“Шуңа күрә аларга аерым таләпләр куелачак, шул исәптән чит тел белү дә, бу машина йөртүчеләргә дә, диспетчерларга да кагыла. Рөхсәтләрне, йөртүчеләр составын, машинада кондиционер булу, климат-контроль тикшерелә. Күп очракта бу таләпләр үтәлерлек”, - дип аңлатты Транспорт идарәсе җитәкчесе.


Ләкин аккредитация узмаган таксилар да штат режимында эшләүләрен дәвам итәчәкләр.

Фикерләр








Җәмгыять

Аллаһ белән табиб арасында: хәзер реанимацияләргә авыр хәлдәге пациентларның туганнары да керә алачак

Реанимациядәге авыруның терелүенә аның якыннары ничек тәэсир итә? Ни өчен хөкүмәт законлы рәвештә Россиядәге барлык реанимацияләрне ачарга тели? Һәм табиблар моңа ничек карый? “Татар-информ” агентлыгы Казанның зур хастаханәләрендә әлеге һәм башка сорауларга җавап эзләде.

Җәмгыять

Декреттагы хатын-кызлар нинди тозакка эләгергә мөмкин: Татарстанда яңа төр караклык ачыкланган

Татарстанда караклыкның яңа ысулы ачыкланган. Декрет ялындагылар, документлар буенча хезмәт хакларын шактый арттырып күрсәткән эш бирүчеләр белән килешеп, Социаль иминият фондыннан үзләренә йөклелек буенча пособиене тиешле күләмнән күпкә артыграк алганнар. 

Җәмгыять

Фәрит Фарисов: Рус кешеләре татар телен белергә тели, әмма телне дөрес итеп тәкъдим итәргә кирәк

Мәскәү шәһәре татарлары милли-мәдәни мохтарияте рәисе “Татар-информ” агентлыгына биргән интервьюда соңгы вакыттагы актуаль мәсьәләләр - татар теле өчен көрәш, яшь татар лидерлары һәм дуңгыз итен “хәләл” дип сату турында фикерләрен җиткерде.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла