Җиңү көне-2019: Мәңгелек ут, Җиңү парады һәм Үлемсез полк

9 май 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Айдар ӘХМӘДИЕВ, Гөлнар ГАРИФУЛЛИНА. Зилә МӨБӘРӘКШИНА
Фото: Владимир Васильев
Бүген ил Бөек Ватан сугышында Җиңүнең 74 еллыгын бәйрәм итә. "Татар-информ" бүген республика башкаласында узган чараларга күзәтү ясый.
Рөстәм Миңнеханов татарстанлыларны Бөек Җиңүнең 74 еллыгы белән котлады.

"Бүген без һәлак булган каһарман сугышчыларның якты истәлегенә баш иябез, арабызда яшәүче фронтовикларга һәм тыл хезмәтчәннәренә тиешенчә олылау һәм зурлау күрсәтәбез. Хөрмәтле ветераннар, батыр, хезмәт сөючән, зирәк булганыгыз, республикабыз тормышында актив катнашуыгыз өчен сезгә бик зур рәхмәт! Озын гомерле булыгыз!

Безнең туган җиребез башка беркайчан да сугыш афәтен күрмәсен, хатыннар һәм әниләрнең, балаларның кайгы-хәсрәттән күңеле сызмасын! Ватаныбыз,геройлар васыять иткәнчә, хөрлектә һәм тынычлыкта яшәсен!

Сезгә чын йөрәктән бәхет, игелек һәм иминлек телим! Бөек Җиңү бәйрәме мөбарәк булсын!", - диелгән Татарстан Президенты Рөстәм Миңнехановның котлавында.

Җиңү Паркында чәчәкләр салу

Татарстан Республикасы Президенты Рөстәм Миңнеханов мәңгелек ут каршына чәчәкләр салды. Бөек Җиңү көненә багышланган тантана Җиңү паркының Дан мемориалы колоннадасында узды.

Рөстәм Миңнеханов мәңгелек утка чәчәкләр салу тантанасында катнашты

Чарада шулай ук Татарстан Республикасы Премьер-министры Алексей Песошин, Татарстанның беренче президенты, Дәүләт Киңәшчесе Минтимер Шәймиев һәм Казан мэры Илсур Метшин катнашты.

Сугышта һәлак булганнарны искә алу

Татарстан депутатлары Бөек Ватан сугышында һәлак булганнарны искә алды

Татарстан Дәүләт Советы депутатлары Казанның Архангел зиратында Бөек Ватан сугышында һәлак булганнарны искә алды.

Тантанада катнашучылар «Сугышчы» монументына, шулай ук сугыш вакытында Казан госпитальләрендә һәлак булган чит ил сугышчыларының истәлекле билгесенә веноклар һәм чәчәкләр салды. Веноклар салу корал залплары белән үрелеп барды. Россия һәм Татарстан гимннары яңгырады.

«Без ветераннарга 1945 елда җиңү яулаганнары өчен рәхмәт әйтергә телибез. Фронтта яралардан һәлак булганнар, бүгенге көнгә кадәр яши алмаганнарны искә алырга телибез», — диде Татарстан Дәүләт Советы Рәисе урынбасары Юрий Камалтынов.

Җиңү парады

Иң элек тантанада катнашучылар РФ Президенты Владимир Путинның Җиңү көне белән котлавын туры эфирдан күзәтте. Ул күпләрнең сугышка мәктәп баскычыннан ук китеп, гаилә кору, балалар туу бәхетен күрә алмаганын билгеләп узды. Илбашы чыгышыннан соң, яу кырында ятып калган солдатлар рухына бер минут тынлык игълан ителде. Аннан соң Россия Федерациясе гимны яңгырады. 

Җиңү бәйрәме белән тәбрикләп, ТР Президенты Рөстәм Миңнеханов мөрәҗәгать итте. “Хөрмәтле парадта катнашучылар, ветераннар, тыл хезмәтчәннәре, Казан гарнизоны гаскәрләре хәрбиләре! Сезне халкыбызның олы бәйрәме – Бөек Җиңү көне белән чын күңелдән тәбрик итәм. 9нчы май - илебезнең даны һәм горурлыгы, иң якты һәм мөһим бәйрәмнәрнең берсе, шул ук вакытта мәңгелек хәтер көне. Бәйрәм асылында халкыбызның батырлыгы, сынмас рухы, какшамас ышанычы, Ватанга, туган җиренә булган чиксез мәхәббәте ята", - диде.

Президент чыгышыннан соң өч тапкыр "Ура!" кычкырып, Казан гарнизоны гаскәрләре парады бшланды. Аны Казан Суворов хәрби училищесында тәрбияләнүчеләр ачып җибәрде.

Алар артыннан мәйдан буйлап Бөек Ватан сугышы фронтлары штандартларын күтәргән хәрбиләр, Казан югары хәрби команда училищесы курсантлары һәм офицерлары, Казан юридик институты курсантлары, кадет мәктәп-интернатларында тәрбияләнүчеләр, ТР буенча эчке эшләр органнары хезмәткәрләре һәм башкалар марш белән атлады. Парадта барлыгы 2 меңгә якын кеше, 17 берәмлек хәрби техника катнашты.

Соңыннан мәйдан буйлап ретро автомобильләр үтте. Бөтен мәйдан күмәкләшеп сугыш тематикасына җырлар башкарды. Бәйрәм балалар коллективларының чыгышлары белән дәвам итте.

Сугыш инвалиды Гали Гарифуллин сугышка 20 яше тулыр-тулмас киткән. "Бөтен Европаны, Германия, Польша, Словакияне йөреп чыктым. Барысына да туры килдем инде, немецлар кулына әсирлеккә дә эләктем, яндырырга алып барганда, аннан да качтым", - дип сөйләде ул.

Җиңүче сугышчыга һәйкәл куелачак

Бөек Җиңүнең 75 еллыгына Җиңүче-сугышчыга һәйкәл проектына бәйге игълан ителә. Бу хакта бүген Казанның Меңьеллык мәйданында Җиңү парадында ясаган чыгышында Татарстан Президенты Рөстәм Миңнеханов әйтте.

  • 1941-1945 елгы Бөек Ватан сугышына речпубликадан 700 меңләп кеше сугышка киткән, аларның яртысы яу кырында ятып калган. Якташларыбызның 200 меңе - орден һәм медаль иясе, 250 дән артыгы Советлар Союзы Герое һәм Дан орденының тулы кавалерлары булган.

"Үлемсез полк"

Быел "Үлемсез полк" акциясендә катнашучылар саны буенча рекорд куелган. “Акциядә былтыр 165 мең кеше катнашкан булса, быел бу йөрешкә 169 мең кеше килде. Татарстанда исә "Үлемсез полк"та 377 кеше катнашкан.

Татарстан Президенты Рөстәм Миңнеханов “Үлемсез полк” акциясенә һәр елдагыча әтисенең абыйсы, 1941 елда һәлак булган Галимҗан Миңнехановның портреты белән чыкты. 

  • Галимҗан Миңнеханов 1922 елның 28 июнендә ТАССРның Тәкәнеш районы Әбде авыл Советының Игенче авылында туа. ТАССР Саба районы Татар Икшермәсе авылында тулы булмаган урта мәктәпне тәмамлый. 359 укчы полкы составында сугыша. 1941 елның 15 декабрендә һәлак була, Мәскәү өлкәсе Морево авылы тирәсендә җирләнгән. 

Президентның улы Искәндәр әнисе ягыннан бабайсы - Бари Сафиуллин портретын күтәргән иде. 

Татарстанның беренче Президенты, Дәүләт Киңәшчесе Минтимер Шәймиев әтисе - Шәрип Шәймиев портреты белән чыккан.

“Үлемсез полк” хәрәкәтендә катнашучылар Ирек мәйданы - Карл Маркс урамы – Лобачевский урамы – Кремль урамы – Беренче май мәйданы – Меңьеллык мәйданы аша узды.

  • "Үлемсез" һәм "Георгий тасмасы" Бөтенроссия акцияләрен Россия халкының 94 һәм 92% тулысынча яисә өлешчә хуплый. Superjob.ru рекрутинг порталының тикшеренү үзәге үткәргән сораштыру нәтиҗәләре әнә шундый.

“Үлемсез полк” хәрәкәте катнашучысы: Бүгенге полк – әби-бабаларга рәхмәт әйтү

Казанда үтүче “Үлемсез полк” хәрәкәте катнашучысы, татар филологиясе студенты Зәйнәп Шаһвәлиева бүгенге йөреш – әби-бабаларга рәхмәт әйтү дигән фикердә. Зәйнәп Шаһвәлиева “Үлемсез полк”ка туганнан туган апасы белән килүен әйтте. “Без бу чарада бишенче ел катнашабыз. Шәһәрдә шундый зур вакыйга үткәрелгән көнне без сугышта катнашкан ветераннарны хөрмәт итеп, данлыйбыз”, - дип сөйләде ул.

Зәйнәп Шаһвәлиева бүген зур дәү әтисе – Габделгазиз Камаловның портретын тотып килгән. “Ул да вәхшәтле сугышта катнашкан. Кызганыч, аны вакытында данламыйлар. “Бу йортта сугыш ветераны яши” дигән такта да элмиләр. Чөнки ул фашистларның әсирлегенә эләккән була”, - диде ул.

Студент илебезнең тарих битләрен дәвам итүгә барлык көчләрен куйган ветераннарның исемнәрен белү, аларны тану – төп бурыч дип исәпли. “Без тарихыбызны белергә һәм киләчәктә мондый афәтләр кабатланмасын өчен барлык көчебезне куерга тиеш”, - диде ул.

Татарстанның атказанган артисты Айгөл Бариева Казанда үтүче “Үлемсез полк” йөрешен сугышта катнашкан өлкән буынны онытмау чарасы булуын әйтте. 

Айгөл Бариева “Үлемсез полк” акциясен әби-бабаларны онытмау чарасы дип атады

“Минем өчен “Үлемсез полк” акциясе – мәңгелек хәтер. Әлеге чарада без балаларыбызга, оныкларыбызга сугышта катнашкан әби-бабаларыбызны онытмавыбызны күрсәтәбез. Җиңү көнен берничек тә онытып булмый. Без дәү әти, дәү әниләребезгә бик тә рәхмәтлебез”, - диде җырчы.

Быел Айгөл Бариева “Үлемсез полк”та икенче тапкыр гаиләсе белән катнаша. Җырчы әтисенең әтисе – Мәсгут Бариев портретын алып чыккан. “Ул гвардиядә кече сержант булган. Бабам хәрби солдатлар төркеме белән күзгә-күз очраша, өчесен үтерә, калган өчесен пленга ала. Моның өчен аңа “Батырлык өчен медаль” тапшыралар”, - диде Айгөл Бариева.

“Яшьләр олы кешеләрне ихтирам итеп, аларга һәрвакыт рәхмәтле булып, тарихыбызны онытмыйча яшәсеннәр иде дигән теләктә калам”, - дип сөйләде җырчы.

  • Бүгенге бәйрәм чараларына сәгать кичке 10да бәйрәм салюты нокта куячак. Һавага җибәреләчәк залплар һәммәбезгә Бөек Җиңүнең югары бәһасен искә төшерәчәк.
"Үлемсез полк" акциясеннән фоторепортаж 


  Без Инстаграмда

Фикерләр








Җәмгыять

Уральскидагы Тукай музее директоры Марат Баһаветдинов: “Без Тукайны онытмадык”

Чал тарихлы Уральск шәһәрендәге тырыш, уңган, кунакчыл татарлар телне һәм тарихи хәтерне саклап калу уе белән янып яши. Бигрәк тә халкыбызның бөек улы Габдулла Тукай белән горурлана алар. Аның исемендә шәһәр дә урам, музей, һәйкәл дә булдырылган.

Җәмгыять

Күп балалы гаиләләрнең ипотекасын дәүләт түләячәк: 450 мең сум компенсацияне ничек алырга?

Россиядә күп балалы гаиләләргә ярдәм итүнең яңа чарасы кабул ителде. Башта вакыты чикләнмәгән 6 процентлы ипотека ставкасы билгеләделәр. Ә хәзер ипотеканы түләү өчен ана капиталы белән чагыштырырдай сумма бирәләр. Әлеге өстәмә 450 меңгә кемнәр өметләнә ала һәм аны алу өчен нәрсә эшләргә кирәк? Бу хакта тулырак “Татар-информ” репортажында.

Җәмгыять

Рөстәм Усманов, “Газпром трансгаз Казан”: “Безнең коллектив иң җитди бурычларны да чишә һәм яңа үрләр яулый ала”

Компаниянең хәзерге өстенлекләре, Татарстан җитәкчелеге белән хезмәттәшлек планнары, кадрлар политикасы һәм оешманың хәзерге казанышларында профессионалларның роле турында журналистлар белән аралашкан вакытта ООО “Газпром трансгаз Казан” генераль директоры Рөстәм Усманов сөйләде.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла