Футболкага бизәк төшерү бизнесы: бер көнгә - бер мең сум

11 апрель 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Зәмирә СӘМИГУЛЛИНА
Фото: Алия Нәфыйкова
Яшь кенә булуга карамастан, үзләренә кәсеп итү өчен шөгыль табарга өлгергән егет-кызлар күп булуы сөендерә. Сарман районы Сарман авылы кызы Алия Нәфыйкованың киемнәргә төшергән бизәкләре үзләре серле, үзләре милли.

Алия Казан дәүләт мәдәният һәм сәнгать институтында текстиль дизайнер буенча белем алган. Бүгенге көндә дә белемен камилләштерү юнәлешендә. Шул ук институтта декоратив-гамәли сәнгать һәм дизайн укытучысы бүлегендә өстәмә өйрәнүләр үтә.

–Тугызынчы сыйныфта укыганда, яшьләр арасында Британия байрагы төшкән футболкалар кию популярлашып китте. Мин дә үземә шундыйны алырга теләдем, ләкин авылда яшәү һәм акча булмау сәбәпле, Британия байраклы футболка ала алмадым. Акча булса да, авыл кибетләрендә ул вакытта мондый футболка сатылмады да. 

Тик мин моның альтернатив вариантын таптым. Ак футболка сатып алдым һәм байракны үзем ясарга булдым. Шуннан киемнәргә бизәк төшерергә кызыксынуым башланды. Дусларымның, сеңлемнең, әниемнең киемнәренә дә рәсемнәрне ясадым. Шөгылемне институтның икенче курсында укыганда практика үткәндә ныгыттым, – дип сөйли хыялый кыз.

Алия татар милли бизәкләре белән ныклап торып практика узган вакытта кызыксына башлый.

– Бизәкләрне, гадәттә, Фоат Вәлиевнең “Татарский народный орнамент” китабыннан алам. Ләкин нәкъ андагы кебек ясамыйм, һәрберсен үзгәртергә, кабатланмас итәргә тырышам. Илһам килгәндә үзем дә уйлап чыгарам, – ди Алия.

Футболкага бизәк төшерүнең үз тәртипләре дә бар икән. Әлеге эш өчен тукыма буйый торган акрил буяулар, пумала, киҗемамык футболка, футболка эченә аслык (буяулар, сыек булу сәбәпле, тукыманың икенче ягына да чыгарга мөмкин, футболканың икенче ягы пычранмасын өчен мөһим) кирәк. Футболка урынына күңелең ни тели шуны сайларга була: күлмәк, свитшот, чүпрәк аяк киеме, сумка - кыскасы, бизәкне кая төшерәсең килә. 

Иң беренче эш итеп, эскизлар ясала. 

– Кәгазьгә берничә төрле бизәк төшерәм, күңелемә охшаганын сайлыйм. Киләсе эш трафаретлар ясау һәм карандаш яки юыла торган каләм белән аларны футболкага төшерү. Ә иң җаваплысы һәм мавыктыргычы - акрил буяулар ярдәмендә бизәкләрне буяу.

– Беренче ясаганда ук син теләгәнчә килеп чыгамы?

– Күбесенчә рәсемнәрем идеаль килеп чыга, бозмыйча эшләргә тырышам. Тик ялгыш кына пумала тиеп киткән чаклар булгалый, андый очракта бозылган урынны каплап, өстенә яңа бизәкләр ясыйм. Акрил тукымада озак тора, кат-кат юарга, үтүкләргә мөмкин. Бернинди дә зыяны юк.

– Бер киемне бизәү күпме вакытны ала?

– Бер футболкага бизәк төшерү бер-ике көн вакытны ала. Тиз арада кирәк булса, бер көн эчендә дә ясап өлгертеп була. Ләкин һәр төр эшнең дә тискәре яклары булган кебек, әлеге эшне дә читләтеп узмый. Көне буе шушы эш белән генә шөгыльләнсәң билләргә төшә, сызлану барлыкка килә.

Алия моның да уңай юлын тапкан: яраткан эшен спорт күнегүләре белән чиратлаштырып эшли.

– Бизәкле киемнәрнең бәясе күпме, заказ бирүчеләрне кайдан табасың?

– Киемнәрнең бәяләре бер мең сумнан башлана. Гадәттә, заказ бирүчеләр мине үзләре таба. Фотосурәтләрне күреп язалар. Моның өчен мин “Инстаграм” һәм “В контакте” социаль челтәрләренә рәхмәтлемен. Айга ничә кием бизәгәнне төгәл генә әйтә алмыйм, төрлечә була.

Алия шулай ук үзенчәлекле итеп открыткалар ясау белән дә шөгыльләнә. Буш вакытларында китаплар укырга ярата. Әлеге эш өчен нинди сыйфатлар мөһим дигәнгә “Теләк, илһам һәм сабырлык”, – ди кыз. 

- Теләк булмаса, нинди генә эшкә тотынсаң да нәтиҗәсенә ирешеп булмый. Сабырлык – һәр эшнең дә алтын баганасы. Кул эшләре белән мавыксаң, иң беренче сабырлыкны тәрбияләргә кирәк. Ә инде иҗат илһамсыз булмый.

Боларны башкару өчен, һәрвакыт эзләнүдә, уйлануда булырга, иҗади фикер йөртергә кирәк. Алиядә бу сыйфатларның барысы да бар, һәр шөгыленә – үз омтылышы.


  Без Инстаграмда

Фикерләр








Җәмгыять

Бөтендөнья хатын-кызлар съезды: нәрсә булды соң бу?

Бөтендөнья татар хатын-кызлары съезды ничек узды дип сорагач, мин хәтта аптырашта калдым. Барысы да шул дәрәҗәдә примитив, хәтта алар өчен оят булып китә. Безнең хатын-кызлармы бу дип әйтәсе килә.

Җәмгыять

Идел буенда трахома эпидемиясе: Татарның күзе кайчан ачылган?

Трахум дигән куркыныч яңгырашлы сүзне ишеткән бар иде. Баксаң, халкыбыз бик күп михнәт чиккән икән бу чирдән. Бутлеров урамындагы Республика офтальмология хастаханәсе белән янәшә бинада Казан офтальмология мәктәбе музее ачылышында шуңа инандым. Бер гасыр элек, Беренче Бөтендөнья сугышы һәм революциягә кадәр үк Идел буе җирлегенә трахома дигән афәт үтеп керә. Казан губерниясендә бигрәк тә тамыр җәя. Казан дәүләт медицина университетының офтальмология кафедрасы доценты Әлфия Ногманова “Татар-информ”га трахоманың халкыбызга китергән зыяны турында сөйләде. Без, шулай ук, музейның үзен дә күреп кайттык.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла