Буа районында гарасат: “Өйгә кермәкче булам, ишегалдында шиферлар очып йөри, чарасызлыктан келәт чатында елап басып тордым”

10 июль 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Чулпан ШАКИРОВА
Фото: Айгөл Хөсниева
Галиҗәнап табигать үзенең шуклыклары белән һаман куркытып, сынап тора адәм баласын. 5 июль көнне Буа районында булган гарасат өч авылга зыян сала. Адав-Толымбай, Мещеряково, Иске Суыксу авыллары халкы бу көнне куркыныч төш кебек хәтерли.

“Аның болыты да җиргә тиеп тора, ялкын кебек иде”

Адав-Толымбай авыл җирлеге башлыгы Айгөл Хөсниева гарасат килгәндә рульдә була.

– 10 минут эчендә җыелып өлгерде ул болытлар. Аның төсе дә әллә нинди, ялкын төсендә иде. Әйтерсең кайдадыр зур пожар. Болытлар да гадәттәгедән түбәнрәк, җиргә якын йөзделәр. Өермәсе дә тиз килде. Тузан бураны, яңгыр, боз, шуларга ияреп агач ботаклары, шифер, калай оча – галәмәт инде. Мин машинада идем. Барып та, туктап та булмый, берни күренми, - дип искә алды авыл җирлеге башлыгы ул көнне.



“Боз 15 минут буе чиләкләп койды”

Айгөл Хөсниева сүзләренчә, Адав-Толымбайда гарасат кагылмаган кеше юк диярлек.

– Клуб түбәсенең 5-6 аралыгын каерып тондырган. Ферма торакларының да түбәсен алып очырган, икмәк киптерә торган бинаны аударган.

 Кемнеңдер рәшәткәсен каерган, аударган, сарай, мунча түбәләрен “чишендергән”. Ут баганалары да ауды, ярый, бәхеткә, артык зыян салмады әле. Анысын электриклар тиз арада сафка бастырды. Агачларны яртылаш сындырган, яшелчәләргә дә зыян килде. Аларны егып, тишкәләп бетергән. Өермәсе озак та булмады үзенең. Әмма бозы 15 минутлар тирәсе яуды. Койды гына хәер! Борчактан зуррак үзе. Боз туктагач, ялтырап кояш та чыкты. Әмма әле икенче көнгә дә эреп бетмәгән иде. Кул белән җыеп алырлык боз җыелып торды.




“Мондый галәмәтне карт-карчыклар да хәтерләми”

Авыл җирлеге башлыгы сүзләренчә, элек мондый гарасат күзәтелмәгән.

– Безнең авыл тирәсендә мондый өермәнең беркайчан булганы юк. Хәтта карт-карчыклар да мондый галәмәтне хәтерләми, - диде Айгөл Хөсниева.


“Бакчадагы барлык яшелчәне тар-мар итте”

Адав-Толымбайда яшәүче Альбина Вәлиуллина боз яуган мизгелләрне видеога төшереп торган.


– Җәй уртасында шундый хәл булыр дип кем уйлаган. Печән алып кайтып, шуны киптерергә дип җәеп куйган идек. Санаулы минутлар эчендә ямь-яшел печән ап-ак боз белән капланды. Хәер, боз ул ярты сәгатьләп яугандыр, - ди Альбина.



“Ике атналык чебиләрне үтергән”

Альбина Вәлиуллина сүзләренчә, зыян яшелчәләргә һәм торакларга гына килмәгән.

– Ике атналык чебиләребез бар иде. Кинәт боз ява башлагач, ышыкланыр урын тапмаганнар, күрәсең. Байтагын имгәткән. Күршеләрнең 10 чебиен үтергән. Әниләрнең сарай түбәләрен тулысынча алып аткан иде, - диде ул.

“Өйгә кермәкче булабыз, ишегалдында шифер оча”

Альбина ханымның әнисе – Нина Игнатьеваның 76 яшенә җитеп мондый галәмәтне күргәне булмаган.

– Инде мин 80не куам. Үземнең генә түгел, әти-әниләрнең дә мондый гарасат турында сөйләвен хәтерләмим, - ди Нина ханым. – Мин болыт ничек җыелуын күрми дә калдым. “Яңгыр килә ахры” дип, сеңлем белән үрдәкләрне ябарга дип чыккан идек, ишегалдында бүленеп калдык. Ишелеп кенә төште боз. Чиләкләп яварга кереште. Ярый әле, үрдәкләрне җыеп бетердек. Ул өермәне күрсәгез сез, берни күренми. Ишегалдында кечерәк келәт бар. Сеңлем белән шуңа ышыкланып, елап басып тордык. Өйгә кермәкче булабыз, ишегалдында шиферлар оча.


“Төзелеш материалы белән ишегалды тулган иде”

Нина ханымның сарай түбәсен тулысынча тар-мар итә җил-давыл.

– Буе – 18, киңлеге 4,5 метрлы сараемның түбәсен алып атты. Шиферларны кайсын яртылаш, кайсын тулысынча каерган. Теткәләнеп беткәннәре дә бар. Шифер ваклары җиргә батып-батып кергән. Шиферны гына түгел, аны беркеткән агач борысларны, өрлекләрне дә алып аткан. Җилнең көчен кара син! Әле ярый, өйгә зыян килмәде. Бәхеткә, шиферларны да өйгә очырмаган. Төзелеш материалы белән ишегалды тулган иде. Теткәләнгән шифер вакларын чиләкләп җыйдык, - ди Нина ханым.


Нина Игнатьева сараен 2007 елда эшләткән. Ярый әле, иминиятләштергән булган. Хәзер акчасын гына көтәсе. Шулай да Нина ханым 36 мең сумлык төзелеш материаллары алып, сараен кабат түбәле иткән инде. Эшчеләр ялларга туры килмәгән, туган-тумачалары булышкан.

– Яңгыр кинәт килсә, җиле була иде инде аның. Иң зур дигән зыян – телефон чыбыклары өзелү булгандыр. Ә бу юлы галәмәт булды инде, - ди Нина ханым.




Адав-Толымбай авыл җирлеге башлыгы Айгөл Хөсниева сүзләренчә, давылдан зыян күргән хуҗалыкларның күбесенең йорт-җире иминиятләштерелгән булган. “Хәзер кеше аңлы бит инде инде, агентлар да гел йөреп тора, без дә иминиятләү кирәклеген гел әйтеп торабыз”, - диде ул. 




  Без Инстаграмда

Фикерләр








Җәмгыять

Альбина Шәвәлиева: "Хәзерге яшьләр бик күпкә соңрак өйләнешә, бик күпкә соңрак бала таба"

Татарстан Республикасы Министрлар Кабинетының гражданлык хәле актларын теркәү идарәсе җитәкчесе Альбина Шәвәлиева "Татар-информ" мәгълүмат агентлыгына интервьюсында хәзерге яшьләрнең ничә яшьтә гаилә корырга омтылуы, демографик тенденцияләр, өйләнешүләр һәм аерылышулар статистикасы, иң популяр һәм иң сирәк очрый торган исемнәр хакында сөйләде.

Җәмгыять

"Томау - гадәти күренеш дип уйлаучылар нык ялгыша". Дәваланмаган авыру инфаркт һәм инсультка китерергә мөмкин

Безнең халык һәр төрле авыруны аяк өстендә генә үткәреп җибәрергә ярата. Баш авыртса – дару каба,  йөрәк авыртса – сыекча эчә. Ә томауны инде авыруга да санамый. Янәсе, “Салкында була инде ул, үзе бетә ул”. Баксаң,  томау төшүгә бармак аша гына карарга ярамый икән. Лор табиблары әйтүенчә,  вакытында дәваланмаган томау ишетүдән мәхрүм булудан башлап, инфарктка кадәр җиткерергә мөмкин.

Җәмгыять

РКБга ничек эләгергә? Татарстан халкы сорауларына баш табиб җавап бирә

Былтыр ноябрь азагында “Татар-информ” мәгълүмат агентлыгы Татарстан халкыннан РКБның (Республика клиник хастаханәсе) баш табибы Рафаэль Шәвәлиевкә сораулар җыюны игълан иткән иде. Агентлыкның кайнар линиясенә төрле проблемалар, шикаятьләр һәм тәкъдимнәр белән бик күп кеше мөрәҗәгать итте. Инде сорауларга баш табибтан җаваплар алдык. Шуларны сезгә тәкъдим итәбез.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла