“Бик акыллы, тыныч, тәртипле малай иде...” Питрәчтә 14 яшьлек велосипедчы малайны машина бәрдереп үтергән

7 июнь 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Гөлнар ГАРИФУЛЛИНА
Фото: http://pestrecy-rt.ru
Кичә Питрәчтә коточкыч фаҗига була: 14 яшьлек велосипедчы малайны машина бәрдерә. Иптәшләре зират каршындагы юл аша чыгып өлгерә. Ә ул, ни кызганыч, артка кала. Тау астыннан югары тизлектә менеп килүче машина кисәк кенә туктый алмый. Югыйсә, видеода малай машинаны күргән кебек - велосипед утыргычыннан бераз күтәрелеп, тормозга басарга җыенганы күренә... Әмма малай да, машина да туктый алмый.

Питрәчнең җирле “Вперед” газетасы мәгълүматларына караганда, авария кичә 20 сәгать 20 минутта Никольская урамында була. Ашыгыч ярдәм биш минуттан, юл-патруль хезмәткәрләре ун минуттан, тикшерү-оператив төркем 20 сәгать 35 минутта килеп җиткән. 

Чит ил автомобиле йөртүчесенә зыян килмәгән. Аның югары тизлектә баруы хәбәр ителә. Малайның да юл йөрү кагыйдәләрен бозуы хәбәр ителә - башында шлемы да, киемендә яктылык кайтаргыч элементлары да булмаган.

14 яшьлек егет - Казаннан. Ул, укуын тәмамлап, әби-бабасына кунакка кайткан була. “Татар-информ” хәбәрчесе малайның әбисенең күршесе Марина Романова белән элемтәгә керде.

– Коточкыч фаҗига бу. Алар ел саен каникулга әби-бабайларына кайта иде. Дуслары белән велосипедта йөрергә чыккан булганнар, бик аяныч хәл. Бик акыллы, тыныч, тәртипле малай иде. Шушы хәлгә күңел дә ышанмый хәтта. Без фаҗигадән соң шундук хастаханәгә киттек, тик ул реанимациядә үлде. Кичә әти-әниләре дә хастаханәгә кайткан иде, - дип сөйләде ул.

Мәрхүм малай гаиләдә олы бала булган, аның сеңлесе дә бар. Марина Романова малайны кайчан җирләячәкләрен төгәл әйтә алмады.

Шушы авария тавышын Лилия Сөнгатуллина да ишеткән.

– Кичә кич белән бассейннан кайтып бара идем, миннән шул 500-600 метр чамасы ераклыкта бик каты дөбердәгән тавыш ишеттем. Мин ике машина бәрелеште дип уйлаган идем, аннары шушы фаҗига тавышы булганын аңладым. Кичке унынчы яртыларда барып караучылар велосипед ятканын да, кулларына богау киертелгән ир-атны сораштыруларын да күргәннәр.

Бик кызганыч хәл, аның урыны да шундыйрак бит әле, җайсыз, күренми торган урын. Машинаның тау астыннан чаптырып менеше булган, шуңа кисәк туктый да алмагандыр инде, күрәсең, – диде ул.

“Инстаграм” челтәрендә дә бу юл һәлакәте турында хәбәр таралган. Комментарий калдыручылар машина йөртүчеләргә хәзер иң куркыныч вакыт, балаларның уйламаган җирдән килеп чыгу ихтималлыгын искәртә. Моны аңлап, уяу булырга, тизлекне киметергә өнди. 

Бу Питрәчтә июнь башыннан велосипедчылар катнашында инде икенче юл һәлакәте. 1 июньдә Иске Шигали авылыннан 12 яшьлек укучыны машина бәрдергән иде. 

Мәрхүмнең гаиләсенең тирән кайгысын уртаклашабыз, сабырлык телибез!


  Без Инстаграмда

Фикерләр








Җәмгыять

Путин белән “Туры элемтә”: хезмәт хакы һәм пособие, керем һәм ришвәтчелек, авыл халкы һәм сәламәтлек турында

Бүген Россия Федерациясе Президенты Владимир Путин унҗиденче тапкыр “Туры элемтә”дә катнашты. 4 сәгать тә 8 минут барган очрашуда Путин 81 сорауга җавап бирде. "Интертат" “Туры элемтә”дә яңгыраган әһәмиятле мәсьәләләрне һәм мөһим фикерләрне тәкъдим итә.

Җәмгыять

Казанда юл фаҗигасендә һәлак булган 15 яшьлек кызның әти-әнисе: “Без яңадан яшәргә өйрәнәбез”

Казанның Вахитов районы судында “Фольксваген Джетта” йөртүчесенә карата ачылган эшне карый башладылар. Ул 10 мартта 15 яшьлек Айсинә Булычеваны бәрдереп үтерә һәм авария урыннан качып китз. Бу һәлакәт кыз светофорның яшел утына юл аркылы чыкканда булды. Беренче утырышта суд гаепләнүчедән һәм шаһитләрдән юл фаҗигасенең ничек килеп чыкканын сөйләүләрен үтенде. Суд залыннан - “Татар-информ” репортажы.

Җәмгыять

“Йөрәк түрендә - ятимлек ачысы”

Сугыш, ятимлек, ачлык... Хәзерге заман баласы өчен бу күренешләр түгел, сүзләр дә ят. Без аларны кинолар карап, китаплардан укып кына беләбез. Мин, кечкенәдән әби-бабай белән үскән кыз, сугыш заманында булган хәлләр турында алардан ишеткәләдем. Һәм өй түрендә торучы фотосурәткә гел күзем төшә иде. Бу фотосурәттә бабамның әти-әнисенең кызганыч, авыр тормышы яшеренгән. Сүзем Мамадыш районы Усали (элекке Өчиле) авылында гомер итүче Зиннәтов Миңнулла Зиннәт улы турында.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла