“Бөтен сулыш юлларына ашлык кереп тулган”: Буа районында ындыр табагында 53 яшьлек ир-ат игенгә күмелеп үлгән

5 сентябрь 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Гөлнар ГАРИФУЛЛИНА
Фото: Салават Камалетдинов, Рамиль Гали
Ни кызганыч, быелгы уңыш Буа районы Яңа Тинчәле авылында Фәргать Сибгатуллов крестьян-фермер хуҗалыгы өчен күңелсез бер фаҗига белән истә калачак. 22 августта 1 Май урамында ашлык киптергеч бинасы янында 53 яшьлек ир бункерга егылып төшеп, игенгә тончыгып һәлак була.

Ирнең производствода үлеме буенча Россия Федерациясе Тикшерү комитетының Татарстан буенча тикшерү органнары җинаять эше кузгаткан. Ул хезмәт сагы кагыйдәләрен бозып, саксызлык белән үлемгә китерү маддәсе (РФ Җинаять кодексының 143 маддәсенең 2 нче часте) буенча ачылган. Бункерга егылып төшкән ирнең өстенә ашлык коелган, һәм ул тыны кысылып вафат булган. Җинаять эшен тикшерү барышында, фермер хуҗалыгы җитәкчесенең предприятиедә куркынычсызлыкны ни дәрәҗәдә тәэмин итә алганы бәяләнәчәк.

Яңа Тинчәле авыл җирлеге башлыгы Радик Мадышев Минкин Николай Гарифҗановичның КФХда Тәтеш районыннан килеп эшләгәнен әйтте.

– Сушилкада эшләгәндә, егылып төшеп, травма алган да, үлем белән тәмамланган. Хәзер тикшерү бара. Үлгән көнне Иске Суыксудан кызы килгән иде. Без мәрхүмне моргка озата бардык”, - диде.

КФХ башлыгы Фәргать Сибгатуллов Николай Минкинның үзенә эшкә яз көне килгәнен әйтте.

– Ул безнең авылда тормый иде, соңгы вакытта берәр ай гына вагончикта яшәп алды. Ул, гомумән, сушилкада эшли торган кеше түгел иде. Йорт-каралты тирәсендә төрле эшләрдә булышып, үгезләрне караша иде. Сушилкага очраклы гына барып чыккан ул. Анда безнең башка бер хезмәткәр эшли.

Йорт янында эше беткән дә инде, күрәсең, сушилкага барган. Кешене бит бәйләп куеп булмый, анда нишләп йөргәнен кем белгән, күрәчәге җиткәндер, үлеме тарткандыр инде. Анда эшләүче егет “үзем ул вакытта юк идем, китеп торган идем” ди, ә механизмнары эшләп калган булган. Ул килүенә инде Николай иген бушата торган базга егылган. Ашлыкка күмелгән дә, игенгә тончыгып үлгән. Кем белә, бәлки, кычкыргандыр да, анда кеше булмаган бит ул вакытта.

Мин Буа юлында идем, хезмәткәреп “Фәргать абый, чыгара алмыйм, кайт әле” дип шалтыратты. Тиз-тиз маташып, исән килеш алып булмасмы дигән идек – өлгерә алмадык. Аннары фельдшер, участковыйны чакырдык, - дип сөйләде Сибгатуллов.

“Аек булган диделәр”

Аның сүзләренә караганда, экспертиза нәтиҗәләре буенча мәрхүм аек булган. 

– Эш вакытында эчәргә ирек бирми идек анысы, дөрес, акчасын алып китеп, кире исерек килгәне бар иде. Анализлары кайтты – исерек булмаган.

Фәргать Сибгатуллов фаҗигагә кадәр Минкинның гаиләсен күргәне булмаган.

– Монда эшләгәндә аның янына килеп китүче булмады. Хәзер күрдек менә. Кызы күрше авылда кияүдә икән. Кызыма барам дип, акчасын сорап, шунда баргалый иде. Хатыны Казанда тора иде. Үлгән көнне кызы, кияве килде. Туганнары мине гаепләмиләр, миңа сылтамыйлар. Мин бит инде аны төртеп төшермәгән, мин нишли алам инде, - ди КФХ җитәкчесе.

Җирләү-искә алу чыгымнарын Фәргать әфәнде үзе күтәргән.

– Мин үземнән килгән ярдәмне бирдем. Хезмәт хакларын санап тапшырдым, күмү чыгымнары өчен түләдем, искә алу бәйрәмнәре өчен бирдем. Алар бүген дә миңа рәхмәт укыйлар. Нигә шундый хәл булгандыр инде?! Начар мөнәсәбәттә түгел идек без. Уйламаган җирдән шундый нәрсә килеп чыкты” – ди Фәргать Сибгатуллов борчу катыш. Югыйсә, күрше Иске Суыксу авылында эшсез йөргән кешене эшле итеп, игелек тә кылган.

– Безнең анда аренда кыры бар, алар аша йөргәндә, малайлар белән аралашып, ул безгә эшкә килде.

Бүген Фәргать Сибгатуллов КФХсында алты кеше эшли. Алар үсемлекчелек белән шөгыльләнә – бөртекле ашлык, чөгендер игәләр. 90 гектар мәйдан басуда рапслары бар.

“Күрәсең, баш белән төшкән...”

Яңа Тинчәле ФАП мөдире Фәния Вәлиева да фаҗига урынына барган.

– Экспертизадан соң, табиблар, бөтен сулыш юлларына ашлык кереп тулган, диделәр. Иген бит ул шундый әйбер, аңа бик тиз күмеләсең, бассаң, бата барасың. Ул баш белән төшкәндер, мин үзем дә шулай бер подвалга егылып төшкәнем бар. Иген агып төшә торган җир улак кебек бит ул, өсте киң, асты тар. Күрәсең, баш белән төшкән, аяк белән төшсә, ничек тә, бәлки, тырмалашкан булыр иде. Үзе генә булган, диләр, янында кеше булмаган.

Кияве Динар Николай Минкин турында берничә сүз әйтте.

– Яхшы кеше иде. Кышын бездә яшәде, сезон вакытында Фәргатьтә эшли иде. Тракторист та инде ул, төрле эшләр башкарды. КФХда 4-5 ел сезон вакытында барып эшләп кайта иде. Кемгәдер булышырга керергә мөмкин иде, ярдәм итәргә ярата иде. Без аны Буада җирләдек, - диде.

Кызы Дарья КФХ башлыгының бөтен хезмәт хакын түләгәнен, җирләү чыгымнарын үзе күтәргәнен раслады.

Дарья – уртанчы бала. Николай Минкинның тәрбиягә алган олы улы Денис, Маша исемле төпчек баласы бар. Мәрхүм ике онык бабасы да булган.


  Без Инстаграмда

Фикерләр








Җәмгыять

“Балам шундый фаҗигагә эләгер дип һич уйламый идем, шул хәтле авыр”

Сафина Гөлгенә Инсаф кызы Яр Чаллы шәһәренә медицина училищесына имтиханга китеп барганда юл-транспорт һәлакәтенә эләгә. Кызның баш мие авыр җәрәхәтләр ала. Шуннан бирле ул аңсыз хәлдә. Ул үзе йөри дә, ашый да алмый. Гөлгенә төрле әгъзаларына тугыз операция кичергән инде. Үзе табиб булырга әзерләнеп йөргән 18 яшьлек кыз хәзер табиблар кулында.

Җәмгыять

"Баламны матурлык конкурсында катнаштыру өчен тугыз мең сум акча сорадылар"

Җиткән кызларны гына түгел, сабый кызларны да матурлык конкурсларында катнашырга чакырган игъланнар күргәнегез бардыр. Әлбәттә, һәр ата-ананың кызын иң матуры итеп күрәсе килә, шуңа андый конкурслар ымсындыра да. Тик аны-моны уйламый гына ризалык бирмәгез. 

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла