“Әле кичә генә малайлары оныгым белән ишегалдында уйнап йөрде”: Казанда шәхси йортта чыккан янгында алты кешелек гаилә һәлак булды

23 апрель 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Елена САЛЯХОВА, sntat.ru
Фото: Елена Саляхова, социаль челтәрләр
Тулы бер гаиләнең гомерен өзгән коточкыч фаҗига Казанда 22 апрель төнендә булды. Казанның Авиатөзелеш районында шәхси йортта чыккан янгында өч бала, аларның әти-әнисе һәм әбисе һәлак булды. Иң кечкенә кызчыкка бер яшьтә тә тулмаган булган. “Татар-информ” агентлыгы янгын урынында булды һәм фаҗига турында тәфсилләбрәк белеште.  

Төнлә чыккан янгында олыларның һәм балаларның һәлак булуы аларның туганнарын, дусларын, хезмәттәшләрен һәм күршеләрен генә түгел, ә бөтен Казан халкын тетрәндерде. Бер мизгелдә зур, тату гаиләнең гомере өзелде.

Янгын вакытында барысы да: гаилә башлыгы, 33 яшьлек Алексей, аның 31 яшьлек хатыны Гөлназ, уллары – 9 яшьлек Марат һәм 11 яшьлек Әскәр, тугыз айлык кызлары һәм 64 яшьлек әбиләре һәлак булды.

Гаилә Авиатөзелеш районының Пестель урамында зур булмаган шәхси йортта яшәгән. Күршеләре сөйләвенчә, аларны инде монда 30 елдан артык белгәннәр.

“Моңа ышана алмыйбыз. Шундый тату гаилә иде. Һәрвакыт булыштылар, ярдәм кулы суздылар. Гаиләләре белән бит! Балалар бигрәк тә жәл”, - дип сөйләде әле дә шок хәлендә булган күршеләре.

Казанның Пестель урамындагы шәхси йорт януы турында хәбәр ашыгыч хезмәтләр чакыру өчен 112 бердәм номерына төнге уникенче яртыда килә. Янгын сүндерүчеләр фаҗига урынына килгәч, бер катлы кирпеч йорт януы ачыклана. Бер сәгатьтән соң янгынны сүндерәләр. Янгын сүндерүдә 46 кеше, 13 техника катнаша.

Янгынны сүндергәннән соң, фаҗига урынында иртәнгә кадәр янгын тикшерүчеләре һәм суд-тикшерү лабораториясе экспертлары эшләгән. Гаддәттән тыш хәлләр министрлыгы хезмәткәрләре фикеренчә, янгын электр чыбыкларының төзек булмавы һәм электр челтәрендәге йөкләнеш аркасында чыккан.

Иртән янган йорт тирәсендә һәлак булган гаиләнең күршеләре һәм дуслары җыелды. Янган йортка чәчәкләр алып килделәр.

Күршеләре сөйләвенчә, янгынны беренче булып күрше урамда яшәүче ханым күргән. Ул тиз арада янгынчылар чакырган һәм ярдәм сорап башка ихаталарга кергән. Янгынны күргән башка кешеләр дә йорттагы кешеләрне коткарырга дип шунда ашыга.

“Янгынны күргәндә мин улым һәм күрше белән бергә идем. Без йорт янына чаптык. Тәрәзәләрен вата башладык, ишеген ачтык. “Ашыгыч ярдәм” килгәнче үк, Лешаны алып чыктык, ул ишек төбендә ята иде. Аны алып чыкканда пульсы юк иде инде”, - дип сөйләде бер күршеләре.

Шаһитләр әйтүенчә, янгын ир белән хатынның һәм тугыз айлык кызларының бүлмәсе урнашкан якта, түбәдә башланган. Соңрак ялкын таралып, бөтен йортны диярлек камап алган.

“Янгынчылар тиз килде. Алар артыннан ук “Ашыгыч ярдәм” дә килеп җитте. Ләкин соң иде инде. Калганнарын үле килеш алып чыктылар”, - дип сөйләде янгын шаһите.

Күршеләре сүзләренчә, әлеге гаилә бик тату, эшчән булган. Олы малайлар мәктәптә укыган. Алексей эшләгән, еш кына күршеләренә машина төзәтергә булышкан. Гөлназ балаларны тәрбияләү белән шөгыльләнгән һәм паралич суккан әнисен караган.

“Кичә оныгым килгән иде. Әле кичә генә ул аларның малайлары белән уйнап йөрде. Бервакытта да аларның ачуланышканын ишеткән булмады. Тәртип бозулар да булмады. Алексей эшләде. Гөлназ декрет ялында иде. Кече кызын карады, малайларны мәктәпкә йөртте”, - дип сөйләде күршеләре.

Алексей белән Гөлназның һәм балаларының һәлак булуы эштәге хезмәттәшләрен дә тетрәндергән. Декрет ялына киткәнче Гөлназ балалар бакчасына тәрбияче булып эшләгән.

“Ул бик ягымлы кеше иде, балаларны яратты. Аның белән мондый хәл булуына әле дә ышанып бетә алмыйбыз”, - дип хәсрәте белән бүлеште Гөлназның хезмәттәше.

Алексей логист булып эшләгән. Хезмәттәшләре аны җаваплы, ачык, яхшы кеше дип искә ала. Алексей бик яшьли спорт белән шөгыльләнә башлаган һәм хоккей командасында уйнаган.

Гаилә һәлак булу факты буенча җинаять эше ачылды, диделәр Татарстан Республикасы буенча Тикшерү комитетында.

“Пестель урамында булган фаҗигадән соң, саксызлык буенча үлемгә китерү буенча җинаять эше ачылды. Беренчел мәгълүматлар буенча, кешеләр төтен белән агуланып вафат булган. Әлегә янгынның төгәл сәбәбе ачыклана”, - дип сөйләде Татарстан Республикасы Тикшерү комитеты җитәкчесенең өлкән ярдәмчесе Андрей Шептицкий.

Казанның башкарма комитеты белән “Ритуал” муниципаль унитар оешмасы мәрхүмнәрне күмүдә бушлай ярдәм күрсәтәчәк, диделәр “Татар-информ”га Казан шәһәре мэриясендә.

“Катафалклар, күмү өчен кирәкле ритуаль әсбаплар биреләчәк. Каберләр казу һәм күмү ярдәме күрсәтеләчәк. Мамадыш трактындагы Мөселман зиратында биш урын биреләчәк. Туганнары теләге буенча, һәлак булган әбине Балык бистәсе районында җирләячәкләр”, - диде Казан шәһәре мэриясенең матбугат хезмәте җитәкчесе Владимир Казанцев. 


  Без Инстаграмда

Фикерләр








Җәмгыять

Җәлилчеләрне искә алу мәрасиме: “Унбер егетебез, Җир шарының тынычлыгын яклар өчен, башларын гильотинага салды”

Татар халкы һәр елны фашист гильотинасы астында җәзалап үтерелгән герой-шагыйрь Муса Җәлилне һәм аның көрәштәш дусларын искә алыр өчен беренче май мәйданында җыела. Быел да татар халкы өчен генә түгел, фашизмга каршы сугышкан һәр халык өчен дә тетрәндергеч, фаҗигале көн – җәлилчеләрнең башы өзелгән көнне аерым бер сыкрану, өзгәләнү белән искә алдылар.

Җәмгыять

Чемпионатка 5 еллык әзерлек һәм Кызыл мәйданнан да зуррак ярыш мәйданы: Казанда узачак WorldSkills турында 8 факт

Татарстанда узачак иң зур вакыйга – һөнәри осталык буенча WorldSkills Kazan 2019 дөнья чемпионаты ачылышына санаулы минутлар калып бара. Ачылыш алдыннан оештыручылар журналистларга бу чарага әзерлек һәм катнашучылар турында кызыклы фактларны сөйләде.

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла