Рифат Фәттахов: "Ваһапов фестивален сызып кына ташлап булмый, көтмәгез дә!"

12 сентябрь 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Юлия НАСЫЙБУЛЛИНА
Фото: Рамил Гали
"Бер төн эчендә дистәләгән, йөзләгән шалтырату булды, килгән хатларның санын төгәл генә әйтә дә алмыйм. Әлеге алым киң җәмәгатьчелектә шундый шау-шу уятыр дип уйламаган идек. Рәшит Ваһапов фонды, фестивале, шәхсән Рифат Фаттахов үзе, Рәшит Ваһаповны хөрмәт итми, дип әйтсәләр, мин бу сүзгә берничек тә җавап бирә алмыйм", - диде Рифат Фәттахов. Танылган продюсер "Интертат"ка ни өчен Рәшит Ваһаповның йөзен сызып ташлаган баннер урнаштыруы турында аңлатма бирде.

Кичә Ваһапов фестивале җырчылары Рәшит Ваһаповның йөзен сызып аткан фотолар урнаштырды. Бу җәмәгатьчелектә зур шау-шу тудырды. 


- Рифат әфәнде, зурдан кубып Рәшит Ваһаповның йөзен сызып ташлагансыз, әллә Ваһапов фестивале ябыламы?

- Беләсезме, Ваһапов фестивален сызып кына ташлап булмый, көтмәгез дә! Әлеге мәсьәлә буенча миңа бер төн эчендә дистәләгән, йөзләгән шалтырату булды, килгән хатларның санын төгәл генә әйтә дә алмыйм. Безнең җәмгыятьтә һәм җәмәгатьчелектә Ваһапов фестиваленә берәүнең дә битараф калмавы сөендерде. Гади кешеләр, сәнгать әһелләре, җырчылар һәм хәтта ки бик югары хакимият даирәләреннән дә борчылып шалтыратучылар булды. 

Бу гадәти техник процесс, логотип алыштыру гына. Үзен хөрмәт иткән теләсә нинди компания күпмедер вакыт үткәч, үзенең йөзен, тышкы кыяфәтен үзгәртергә тырыша, шул гына.

- Рәшит Ваһаповның йөзен сызып ташлап, сез аның шәхесен кимсетәбез, дип уйламадыгызмы?

- Без әлеге мәсьәләгә техник яктан гына карадык. Безнең дизайнерларыбыз күпмедер дәрәҗәдә бәлки ялгышлык та җибәргәндер. Культуралырак булырга кирәк иде, килешәм. Бераз тупаслык киткән. Әмма ләкин бу безнең Рәшит Ваһаповка булган мөнәсәбәтебезне күрсәтми. Монда сүз тулаем логотип турында гына бара. Рәшит Ваһапов фонды, фестивале, шәхсән Рифат Фәттахов үзе, Рәшит Ваһаповны хөрмәт итми, дип әйтсәләр, мин бу сүзгә берничек тә җавап бирә алмыйм. Киләчәккә планнарыбыз зурдан, быел 9нчы октябрьдән концертларыбыз башланып китәчәк һәм декабрь аена кадәр безнең 17 чара көйләнгән. Алар барысы да Рәшит Ваһаповның 110 еллыгына багышланган, аны зурлау, хөрмәтләү концертлары булачак.

- Димәк, Рәшит Ваһаповның йөзен дизайнерлар сезнең белән киңәшләшмичә сызып ташлаганнар?

- Киңәшләшмичә дип әйтә алмыйм, киңәшләштеләр. Әлеге алым киң җәмәгатьчелектә шундый шау-шу уятыр дип уйламаган идек. Без моңа гади бер техник процесс буларак кына якын килдек. Ә ул шул кадәр шау-шу кубарды.

- Гадәттә тышкы кыяфәтне бераз картая төшкәч, төссезләнгәч үзгәртәләр. Ваһапов фестивале дә төссезләнә башлады мәллә?

- Алай гына түгел, бераз олыгая башлагач та кеше үзенең тышкы кыяфәтенә үзгәрешләр кертергә омтыла. Безгә дә быел 15 ел, олыгаябыз. Инде 15 яшькә җиткәндә бераз тышкы кыяфәтеңне үзгәртеп, аңа заманча сулыш өреп җибәрү комачау итмәс.

- Тышкы кыяфәткә кергән үзгәрешнең эчке кухняга да йогынтысы булачакмы?

- Бераз үзгәрешләр булачак, әлбәттә. Чөнки замана үзенең тәэсирен ясамый калмый. Җырларга заманча ритмнар, заманча алымнар кертәчәкбез. Әмма ләкин үзгәртәбез дип татар җырының, татар моңының, асылына тимәячәкбез. Асылыбыз шул ук - югары профессиональ музыкабызны, чын татар җырын, татар моңын пропагандалау булып калачак...





  Без Инстаграмда

Фикерләр








Шоу-бизнес

“Җырчылар берләшеп эшли алмый, сәламәт көндәшлек бара”: артистлар берләшә аламы?

Башкортстанның атказанган артисты Ришат Төхвәтуллин “Татар-информ” мәгълүмат агентлыгына биргән интервьюсында эстрада җырчыларының уртак проблемаларын дәүләт органнарына җиткерә алырлык профессиональ берлек оештырырга тәкъдим итте. “Татар-информ” агентлыгы “Эстрада җырчылары берлеге кирәкме?” дигән сорау белән артистларга мөрәҗәгать итте.

Шоу-бизнес

Ринат Рахматуллин: “Ике ел төрмәдә утырдым, шуның өчен атказанган артист исеме бирмиләр”

Ринат Рахматуллин шәхси тормышы, иҗаты турында ачылып сөйләргә яратмый. Шуның өчен ул тамашачыларга укылмаган китап кебек - укыйсы да әле укыйсы! Тыйнаклыгы тормышта да, сәхнәдә үз-үзен тотышында да, җырларында да чагыла. Әмма әлеге сыйфат аңа сәхнәдә танылырга комачауламаган. Җырчының “Чакыр гына мине”, Тормыш китабы”, “Тукта яңгыр” кебек җырлары күптән халык күңелен яулады. 

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла