"Гашыйк булгач, борынымдагы алканы алып ташладым". Җырчылар мәхәббәт аркасында нинди адымга барган?

14 февраль 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Ләйлә ХӘКИМОВА
Мәхәббәт - дөньядагы иң сәер хис бит ул. Ул кешене тулысынча үзгәртергә мөмкин. Сөю аркасында кеше әллә нинди ахмак адымга барырга мөмкин. 
14 февраль – Гашыйклар көне. Изге Вәли көне дә диләр әле. Йөрәгендә мәхәббәт хисе яшәгән һәркем өчен көтеп алынган бәйрәмнәрнең берсе бу. Бер күрүдә башны югалтып гашыйк булган вакытлар һәркемнең күңелендә уелып кала. Сөйгәннәре өчен акылсыз адымга барган чакларын татар эстрадасы йолдызлары хәтерлиме икән?



Булат Бәйрамов, ди-джей: "8 Март көнне тәкъдим ясадым"

- Гашыйклар көне шактый бәхәсләр уяткан бәйрәмнәрнең берсе. Кайберәүләр аны католик дине белән бәйле булганга, кайберәүләр кирәксезгә санап бәйрәм итми. Шулай да бу көн минем күңелемә хуш килә. Аңа каты бәрелүчеләрне аңламыйм. Бу бәйрәм хисләребезне тагын бер кат белгертергә мөмкинлек бирә. Мин – романтик. Сюрпризлар ясарга, бүләкләр бирергә яратам.

Акылсыз һәм юләр, шаккаткыч адымнар ясаганым булмады үзе. Түбәләргә менеп, парашютлардан сикереп мәхәббәт аңлатканым юк. Ләйсәнгә 8 март көнне тәкъдим ясадым. Анысы бик “романтично” булды. Хәзер, гаилә коргач, очрашып йөргәндәге кебек “шапрынмыйсың”. Үземнең ярату хисен тыныч кына аңлатам. Бәйрәмне өйдә гаиләбез белән бергә билгеләп үтәчәкбез.



Рафил Җәләлиев, җырчы: "Юләрлекләр кылып йөргәнем булмады"

- Юк, юк. Башымны югалтып, юләрлекләр кылып йөргәнем булмады. Хатыным Эльмирага бер күрүдә үк гашыйк булдым. Матур гына очрашып йөргәннән соң кавыштык. Гашыйклар көнен зурлап уздырган юк. Гаиләбез өчен никах һәм туй көннәре генә истәлекле. Шулайда аны игътибарымнан читтә калдырмадым, иртәдән чәчәкләр белән сөендердем.  



Иркә, җырчы: "Гашыйк булсам да, мәхәббәткә барып җитми"

- 14 февраль минем өчен бәйрәм түгел ул! Мәхәббәтеңне бер көнне генә түгел, һәр көнне белдереп торырга кирәк дип саныйм. Гашыйк кешегә көн дә бәйрәм булырга тиеш. Бу бәйрәм яшьләр өчен күңелледер, бәлки. Яшьрәк чакта күп нәрсәдән кызык табарга, шашып гашыйк булырга мөмкин. Әмма олыгайгач бөтен әйберне бүтән төрле кабул итәсең. Мин бик тиз гашыйк булам. Ләкин алар зур мәхәббәт хисенә әверелми. Егетләр өчен башка сыймаслык адымнар ясаганымны да хәтерләмим. Хәзер яраткан ирем янәшәмдә. Аллага Шөкер, 6 ел бергә торабыз. Арабызда бер-беребезгә карата мәхәббәт һәм хөрмәт. Гаиләм янымда булса — шул җитә, көн дә бәйрәм шул була.



Чәчкә, җырчы: "Мин җитди кеше"

- Гашыйк булу шундый матур хис бит. Һавада очып йөреп, чынбарлыкны күрмисең. Шулай булуга да карамастан, акылсызлыклар эшләп йөрмәдем. Мин җитди кеше. Тормыш иптәшем Ирекне дә җитди булганы өчен яраттым. Игътибарлы, төпле, яхшы күңелле булуы белән мине үзенә каратты. Кыланчык, мәхәббәт хисләрен бөтен дөньяга күрсәтеп йөргән егетләр миңа ошамый. Андый акылсыз адымнар вакытлыча була торган күренеш. “Алсу күзлекләр”не салып ташласаң, аларның берсе дә калмый. Мәхәббәт хисләре йөрәк түрендә сакланырга тиеш. Гашыйклар бәйрәмен көне буе гаиләм белән үткәрәчәкмен. Кая барасыбызны әле уйлап бетермәдек.



Илгәрәй, җырчы: "Соңгы акчама чәчәк алдым"

- Бик зур адымнар ясаганым булмады. Студент вакытта соңгы акчама гашыйк булган кызга зур чәчәк бәйләме бүләк иттем. Менә шул истә калган. Ул вакытта иң зур бүләк - чәчәк иде. Гашыйклар көнен зур бәйрәмнәр рәтенә кертмим. Бүген кич гаилә белән пицца, роллы, тәм-томнар алып билгеләп узачакбыз.



Лилия Хәйруллина, җырчы: "Борынымнан пирсингны алып ташладым"

- Бәйрәмнәрне яратмыйм. Аларны үткәрергә теләгем дә, вакытым да юк. Гашыйк булып, җитди адымнар эшләгәнем бар. Яраткан кешем өчен үземне тәртипкә китердем. Борынымдагы пирсингны алып ташладым, ябыгырга тотындым. Бу үзгәрешләр миңа файдага гына булды. Беренче мәхәббәтем белән озак йөрдек. Аның өчен елап йөргәнем истә. Артымнан йөрүче романтик егетләр күп иде. Асфальтка язучылар, конфет, чәчәк, бүләк бирүчеләр булды инде. Хәзер иң мөһиме - яраткан кешең белән бер-береңне аңлап, хөрмәт итеп яшәү. Элек ирем бүләкләр бирмәсә, бәйрәм белән котларга онытса, үпкәли идем.



Венер Салимов, җырчы: "Минем кебек матур кешене болай да яраталар"

- Башны югалтып, акылга сыймаслык адымнарга барганым булмады. Кызларны чәчәк биреп, матур итеп сөйләшеп үземә карата идем. Минем кебек матур кешене андый адымнарсыз да яраталар иде.



Ленар Яшен, җырчы: "Җырлыйм!"

- Мин гашыйк булсам, хисләремне җыр аша гына җиткерәм. Бөтен дөньяга кычкырып йөргәнем юк. Реаль тормышта мин җитди, җырлар язганда гына романтик була алам. Гашыйклар көнен элек бәйрәм итә идем, хәзер бу бәйрәм гадәти көн кебек үтеп китә.


 




Фикерләр








Шоу-бизнес

“Иртәнге чәй” алып баручысы Илфак Хафизов: “Үзгәрергә вакыт!”

“Болгар радиосы”ның “Иртәнге чәй” тапшыруы бер айлык ялдан соң кабат эфирга чыкты. Аның алып баручылары Илфак Хафизов, Рөстәм Гайзуллин һәм Индира нинди планнар белән эшкә керешкән? Бу хакта “Иртәнге чәй” тапшыруының продюсеры һәм алып баручысы Илфак Хафизов белән сөйләштек.

Шоу-бизнес

Илсөя Бәдретдинованың җырчысы Фәнзил Шәрифуллин: "Башка җырчыларга йөрмәгән ирләр Илсөя концертына килеп утыра"

Саба районы Югары Шытсу авылы егете җырчы Илсөя Бәдретдинова төркемендә булырмын дип уйлап та карамагандыр, мөгаен.Үзенчәлекле җырчының коллективындагы егетләр дә үзенчәлекле. Фәнзил дә шундый. Ул Интертатка Илсөя Бәдретдиновада эшләүнең ни икәнен сөйләде.

Шоу-бизнес

Кем гаепле: акчасын алып, җырчыга ошамаган клип төшергән "Барс Медиа"мы, әллә камера каршында бии белмәгән Айдар Рәкыйповмы?

2017 елның 15 сентябрендә "Барс Медиа" белән килешү төзедек. Акчасын вакытында түләдем. Ике көн үткәч, эшне башлап җибәрдек. Килешү буенча алар миңа клипны 30 көн эчендә, ягъни 1 айдан соң әзерләп тапшырырга тиешләр иде. Бер ай көттем, ике ай, өч... әле дә көтәм. Алар миннән тизрәк котылу өчен өч тиенлек клип җибәрәләр. Алар җибәргән клипның сыйфаты миңа ошамый. Әзер клип һаман юк. Документаль рәвештә клипны кайчан кулыма тапшырырлар, билгесез, дип сөйләде яшь җырчы Айдар Рәкыйпов Интертатка.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла