Альберт Яруллин «Ак Барс» белән яңа килешү төзеде: «Мин иң яхшы клубта уйнавыма шат»

Сакчы үзенең Инстаграм битендә: «Мин иң яхшы клубта уйнавыма шат һәм бәхетле», — дип татарча язып куйган.

Альберт Яруллин Казан клубы белән бер еллык килешү төзеде. Бу хакта «Ак Барс»ның рәсми сайтында хәбәр ителә.

Шулай ук Альберт үзе дә хисләнеп китеп:

«Мин туган клубымның бер өлеше булуыма бик шатмын. Иң яхшы җанатарларыбызга ярдәм өчен рәхмәт. Үзегезне саклагыз һәм яңа сезонны түземсезлек белән көтәбез», — дип Инстаграмында язып куйган. Өстәвенә, сүзләрен татарча: «Туган ягым — алтын бишек. Мин иң яхшы клубта уйнавыма шат һәм бәхетле», — дип тәмамлаган.

Альберт Яруллин Казан командасы өчен барлыгы 8 сезон уйнады. 2017/2018 елда Гагарин Кубогы иясе булды. Үткән сезон «Ак Барс» өчен 56 уен уйнап, барлыгы 33 очко җыйды.