«Рубинның» яңа тренеры Леонид Слуцкий өчпочмак ашауда җиңгән

Күптән түгел «Рубин» футбол клубы танылган тренер Леонид Слуцкий белән алдагы биш елга контракт төзеде.

Уен аралыгында туры эфирга чыга торган «Ак Барс ТВ» үзенә кунак итеп баш тренерны чакырды.

Леонидка тапшыру дәвамында төрле конкурслар эзерләнгән иде. Иң кызыгы, әлбәттә, өчпочмак ашауда көч сынашу булды. Әлеге сынауда баш тренер алып баручыны җиңде.

Слуцкий гамбургерлар фанаты, ләкин аңа өчпочмаклар да хуш килгән, ахрысы. «Ак Барс» клубының рәсми аккаунтында:

«Леонид Слуцкий Татарстанда биш минуттан соң», — дип кызыклы видео керткәннәр.

Леонид Слуцкий «Рубин» белән яңа контракт төзегәч, күбесе: «Футбол клубының базасы янында «Макдональдс» урнашкан, әлеге шарт — Слуцкийның күчүендә төп роль уйнады», — дип шаярттылар. Кем белә, бәлки, эш «Макдональдста» түгел, ә өчпочмакларда булгандыр.