Җәвит Шакиров күршеләре белән аралашып яши алмаганга борчыла

Юмор остасы күршеләренә багышлап шигырь язган.

Җәвит Шакиров күршеләре белән аралашып яши алмаганга борчыла. Аларга багышлап шигырь дә язган.

Юмор остасы бер дусты белән шигырьле әңгәмә дә алып барган.

«Эх, синең күршең була алсам, белер идем ничек яшәргә. Капкаларны, киртәләрне җимереп атар идем. Үзем сатып ала алмам инде ул йортны. Үзең түләсәң акчасын…» — дип язган бер дусты.

«Үзең әйбәт булсаң, күршең дә әйбәт була. Үзеңдәдер ачкыч», - дип язучыга: «Ачкычы булу беләнмени, йозагын ачып булмый», — дип җавап биргән Җәвит Шакиров.

Бу күршеләр синең кебек,

Сәлам бирми баш иеп.

Күргәнем дә юк үзләрен

Коймалары бик биек.

Машинасына утырып

Чыгып китә эшенә.

Сөйләшмиләр - шунысы оят

Минем ише кешегә.

Пульт белән генә ачыла,

Капкасы өске якка.

Күршең, туганың кермәгәч

Ни пычагыма капка?

Чыгып басам күтәрмәгә

Исәнләшер кешем юк.

Сәлам биреп, сәлам алыр

Бер нормальный күршем юк.

Күршеләр артист икәнне

Беләләрдер дә инде.

Ул йорты, ул коймасы дип,

Көләләрдер дә инде.

Йорт та гади, койма кыска

Бассам, башым күренә.

Капканың да йозагы юк

Ярый инде үземә.

Күршемнең шундыйлыгына,

Ис китә. Шаккатмалы!

Үзем әллә бик простуй,

Әллә алар катлаулы?

Күршеләр шундый булуы

Оят инде кешедән.

Теге дөньяда булса да

Уңсам иде күршедән.

Күрше пока күктән йөри

Бер җиргә төшәр әле.

Арттст күрше гел булмый

Исенә төшәр әле…