Телевидение журналисты Энҗе Шәйхетдиновага мактаулы исем бирелде
Бүгенге көндә ул Бөтендөнья татар конгрессында хезмәт куя.
Бөтендөнья татар конгрессының Мәгълүмат хезмәте һәм массакүләм мәгълүмат чаралары белән элемтә идарәсенең баш референты, «Дөнья» студиясе алып баручысы һәм режиссеры Энҗе Шәйхетдиновага Татарстан Республикасының атказанган мәдәният хезмәткәре исеме бирелгән. Бу турыда конгрессның сәхифәсендә хәбәр ителә.
Энҗе Шәйхетдинова ике дистә елга якын тормышын тележурналистикага багышлаган шәхес. Ул төрле елларда «Яңа Гасыр» каналында эфирга чыккан «Ике аккош», «Мәдәният дөньясында», «Кара-каршы» тапшырулары алып баручысы, «Хәбәрләр» редакциясендә продюсер булып хезмәт итә.
Бүгенге көндә ул Бөтендөнья татар конгрессының «Дөнья» студиясендә Җир шарының төрле почмакларыннан килгән милләттәшләребез белән кызыклы әңгәмәләр эшләп тамашачыларыбызны сөендереп тора.
Журналистның дуслары һәм хезмәттәшләре аны мактаулы исем алуы белән котлаган.